Klei Aê Diê Blŭ: II Klei Yăl dliê 28:5-8
Êlan kliăng: “Tơdah diih amâo tuôm ôh hŏng klei mkra mjuăt, msĕ si jih jang phung anak tŭ leh, snăn diih jing anak ƀă pum, amâo djŏ anak pô ôh” (Hêbrơ 12:8).
Klei êmuh ksiêm mĭn: Ya ngă Aê Diê jao Mtao Y-Ahas kơ kngan mtao Siri leh anăn mtao Israel? Bi msĕ si klei hriăm kơ klei Aê Diê rŭ ênua hlăm Klei Bi Mguôp Hđăp leh anăn Klei Bi Mguôp Mrâo? Ti klei soh hlăm klei hdĭp drei ka kmhal leh anăn ka lui ôh?
Trăn Klei Aê Diê Blŭ anei čih yăl dliê kơ klei Mtao Y-Ahas leh anăn phung Yuđa tŭ klei Aê Diê mkra mjuăt tơdah diñu lui wir Aê Diê čiăng tui hlue klei soh. Kyuadah Mtao Y-Ahas kkuh mpŭ kơ rup yang kyuanăn “Aê Diê jao ñu kơ kngan mtao Siri” brei mtao Siri bi blah dưi hŏng ñu, kahan phung Siri hriê bi blah leh anăn dưi hŏng Mtao Y-Ahas, mă ba lu phung ƀuôn sang ñu jing mnă leh anăn atăt ba digơ̆ kơ ƀuôn Damas. Wăt mtao Israel tĭng Dưr ăt kdơ̆ng ngă kơ čar Yuđa mơh leh anăn bi mdjiê lu mnuih. Knŏng hlăm sa hruê Y-Pêka, mtao Israel bi mdjiê sa êtuh dua pluh êbâo čô phung jhŏng ktang Yuđa. Phung Yuđa amâo mâo klei dưi ôh hlăm klei bi blah “kyuadah digơ̆ lui wir Yêhôwa Aê Diê phung aê digơ̆” (êlan 6). Kahan Israel bi mdjiê msă mơh sa čô anak êkei mtao, sa čô khua kahan kiă sang mtao, sa čô kơiăng Mtao Y-Ahas, leh anăn mă dua êtuh êbâo čô phung mniê wăt phung anak êkei leh anăn phung anak mniê ba jing mnă kơ čar Samari. Amâo djŏ knŏng luč liê hjăn mnuih ôh, ƀiădah čar Yuđa luč liê wăt lu mnơ̆ng mơh tơdah phung Israel “plah mă lu mnơ̆ng mơ̆ng digơ̆ leh anăn djă ba mnơ̆ng anăn kơ ƀuôn Samari.” Sĭt nik anei jing klei rai răk kơ ala čar mơ̆ng găp djuê mtao hlŏng kơ mnuih ƀuôn sang.
Hdruôm hră Klei Yăl Dliê kñăm kơ klei rŭ ênua mtam. Klei soh phung mtao leh anăn phung ƀuôn sang khăng mâo klei mkra mjuăt mtam. Aê Mtao Y-Ahas kyua ngă soh hŏng Aê Diê snăn ñu djŏ phŭng mtam. Ară anei, kyua klei soh diñu pô snăn Mtao Y-Ahas leh anăn phung Yuđa amâo mâo klei dưi ôh hlăm klei bi blah tăm – đrông, djiê mnuih luč wăt dŏ ngăn lu êbeh, anăn jing klei Aê Diê mkra mjuăt mtam. Hruê anei, kyua klei khăp leh anăn klei pap snăn Aê Diê gĭr, bi tai klei mkra mjuăt čiăng dôk guôn phung anak Ñu khăp hơiêng kmhal leh anăn lui hĕ klei soh.
Ƀiădah lĕ, kyua ƀuh Aê Diê bi tai klei mkra mjuăt kyuanăn lu mnuih ngă klei amâo uêñ, ƀrư̆ hruê ngă soh ƀrư̆ lu hĭn. Klei Aê Diê Blŭ lač, “Kyuadah Khua Yang mkra mjuăt hlei pô Ñu khăp, leh anăn čăm hŏng giê grăp čô anak Ñu jum… kyuadah hlei anak ama ñu amâo tuôm mkra mjuăt ôh? Tơdah diih amâo tuôm ôh hŏng klei mkra mjuăt, msĕ si jih jang phung anak tŭ leh, snăn diih jing anak ƀă pum, amâo djŏ anak pô ôh” (Hêbrơ 12:6-8). Tơdah drei amâo tuôm bi knal ôh kơ klei ƀuah leh anăn klei mkra mjuăt kyua klei Aê Diê khăp čiăng kơ drei đĭ hriê kơ prŏng hlăm klei doh jăk snăn răng bĕ huĭdah drei amâo jing djŏ anak Aê Diê pô ôh. Kyuanăn, jing phung anak bi tui leh hŏng êrah yuôm Yêsu Krist tuh leh ti kyâo bi kal, kmhal bă leh anăn lui hĕ mtam klei soh, tơdah hơăi, sĭt nik drei amâo srăng tlaih ôh mơ̆ng klei Aê Diê mkra mjuăt!
Si ngă drei mĭn Aê Diê srăng phưi tha mơ̆ tơdah drei ăt ngă klei soh?
Wah lač: Ơ Khua Yang, brei kâo bi knal klei Ih khăp, klei jăk leh anăn klei Ih gĭr hŏng kâo, čiăng kơ kâo thâo lui hă klei soh dôk kiă kriê hlăm klei hdĭp kâo čiăng kâo amâo mă tŭ ôh boh jhat bŏ hŏng klei ênguôt msă si Mtao Y-Ahas leh anăn phung ƀuôn sang Ih ênuk mphŭn dô. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: Klei Mmuñ Hđăp 18
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
