Klei Aê Diê Blŭ: Rôm 9:6-13
Êlan kliăng: “Lač snăn, amâo djŏ ôh klei Aê Diê blŭ jing hơăi mang. Kyuadah jih jang kbiă hriê mơ̆ng phung Israel amâo jing phung Israel sĭt ôh.” (Rôm 9:6)
Klei êmuh ksiêm mĭn: Ya mta atur phŭn Khua ƀĭng kna Y-Pôl hưn mdah hlăm êlan 6? Si klei ruah dưi jing phung găp djuê Aê Diê sĭt? Ya klei yuôm kơ drei mơ̆ng klei hriăm anei?
Khua ƀĭng kna Y-Pôl hưn mdah atur phŭn jing Klei Aê Diê Blŭ amâo djŏ jing hơăi mang ôh. Klei Blŭ mơ̆ng Aê Diê mâo klei kñăm čiăng leh anăn sĭt nik srăng bi sĭt sơăi. Klei Aê Diê Blŭ tinei jing klei ƀuăn hlăm klei bi mguôp kơ Y-Abraham leh anăn găp djuê ñu. Jih jang phung mnuih kkiêng mơ̆ng djuê ana Y-Yakôp mâo djuê Israel leh anăn jih jang găp djuê Israel mâo klei iêô jing phung găp djuê Aê Diê ruah. Ƀiădah êlan 6 brei thâo jih jang mnuih mơ̆ng djuê ana Israel, čiăng lač kbiă hriê mơ̆ng Y-Yakôp “amâo jing phung Israel sĭt ôh”. Pruê̆ blŭ “phung Israel” ti tuč êlan 6 čiăng lač anei jing phung găp djuê Aê Diê ruah sĭt, diñu amâo djŏ knŏng jing phung kbiă hriê mơ̆ng djuê ana Israel hlăm kđeh, ƀiădah wăt hlăm klei đăo kơ Aê Diê, msĕ si phung aê đưm diñu Y-Abraham, Y-Isăk leh anăn Y-Yakôp. Snăn, knŏng hjăn kđeh êrah jing phung Israel ka mâo klei rơ̆ng ôh jing găp djuê Aê Diê leh anăn amâo dưi dưn klei Aê Diê ƀuăn pioh kơ phung găp djuê Aê Diê ruah sĭt ôh.
Čiăng bi klă mngač hĭn klei anei, Khua ƀĭng kna Y-Pôl lŏ mñă wĭt klei Aê Diê ƀuăn kơ phung aê đưm Y-Abraham leh anăn djuê ana ñu. Amâo djŏ phung anak tui si kđeh jing anak Aê Diê, ƀiădah phung anak tui si klei Aê Diê ƀuăn kơh dưi yap jing djuê ana Y-Abraham. Hlăm sapăn čô anak êkei Y-Abraham (Klei Mphŭn Dơ̆ng 25:1-2, 9), Y-Isăk Aê Diê ruah. Dơ̆ng mơ̆ng Y-Isăk yơh aê đưm Y-Abraham mâo sa găp djuê iêô hŏng anăn ñu, bi phung anak ñu mâo hŏng H’Agar dĭng buăl mniê, leh anăn hŏng mô̆ dua ñu H’Kêtura amâo yap jing găp djuê tui si klei buăn ôh (êlan 7-8). Leh anăn hlăm dua čô anak êkei ƀă kmar mơ̆ng Y-Isăk hŏng H’Rêƀêka, Aê Diê ruah leh Y-Yakôp lŏ čuê găp djuê klei đăo. Dơ̆ng mơ̆ng êjai H’Rêƀêka adôk ba tian, Aê Diê brei gơ̆ thâo leh “Ayŏng srăng jing dĭng buăl kơ adei”. Klei ruah anei amâo kna ti bruă ngă ôh, ƀiădah tui si klei pap Pô iêô. “Kâo khăp leh kơ Y-Yakôp, ƀiădah kâo bi êmut leh kơ Y-Êsâo” (êlan 12-13; Y-Malaki 1:2-3). “Khăp” tinei čiăng lač Aê Diê ruah Y-Yakôp, leh anăn “bi êmut” čiăng lač Aê Diê amâo ruah Y-Êsâo ôh.
Aê Diê kiă kriê jih jang mnơ̆ng, Ñu mâo klei dưi kluôm dhuôm ruah phung găp djuê tui si klei pap Ñu. Drei knŏng thâo đăo knang khut khat kơ klei kpă ênô, klei thâo mĭn leh anăn klei jăk Khua Yang yơh. Bi mni kơ Khua Yang êdimima kyuadah Ñu ruah leh drei mơ̆ng krah jih jang găp djuê mnuih brei jing anak Ñu! Drei dưi dôk hlăm găp djuê prŏng Khua Yang, jing phung dưn ngăn mbĭt hŏng Anak Ñu khăp êdimi jing Khua Yang Yêsu Pô Bi Mtlaih, brei drei hdĭp năng hŏng anôk jing drei Khua Yang ruah leh.
Si ngă drei thâo mơ̆ Aê Diê ruah leh drei?
Wah lač: Ơ Aê Diê, Pô bŏ hŏng klei khăp klei pap ruah leh kâo brei jing găp djuê Aê Diê ruah, amâo kna ti djuê ana tui si kđeh amâodah bruă kâo ngă ôh. Akâo Ih đru kâo hdĭp djŏ hŏng anôk jing sa čô mnuih mâo kkiêng mrâo mơ̆ng găp djuê klei đăo hlăm Khua Yang Yêsu Pô Bi Mtlaih. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y-Yôsuê 20
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
