Titus 1:10-14
Nqe cim:
“Koj yuav tsum txwv tsis txhob pub lawv qhia li ntawd, rau qhov lawv qhia tej zaj uas tsis tsimnyog ua rau txhua tsev neeg muaj kev kub ntxhov. Lawv qhia li ntawd twb yog lawv ntxias sawvdaws tej nyiaj yuav xwb.” (Titus 1:11)
Lug nug rau sawvdaws xav:
– Cov xibhwb cuav no yog leejtwg thiab muaj yam dabtsi txawv lwm tus?
– Lawv tau ua dabtsi thiab muaj homphiaj licas?
– Thaum zeem paub xibhwb cuav, peb yuav tsum txiav txim siab licas?
Timthawj Paulus ceebtoom nyob hauv cov Pawg Ntseeg ntawm koog povtxwv Kaletes muaj ntau tug “ua neeg ntxeev siab thiab hais tej lus tsis muaj qabhau dag ntxias lwm tus kom yuam kev” (nqe 10). Lawv tsis yog tus ntseeg li lwm tus tiamsis yog cov xibhwb cuav, uas muaj peb yam txawv lwm tus. Thib ib, lawv yog cov uas ua kevcai txiav. Lawv qhia hais tias yuav tau kev cawmdim, lwm haivneeg yuav tsum ua kevcai txiav thiab coj raws cov Yudais tej kevcai. Thib ob, lawv tseem ntseeg tej dabneeg uas cov Yudais hais (nqe 14). Thib peb, lawv tswj nruj tus kheej lub cev, caiv leej tej uas tus Tswv qhia hais tias yog yam zoo thiab dawbhuv (Titus 1:14-15 HMOWSV). Lo lus “txwv tsis txhob pub lawv qhia” nyob hauv nqe 11 muaj lub ntsiab hais tias cia li ua rau cov xibhwb cuav kaw ncauj, txwv lawv, ua rau lawv tsis txhob qhia tau tej yam txhaum Vajtswv Txojlus. Titus yuav tsum pab cov ntseeg tsis mus ntseeg tej dabneeg uas cov Yudais hais thiab txhob mus mloog cov uas tsis kam ua raws li txojlus tseeb tej lus qhia.
Xibhwb cuav “qhia tej zaj uas tsis tsimnyog, ua rau txhua tsev neeg muaj kev kub ntxhov” (nqe 11), lawv qhia tej yam cuag li tseemceeb heev, hais tau zoo heev tiamsis qhov tseeb tsis muaj nqis thiab tsuas dag ntxias cov uas mloog, tsis pab kom tus Tswv cov menyuam loj hlob hauv kev ntseeg. Vim xav zoo rau tus kheej, lawv siv lub npe ntseeg los nrhiav nyiaj, nrhiav haujlwm, nrhiav meejmom hauv hauv Pawg Ntseeg xwb. Muaj ib yam tus kws sau pajhuam Epimenides uas tau coobleej saib zoo li tus tus cevlus hais yog hais tias, “Cov neeg Kaletes puavleej yog neeg dag, ua nruj ua tsiv ib yam li tej tsiaj thiab yog neeg tubnkeeg uas noj ntau” (nqe 12). Vim li ntawd Timthawj Paulus thiaj hais kom Titus yuav tsum ntuas hnyav cov ntseeg hauv Kaletes kom lawv muaj kev ntseeg ruaj khov, thiaj tsis ris lub npe phem.
Timthawj Paulus tej lus qhuab ntuas Titus nyob hauv ntu Vajluskub no pab peb niaj hnub nimno pom txog tej lub cim zeem paub cov xibhwb cuav. Ntawd yog cov neeg uas tsuas xav kom lwm tus saib lawv tseem ceeb dua Tswv Yexus Khetos. Cov xibhwb cuav tej lus qhia tsis pab kom peb txojkev ntseeg loj hlob. Lawv tsis hais hnyav txog Tswv Yexus tus yamntxwv Vajtswv thiab lub hwjchim ntawm Vajtswv Txojlus tiamsis lawv tsuas dag ntxias kom sawvdaws txiav txim siab raws li nyias txojkev txawjntse xwb. Yam peb yuav tsum txiav txim siab yog tsis sawv nrog, tsis zaum nrog thiab tsis mus uake nrog cov xibhwb cuav. Tuag nthi tsis mus mloog tej lus qhia yuamkev, tiamsis niaj hnub tshajtawm Txojlus tseeb uas yog tej lus muaj hwjchim pab cov xibhwb cuav tsim rov qab los ntseeg Tswv Yexus. Peb txhua tus yuav tsum kawm Vajtswv Txojlus kom zeem paub meej cov xibhwb cuav thiab tsis txhob cia raug coj mus rau qhov yuamkev.
Thov Vajtswv,
Tus Tswv, thov pab nyuam yaus tuav kev ntseeg ruaj khov rau ntawm Tswv Yexus, pub nyuam yaus muaj tswvyim totaub Koj Txojlus. Thov coj nyuam yaus mus raws qhov tseeb, qaij deb tej lus qhia yuamkev thiab pab lwm tus ibncig rov los cuag Koj. Nyuam yaus tuav Yexus Khetos lub npe thov, Amees.
Ib tsoom cov mloog uas hmov thiab tshua,
Peb puas xub tseg sijhawm kawm Vajtswv Txojlus txhua hnub lawm tau?
Nyeem Vajluskub hauv peb lub xyoos: Loos 13
Kênh Youtube BHKTHN:
