Mathais 18:23-27
Nqe cim:
“Vajntxwv hlub tus tubtxib ntawd, ces vajntxwv txawm zam tej nqi huv tibsi rau nws thiab tso nws mus lawm.” (Mathais 18:27)
Lug nug rau sawvdaws xav:
– Tus tubtxib hauv Tswv Yexus zaj lus pivtxwv yuav raug txim licas yog hais tias nws tsis them nqi kom tas rau vajntxwv?
– Vim licas vajntxwv zam nqi rau tus tubtxib no?
– Peb kawm tau yam dabtsi txog nplooj siab zam txim dhau zaj lus no?
Tomqab uas qhia txog nplooj siab zam txim npluamias (Mathais 18:21-22), yuav kom pab tau cov thwjtim paub txog vimchiv Tswv Yexus xav kom lawv ua neej zam txim, Tswv Yexus tau piav ib zaj lus pivtxwv txog ib tug tubtxib uas tshuav vajntxwv nqi. Thaum vajntxwv hais kom nws cov nomtswv txheeb nws tej ntawv, nws pom hais tias muaj ib tug tubtxib tshuav nws nqi se lossis thau nws tej nyiaj los siv tus nqi yog “ib plhom nyiaj”, ntawd yog cov nyiaj uas ntau heev. Yog tus tubtxib them tsis taus ces nws thiab nws pojniam menyuam yuav raug muag mus ua qhev, tej uas nws muaj yuav raug sau muag huv tibsi. Tus tubtxib txawm txhos caug ntua taij thov vajntxwv ua siab ntev tomqab ntawd nws mam mus nrhiav nyiaj los them kom tas. Vajntxwv paub hais tias tej nqi no txawm tus tubtxib yuav siv zog khwv tagnrho nws tiam neej los yeej them tsis taus, vajntxwv “hlub tus tubtxib ntawd, ces vajntxwv txawm zam tej nqi huv tibsi rau nws thiab tso nws mus lawm” (nqe 27).
Dhau Tswv Yexus zaj lus pivtxwv, peb pom hais tias vimchiv vajntxwv zam txim thiab zam nqi rau tus tub txib no tsis yog vim tus tubtxib no ua zoo, vim tus tubtxib no tej lus cogtseg tsuas yog tej lus hais kom tas xwb qhov tseeb txawm nws yuav ua haujlwm nruab hnub hmo ntuj mus txog hnub tuag los yeej muaj tsis txaus nyiaj los them nqi. Vajntxwv zam txim vim thaum tus tubtxib txhos caug ntua taij thov, vajntxwv tau hlub nws, nws pojniam menyuam, tsis xav kom nws tsevneeg raug muag mus ua qhev raws li txojcai teem tseg. Ntawm no yog ib txojkev zam txim dawb dawb xwb.
Niaj hnub nimno, thaum peb nug hais tias: “Vim licas kuv yuav tsum zam txim?” peb yuav tsum nco hais tias peb kuj tau tus Tswv zam ib tswv nqi uas loj kawg nkaus li, ntawd yog tswv nqi kev txhaum. Nyob hauv Zaj Thov Tsoos, Tswv Yexus tau qhia cov thwjtim: “Thov koj zam txim rau peb ib yam li peb twb zam txim rau cov uas ua txhaum rau peb lawm” (Mathais 6:12). Yuav tsum nco ntsoov hais tias: tus Tswv tsis yog tsuas zam peb tej kev txhaum dhau los xwb, tiamsis Nws tseem pheej zam txim rau peb tamsim no thiab tseem yuav zam txim rau tej kev txhaum uas peb yuav ua yav tomntej huv tibsi yog hais tias thaum ua txhaum peb paub lees kev txhaum (I Yauhas 1:9). Txij thaum ntseeg Tswv Yexus, peb tseem pheej muaj tej yam yuamkev thiab ua txhaum rau Nws, muaj tej kev txhaum uas tej zaug peb tau ua txhaum ntau zaug lawm. Tus Tswv tseem ua siab ntev rau peb thiab Nws twb zam txim ntau zaug rau peb lawm. Tus Tswv txojkev hlub, kev ua zoo rau peb loj kawg nkaus li; vim li ntawd, Nws xav kom peb kuj hlub thiab zam txim rau peb tej kwvtij, zam txim npluamias uas tsis muaj cej ciam. Thov tus Tswv pub rau peb tsis txhob hnov qab Nws tej koob hmoov kom peb ua tau lubneej zam txim.
Thov Vajtswv,
Tus Tswv, nyuam yaus ua Koj tsaug vim tau Koj zam ib tswv nqi kev txhaum uas loj kawg nkaus li. Thov pab nyuam yaus nco Koj txiaj ntsig cawmdim kom ua tau lubneej zam txim rau lwm tus. Nyuam yaus tuav Yexus Khetos lub npe thov, Amees.
Ib tsoom cov mloog uas hmov thiab tshua,
Peb puas nco tus Tswv txiajntsig vim Nws txojkev hlub nyob mus ibtxhis hauv peb lubneej?
Nyeem Vajluskub hauv peb lub xyoos: Loos 1
Kênh Youtube BHKTHN:
