Loos 10:13-17
Nqe cim:
“Yog tsis muaj leejtwg txib lawv mus, lawv yuav ua li cas mus qhia txojmoo zoo? Vajtswv Txojlus hais tias, cov neeg uas mus qhia Txojmoo Zoo txhais kotaw zoo kawg li!” (Loos 10:15)
Lus nug rau sawvdaws xav:
– Qhov chaw pib ntawm lo lus samhwm mus qhia Moo Zoo yog qhov twg?
– Cov feem xyuam ntawm tus neeg mus qhia Moo Zoo yog dabtsi?
– Timthawj Paulus xav hais txog dabtsi thaum hais lo lus “tsis yog txhua tus yuav ntseeg Txojmoo Zoo ntawd”?
– Peb tau tus Tswv qhia yam dabtsi thaum mus ua timkhawv hais txog Nws zaj?
Hauv tsab ntawv Loos tshooj 10, Timthawj Paulus hais txog nws haivneeg uas muaj lub siab tawv, cov uas los ntseeg Yexus muaj tsawg heev. Qhov no twb yog lawv vamkhom lawv qhov kev ua zoo, tsis vamkhom Vajtswv txojkev ncaj ncees uas yog kev ntseeg Yexus Khetos. Twb yog vim li ntawd, Paulus thiaj hais hnyav txog tes haujlwm qhia Yexus zaj, uas yog qhov tseemceeb ntawm “txojkev ntseeg”. Cov ntsiab lus ntawm tej lus qhia yuav tsum meej thiab yoojyim totaub, Vajtswv txojlus hais tias; “txhua tus uas thov tus Tswv pab yuav dim.” (nqe 13). Ib yam li Paulus tau qhia lawm, qhov teebmeem yog tes haujlwm qhia txoj Moo Zoo yuav tsum pib ntawm qhov uas muaj neeg raug xa mus qhia rau cov neeg mloog kom paub txog Tswv Yexus yog Khetos, yog Vajtswv Leej Tub ntag. Tus neeg mus qhia lossis tus neeg ua timkhawv tes haujlwm xub thawj yog “txhais kotaw” uas “tawm mus”. Dhau ntawm keebkwm Pawg Ntseeg loj hlob, muaj ntau lub tswvyim tawm mus qhia tau zoo heev thiab ua tau haujlwm ntawm tej thaj chaw uas saib zoo li nyuaj kawg. Tes haujlwm txuas ntxiv uas yuav tsum ua, yog qhia txog tus Tswv. Raws li kev vammeej tamsim no, “hais lus” yuav xa dhau tej cuabyeej mloog, ntsia sib txawv xws li ntaub ntawv, duab yees, phau Vajluskub, xa suab lus, huabcua… yog cov zoo sijhawm uas “hais” pab tau txojkev ua timkhawv.
Dua li ntawd, cia kom txhawb zog rau cov qhia Moo Zoo, Timthawj Paulus rho ib nqe lus hauv Yaxayas los hais tias lawv ntseeg yog thaum lawv hnov qhia. Muaj ntau qhov vimchiv, lossis lawv tseem tawv ncauj, tsis tau totaub, tsis tau paub txog tus Tswv lub sijhawm… Qhov no txhais tau tias peb yuav tsum ua siab ntev, siv zog rau tes haujlwm qhia txog Tswv Yexus. Tsis yog qhia ib zaug tiamsis yog ntau zaug, tsis yog hais lus tiamsis ua neej sib hlub zoo ib yam li Timthawj Petus qhia, “Nej yuav tsum ua nej lub neej kom zoo, txawm yog cov neeg tsis ntseeg Vajtswv uas nrog nej koom zej koom zos nyob ua ke, lawv thuam hais tias nej ua phem los lawv yeej yuav pom tes haujlwm zoo uas nej ua thiab thaum txog hnub uas Yexus rov qab los lawv yuav qhuas Vajtswv.” (I Petus 2:12). Muaj cov neeg los ntseeg thaum hnov qhia txog tus Tswv zaj thawj zaug xws li tus nom Ethi-aupias (Tes Haujlwm 8:36-39), tiamsis kuj muaj cov neeg uas txog tus Tswv lub sijhawm, lossis ntau lub xyoo tom qab lawv mam li los ntseeg Yexus. Yog li ntawd, peb tsis txhob tas kev cia siab rau tes haujlwm qhia, lawv yeej yuav los ntseeg ib hnub twg xwb. Yog li ntawd, “koj yuav tsum muab siab rau qhia Vajtswv Txojlus, tsis hais lub sijhawm twg los koj yuav tsum qhia. Koj yuav tsum ua siab ntev qhuab qhia. Koj yuav tsum ua siab ntev qhuab ntuas sawvdaws, yaum sawvdaws los ntseeg thiab txhawb sawvdaws lub zog.” (II Timautes 4:2).
Thov Vajtswv,
Vaj Leej Txiv tus uas dawbhuv, thov Koj txib nyuam yaus mus thiab pub koob hmoov rau nyuam yaus ua siab ntev qhia Txojmoo Zoo. Txawm yog yuav txomnyem thiab tau zoo los thov Koj pab kom nyuam yaus ua taus siab ntev qhia Koj zaj tsis tso tseg. Nyuam yaus tuav Tswv Yexus lub npe thov, Amees.
Yam dabtsi thaiv kev ua rau peb tsis tas siab tawm mus qhia txog tus Tswv zaj?
Nyeem Vajluskub hauv peb lub xyoo: I Xamuyees 3
Kênh Youtube BHKTHN:
