Klei Aê Diê Blŭ: Y-Mathiơ 20:25-28
Êlan kliăng: “Msĕ si Anak Mnuih hriê leh amâo djŏ čiăng kơ arăng mă bruă kơ Ñu ôh, ƀiădah čiăng mă bruă kơ arăng, leh anăn jao klei hdĭp Ñu pô jing ênoh bi tui kơ lu mnuih.”” (Y-Mathiơ 20:28)
Klei êmuh ksiêm mĭn: Khua Yang Yêsu mtô si klei mdê ênoh yuôm sa čô mnuih mă bruă kơ Ƀuôn Ala Mtao Adiê hŏng phung ti êngao? Si klei Khua Yang bi hmô leh kơ klei mă bruă? Si drei mă yua klei hriăm anei hlăm klei mă bruă?
Tơdah ƀuh phung khua ƀĭng kna ăl kơ dua čô ayŏng adei Y-Yakơ leh anăn Y-Yôhan kyuadah diñu akâo kơ Khua Yang brei dôk tĭng hnuă leh anăn tĭng điâo hlăm ƀuôn ala mta Ñu (Y-Mathiơ 20:20-24), Khua Yang Yêsu mtô leh kơ hnơ̆ng ênoh yuôm ƀuôn ala mtao adiê mdê kluôm dhuôm hŏng ti êngao. Arăng yap mnuih mă bruă kơ Khua Yang “jing prŏng” tơdah pô anăn “jing dĭng buăl” kơ phung ayŏng adei pô. Bi mklăk hŏng ala ƀuôn ti êngao, mnuih jing prŏng jing pô jing khua, ktư̆ juă yua kơhưm kiă kriê mnuih mkăn. Phung mtao phung tue “khăp yua klei ktư̆ juă kiă kriê ƀuôn sang”, bi phung khua prŏng, “khăp yua klei kơhưm hĭn gĭt gai ƀuôn sang”. Phung mă bruă kơ Khua Yang amâo mgô̆ arăng mă bruă kơ pô ôh, ƀiădah hŏng jih ai tiê mă bruă kơ pô mkăn msĕ si sa čô dĭng buăl, sa čô hlŭn. Khua gĭt gai phung đăo amâo yua kơhưm kiă kriê ôh, ƀiădah yua klei khăp leh anăn knhuah hdĭp doh jăk ngă klei bi hmô.
Khua Yang Yêsu ngă klei bi hmô leh kơ phung ƀuôn sang Ñu hlăm klei mă bruă. Khua Yang trŭn hriê leh ti lăn ala, amâo djŏ čiăng kơ arăng mă bruă kơ Ñu ôh, ƀiădah čiăng mă bruă kơ arăng, leh anăn jao klei hdĭp Ñu pô jing ênoh bi tui kơ lu mnuih (êlan 28). Klei Anak Mnuih djiê hưn mdah tinei jing msĕ si sa klei bi hmô klă nik kơ ai tiê klei mĭn mă bruă bŏ hŏng klei pap, Khua Yang jao leh asei mlei Ñu pô kơ phung mnuih. Khua ƀĭng kna Y-Pôl hưn klă kyua Khua Yang Yêsu “hmei pô jing dĭng buăl diih” (II Kôrantô 4:5). Mtô lač kơ mnuih mkăn brei mă bruă, khăp bi drei pô knŏng blŭ ƀiădah amâo ngă ôh jing klei mgưt, klei luar (Y-Mathiơ 23:3-4). Phung đăo kơ Krist amâo dưi ôh lač khăp kơ Khua Yang ƀiădah amâo mă bruă ôh, amâodah jing khua kiă kriê ƀiădah amâo tŭ săn asei mlei ôh.
Hlăm klei mă bruă, drei amâo tlaih ôh mơ̆ng klei mplư leh anăn klei lông dlăng, yang jhat duah nanao hdră êlan bi kgăn, mčhur bi mđĭ drei pô, bi mtrŭn hĕ ai tiê klei mĭn drei čiăng mă bruă leh anăn săn asei mlei. Čiăng dưi găn gao klei lông dlăng anăn, brei grăp čô drei hdơr snei, Anak Aê Diê bŏ hŏng klei ktang myang, Pô mđơr hŏng Aê Diê Ama, ngă leh lu klei myang leh anăn mtô bi hriăm, ƀiădah ăt hmiêt mkăp jing “dĭng buăl” rao jơ̆ng kơ phung ƀĭng kna leh anăn săn asei mlei kơ drei mơh (Philip 2:7), snăn bi drei hlei drei jing ƀiădah amâo tŭ ư găn gao jih klei lông dlăng čiăng mă bruă leh anăn săn asei mlei kơ phung ayŏng adei drei? Tơdah thâo săng leh klei pap prŏng êlam Khua Yang leh anăn klei khăp Khua Yang brei, drei srăng jih ai tiê knang kơ klei myang Yang Mngăt Jăk čiăng hur har mă bruă kơ Khua Yang, mă bruă kơ hdơ̆ng găp tui si klei bi hmô mơ̆ng Khua Yang Yêsu. Leh anăn jing klei bi mđĭ ai êdi, kyuadah Khua Yang Yêsu mtô leh snei, tơdah drei mă bruă leh anăn săn asei mlei kơ mnuih mkăn, klei anăn jing drei dôk mă bruă kơ Khua Yang yơh (Y-Mathiơ 25:34-46).
Si drei dôk mă bruă leh anăn săn asei mlei hŏng ai tiê klei mĭn jing sa čô dĭng buăl?
Wah lač: Ơ Ama kâo khăp! Bi mni kơ Khua Yang trŭn hriê leh ti lăn ala, mă bruă leh anăn jao klei hdĭp Ih kơ kâo. Brei klei hdĭp kâo suôr tliêr hŏng Klei Aê Diê Blŭ, tui hlue klei Khua Yang bi hmô čiăng dưi găn gao jih klei lông dlăng, mă bruă leh anăn săn asei mlei hlăm ai tiê klei mĭn jing sa čô dĭng buăl msĕ si Khua Yang! Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Phung Khua Phat Kđi 14
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
