Nkauj Quaj Ntsuag 5:19-22
Nqe cim:
“Tus TSWV, thov coj peb rov qab los cuag koj! Thov coj peb rov qab! Thov rov qab txhim kho kom peb muaj koob meej li thaum ub!” (Nkauj Quaj Ntsuag 5:21)
Lug nug rau sawvdaws xav:
– Thaum ntsib kev nyuaj siab, quag zog hauv lubneej ua cev qhev, tus Tswv haivneeg txiav txim siab licas?
– Lawv ntseeg hais tias Vajtswv muaj cuabkav ua dabtsi rau lawv lubneej?
– Peb ua dabtsi thaun paub hais tias tus kheej raug ris lub txim ntawm tej kev txhaum?
Tus Tswv haivneeg zeem paub txojkev txomnyem uas lawv tabtom raug puavleej yog tim tej kev txhaum uas lawv tau ua rau tus Tswv, thiaj ua rau tus Tswv chim rau lawv haivneeg Yixalayees. Nimno tus Tswv haivneeg tsis xav ua neej nyob hauv txojkev txomnyem quaj ntsuag ntxiv lawm, lawv tig los vamkhom tus Tswv uas muaj siab nyob tsis kawg, yog tus Vajntxwv tswjkav mus ibtxhis, taij thov Nws txojkev hlub tshua thiab pab cawm. Tus Tswv haivneeg zeem paub tseeb meej hais tias txawm yog txhua yam ibncig yuav pauv hloov, los Vajtswv thiab Nws tus mojyam yeej tsis hloov. Tsis muaj dabtsi yuav hloov tau tus Tswv txojkev hlub pub rau Nws haivneeg. Vim li ntawd, tus cevlus Yelemis thiaj muaj lub siab tawv sawvcev ntawm haivneeg Yixalayees taij thov tus Tswv hais tias: “Thov coj peb rov qab los cuag koj!”, txhais hais tias thov tus Tswv txhim kho kom lawv tau zoo li qub, lawv yuav lees kev txhaum tig los cuag Nws, kom lawv rov muaj koob meej li thaum ub (nqe 21).
Tomqab ib ntu sijhawm raug ua cev qhev thiab quab yuam, lawv tau tsim dheev, ntshaw tig rov los cuag Vajtswv, lawv yuav tig nrob qaum rau kev txhaum, yog yam uas thaum tsis tau raug Vajtswv rau txim lawv pheej ua siab tawv. Tiamsis txog sijhawm no thaum tau saj tej kev iab siab ntawm tus Tswv txojkev txiav txim vim lawv txojkev ntxeev siab, ces lawv muaj kev ntshaw rov tau ua neej zoo li ntu sijhawm uas tseem muaj Vajtswv saibxyuas, nrog nraim. Lawv ntseeg ruaj khov hais tias, pib ntawm tej lus taij thov no, ces tus Tswv yuav los xyuas lawv thiab coj lawv rov qab los cuag Nws. Vajtswv yog tus siab zoo thiab muaj kev hlub yuav zam txim, yuav txhim kho thiab yuav foom koob hmoov rau Nws haivneeg npluamias. Nqe kawg qhia tshwm lawv txojkev ntseeg: “Lossis koj yeej muab peb tso tseg mus ibtxhis li lawm? Puas yog koj txojkev chim yeej tsis muaj hnub kawg li?” (nqe 22). Ntawm no yog tus Tswv haivneeg nplooj siab, lawv ntseeg hais tias tus Tswv yuav tsis chim rau lawv mus txog hnub kawg!
Peb qaij tsis dhau kev txhaum hauv lubneej thiab kuj raug ris lub txim ntawm tej kev txhaum ntau zaug lawm. Yog peb zeem paub hais tias tej kev txomnyem quaj ntsuag uas peb raug yog tim peb tej kev txhaum thiab ua rau Vajtswv chim lawm, ces yam peb tsimnyog ua thiab yuav tsum ua tamsim no yog thov tus Tswv rov txhim kho peb, pab peb paub lees kev txhaum tig los cuag Nws, qaij deb kev txhaum li tus Tswv haivneeg thaum ub. Vajtswv yuav ua rau peb rov tau lubneej kaj siab li qub thiab peb yuav tau nyob nrog Nws mus li.
Thov Vajtswv,
Vajtswv! Nyuam yaus zoo siab thaum tau tsa suab qhuas Koj tus uas muaj sia zees nyob tsis kawg. Thov pab nyuam yaus zeem paub Vaj Ntsujplig tej kev qhuab ntuas kom nyuam yaus paub lees kev txhaum thiaj tau Koj txhim kho dua tshiab kom tau lubneej kaj siab thaum muaj Koj nyob nrog nraim. Nyuam yaus tuav Yexus Khetos lub npe thov, Amees.
Ib tsoom cov mloog uas hmov thiab tshua,
Peb puas lees txim kiag thaum ua txhaum lawm tau?
Nyeem Vajluskub hauv peb lub xyoos: Loos 16
Kênh Youtube BHKTHN:
