2 Xwmtxheej Vajntxwv 28:5-8
Nqe cim:
“Yog Vajtswv tsis qhuab ntuas nej ib yam li nws qhuab ntuas nws cov menyuam tiag, ces nej yog menyuam tsaub xwb” (Henplais 12:8)
Lus nug rau sawvdaws xav:
– Vim li cas vajntxwv Ahas thiaj raug muab cob rau vajntxwv Xilias thiab vajntxwv Yixalayees txhais tes?
– Kev kawm paub Vajtswv hauv Nws kev ua pauj ntawm phau ntawv Xwmtxheej Vajntxwv thiab tiam Vajluskub tshiab sib txawv li cas?
– Muaj tej kev txhaum twg nyob hauv peb lub neej uas tsis tau lees tawm thiab muab tso tseg?
Ntu Vajlugkub no sau txog Vajtswv kev qhuab ntuas yuav raug rau Vajntxwv Ahas thiab cov Yudas uas lawv tau tso Vajtswv tseg thiab mus caum kev txhaum. Vim Vajntxwv Ahas pe dab pe mlom, Vajtswv thiaj cia cov Xilias tus vajntxwv tuaj tua yeej Ahas thiab ntes cov Yudas coob heev coj mus rau pem lub nroog Damaxes. Tus TSWV tseem cia cov Yixalayees tus Vajntxwv Pekas uas yog Lemaliyas tus tub tuaj tua yeej Ahas, thiab hnub ntawd cov tubrog Yudas uas siab tawv raug tua tuag ib puas nees nkaum txhiab leej. Vimchiv uas cov Yudas kov tsis yeej “rau qhov lawv tau tso Vajtswv tseg lawm” (nqe 6). Cov Yixalayees tseem tua Vajntxwv Ahas tus tub Ma-axeyas tuag, Axelikas uas yog tus nomtswv saib lub loog, thiab Ekanas uas yog tus thawj tubrog ntawm vajntxwv, thiab lawv tseem ntes cov Yudas ob puas txhiab leej pojniam thiab menyuam nrog rau ntau yam khoom coj mus rau pem lub nroog Xamalis lawm. Yog ib txoj kev puastsuaj loj uas poob teb poob chaw, poob vaj poob tsev, raug tua tsis hais vajntxwv tus tub mus txog tus pejxeem.
Phau ntawv xwmtxheej Vajntxwv qhia meej Vajtswv kev ua pauj los sai heev. Vajtswv rau txim rau cov vajntxwv thiab cov pejxeem uas pheej ua txhaum tamsim ntawd kiag. Vajntxwv Ahas yawg, vim ua txhaum rau Vajtswv, nws thiaj li mob ruas tamsim. Thiab lub sijhawm no, vim vajntxwv Ahas thiab tej pejxeem kev txhaum lawv thiaj li swb kev ua tsov ua rog ua ntu zus, poob tibneeg thiab khoom qhov txhia chaw ntau kawg li, ntawd yog Vajtswv kev qhuab ntuas lawv tamsim. Niaj hnub nimno, Vajtswv ua siab ntev, hlub tshua Nws tsis rau txim sai sai tiamsis nyob tos txhua tus uas Nws hlub tig los lees txim thiab tso kev txhaum tseg.
Tiamsim, vim pom hais tias Vajtswv yuav rau txim qeeb, ntau tus tsis muaj lub siab ntshai thiab yim hnub yim ua txhaum loj heev dua. Vajtswv Txojlus qhia hais tias, “Rau qhov tus Tswv qhuab ntuas txhua tus uas nws hlub, thiab nws nplawm txhua tus uas nws coj los ua nws tub…Yeej tsis muaj ib tug menyuam uas leej txiv yuav tsis tau qhuab ntuas li. Yog Vajtswv tsis qhuab ntuas nej ib yam li nws qhuab ntuas nws cov menyuam tiag, ces nej yog menyuam tsaub xwb” (Henplais 12:6-8). Yog peb tsis tau paub txog Vajtswv kev qhuab ntuas, kev nplawm vim Nws kev hlub kom peb loj hlob hauv lub neej dawbhuv ces ceevfaj ntshai peb tsis yog Vajtswv tus menyuam tseeb. Yog li ntawd, txhua tus uas tau Tswv Yexus muab Nws cov ntshav yuav los lawm, yog ua txhaum cia li lees kev txhaum thiab tso kev txhaum tseg kiag tamsid, yog tsis ua li ntawd yeej yuav khiav tsis dim Vajtswv kev rau txim.
Thov Vajtswv:
Tus Tswv, thov pab kom nyuam yaus zeem paub Koj txoj kev hlub, kev ua siab ntev rau nyuam yaus, kom nyuam yaus paub tso tej kev txhaum uas tseem muaj nyob hauv nyuam yaus lub neej tseg, thiaj li yuav tsis raug kev mob siab uas zoo li Vajntxwv A-has thiab nws cov pejxeem hnub thaud. Nyuam yaus tuav Cawmseej Tswv Yexus lub npe thov, Amees.
Ib tsoom mloog uas hmoov tshua,
Peb puas xav hais tias Vajtswv yuav tso dhau tej kev txhaum uas peb txeev ua?
Nyeem Vajluskub hauv peb lub xyoos: Phau Ntawv Nkauj 18
Kênh Youtube BHKTHN:
