Mathais 20:25-28
Nqe cim:
“Ib yam li Neeg Leej Tub, nws los nws tsis tau kom leejtwg tu nws, tiamsis nws los tu sawvdaws thiab muab nws txojsia los txhiv ntau leej.” (Mathais 20:28)
Lug nug rau sawvdaws xav:
– Tswv Yexus qhia txog kev ntaus nqi rau tus ua haujlwm hauv Tebchaws Ceeb Tsheej txawv tus ua haujlwm sab nraud licas?
– Tswv Yexus ua qauv hauv kev ua haujlwm rau lwm tus licas?
– Peb siv zaj kawm no licas hauv kev ua haujlwm rau lwm tus?
Thaum pom cov Timthawj chim rau Yakaunpaus thiab Yauhas ob kwvtij vim nkawd thov tus Tswv pub rau zaum sab xis thiab sab laug hauv Nws lub tebchaws (Mathais 20:20-24), Tswv Yexus tau qhia txog kev ntaus nqi ntawm Tebchaws Ceeb Tsheej txawv sab nraud huv tibsi. Tus ua haujlwm rau tus Tswv tau ntaus nqi hais tias “ua tus hlob” thaum tus ntawd “ua…tus tubtxib” rau nws tej kwvtij. Qhov ntawd txawv neeg ntiajteb uas tus ua hlob yog tswv, quab yuam caij tsuj lwm tus. Lwm haivneeg tej nom thiab tej vajntxwv “muaj hwjchim loj dua cov pejxeem, thiab lawv yuam kom cov pejxeem ua raws li lawv hais.” Tus neeg ua tus Tswv haujlwm tsis quab yuam lwm tus tu lawv, tiamsis tas siab ntsws tu lwm tus zoo li ib tug tub txib, tub qhe. Tus thawjcoj sab kev ntseeg tsis siv hwjchim los tswjkav, tiamsis siv txojkev hlub thiab lubneej dawbhuv los ua qauv zoo.
Tswv Yexus tau muab ib tug qauv zoo rau tus Tswv cov menyuam kawm xyaum hauv kev tu lwm tus. Tswv Yexus los hauv ntiajteb, “nws tsis tau kom leejtwg tu nws, tiamsis nws los tu sawvdaws thiab muab nws txojsia los txhiv ntau leej” (nqe 28). Neeg Leej Tub txojkev tuag hais txog ntawm no yog ib tug yamntxwv tshwjxeeb txog kev ua haujlwm tu lwm tus los ntawm nplooj siab loj dav, Tswv Yexus tau muab Nws txojsia los theej tibneeg lub txhoj. Timthawj Paulus tau tawm lus hais tias: “peb yog nej cov tubtxib, rau qhov peb ua Yexus Khetos tes haujlwm” (II Kauleethaus 4:5). Qhia lwm tus ua haujlwm sib pab, sib hlub tiamsis tus kheej tsuas hais tsis ua ces yog neeg ntsejmuag ncaj siab nkhaus (Mathais 23:3-4). Cov ntseeg tsis txhob hais tias hlub tus Tswv tiamsis tsis ua Nws haujlwm, lossis ua tus thawjcoj tiamsis tsis yeem txhiv lwm tus.
Nyob hauv kev ua haujlwm, peb qaij tsis dhau tej kev dag ntxias thiab kev sim siab, dab Ntxwsnyoog pheej tav peb kev, ua rau peb tsav hwjchim, thiab txo peb nplooj siab ua haujlwm thiab txhiv lwm tus kom qis. Yuav kom hla dhau tej kev sim siab ntawd, peb txhua tus yuav tsum nco ntsoov hais tias Vajtswv Leej Tub yog tus muaj hwjchim, sib luag li Vaj Leej Txiv, ua ntau yam txujci thiab qhuab qhia ntau zaj, tiamsis Nws tseem txaus siab hlo ua “tus qhev” ntxuav cov thwjtim kotaw thiab tuag txhiv peb (Filipis 2:7), ces peb yog leejtwg es ho tsis txaus siab tiv dhau tej kev sim siab los ua haujlwm thiab txhiv peb tej kwvtij? Thaum txais tau tus Tswv tej koob hmoov npluamias thiab txojkev hlub uas Nws pub, peb yuav tas siab ntsws vamkhom Vaj Ntsujplig lub hwjchim ua haujlwm kub siab lug rau tus Tswv, ua haujlwm tu lwm tus raws li Tswv Yexus tus yamntxwv. Thiab peb muaj kev txhawb zog vim Tswv Yexus tau qhia hais tias thaum peb ua haujlwm tu thiab txhiv lwm tus ces yog peb tabtom ua haujlwm tu tus Tswv ntag (Mathais 25:34-46).
Thov Vajtswv,
Tus Tswv uas hlub tshua! Nyuam yaus ua Koj tsaug vim Koj tau los ntiajteb, tu thiab muab txojsia los txhiv nyuam yaus. Thov pab kom nyuamyaus muab siab npuab Koj Txoj lus, kawm raws Tswv Yexus tus qauv kom tiv dhau tej kev sim siab, ua haujlwm thiab txhiv lwm tus zoo li Koj! Nyuam yaus tuav Yexus Khetos lub npe thov, Amees.
Ib tsoom cov mloog uas hmov thiab tshua,
Peb tabtom tu thiab txhiv lwm tus zoo licas?
Nyeem Vajluskub hauv peb lub xyoos: Cov Thawjtswj 14
Kênh Youtube BHKTHN:
