Loos 9:6-13
Nqe cim:
“Kuv tsis tau hais tias Vajtswv tsis ua raws li Vajtswv tej lus cog tseg; rau qhov Vajtswv tsis xaiv cov Yixalayees txhua tus los ua Vajtswv haivneeg” (Loos 9:6)
Lus nug rau sawvdaws xav:
– Timthawj Paulus qhia tawm lub plag twg hauv nqe 6?
– Vajtswv haivneeg tau xaiv li cas los?
– Zaj kawm muaj nqis li cas rau peb?
Timthawj Paulus qhia tawm lub plag tseem ceeb yog Vajtswv Txojlus muaj nqis. Vajtswv Txojlus uas hais tawm lawm txhua lo yuavtsum muaj homphiaj thiab tej ntawd yeej yuav muaj tiav tseeb li tau hais. Vajtswv Txojlus ntawd yog lolus cogtseg rau Anplahas thiab nws cajces. Txhua tus uas yug los ntawm Yakhauj cajces puavleej hu ua Yixalayees, thiab tagnrog haivneeg Yixlayees tau hu ua haiv neeg uas Vajtswv xaiv. Tiamsis nqe 6 qhia hais tias txhua tus uas los ntawm Yixalayees cajces, yug ntawm Yakhauj los, “Vajtswv tsis xaiv cov Yixalayees txhua tus los ua Vajtswv haivneeg” Lolus “Vajtswv haivneeg” yog haivneeg uas tau Vajtswv xaiv tiag tiag, lawv tsis yog haivneeg uas yug los ntawm sab nqaij tawv cajces Yixalayees xwb tiamsis tseem yog cov uas yug los ntawm kev ntseeg hauv Vajtswv thiab, zoo ib yam li yawgkoob Anplahas, Ixaj, Yakhauj. Yog li ntawd, tsuas muaj roj ntshav Yixalayees xwb, ces tsis tabpov yuav yog Vajtswv tsevneeg thiab yuav tsis tau txais yam uas Vajtswv coglus tseg rau haivneeg tau xaiv lawm.
Kom paub meej qhov no, Timthawj Paulus rov tshawb txog Vajtswv lolus cogtseg rau Anplahas thiab nws cajceg. Cov menyuam ntawm nqaij tawv tsis yog Vajtswv menyuam, tiamsis yog cov menyuam uas nyob hauv Vajtswv kev cogtseg thiaj yog Anplahas cajces. Ntawm Anplahas yim tus tub (Chivkeeb 25:1-2, 9), Ixaj tau Vajtswv xaiv. Los ntawm Ixaj, Anplahas thiaj muaj ib cajces hu raws nws lub npe, tiamsis Hankas thiab Ketulas cov menyuam tsis tau hu ua cajces hauv kev coglus (nqe 7-8). Tom qab ntawd, hauv Ixaj thiab Lenpekas ob tug tub ntxaib, Vajtswv xaiv Yakhauj los sawv chaw txuas ntxiv rau cajceg kev ntseeg. Thaum Lenpekas tseem suab menyuam hauv plab, Vajtswv tau qhia paub hais tias, “tus hlob yuav ua tus yau qhev” Qhov kev xaiv no tsis yog los ntawm kev ua haujlwm zoo tiamsis yog nyob ntawm Vajtswv kev hlub, raws li Vajtswv txojlus hais tias “kuv hlub Yakhauj, tiamsis kuv ntxub Exaus.” “(nqe 12-13; Malakis 1:2-3). “Hlub” txhais hais tias Vajtswv xaiv Yakhauj, thiab “ntxub” txhais tias Vajtswv tsis xaiv Exaus.
Vajtswv yog tus tswj kav ib puas tsav yam, Nws muaj cai xaiv Nws haivneeg raws li Nws txoj kev hlub. Peb tsuas paub ntseeg thiab tso siab plhuav rau Vajtswv txoj kev xaiv ncaj ncees, txawjntse thiab muaj kev hlub. Ua Vajtswv tsaug, vim Nws tau xaiv peb tawm ntawm txhua haiv neeg los ua Nws cov menyuam! Peb tau nyob hauv Vajtswv tsev neeg, thiab yuav koom nrog Yexus Khetos tau txais tej uas Vajtswv coglus lawm. Yog li ntawd, peb yuavtsum ua neej kom tsimnyog qhov uas Vajtswv tau xaiv peb lawm.
Thov Vajtswv:
Vajswv, tus uas muaj kev hlub, ua tsaug uas Koj tau xaiv nyuamyaus los ua Koj haivneeg, tsis yog vim cajceg roj ntshav lossis tes haujlwm ua, tiamsis vim Koj txoj kev hlub xwb. Thov pab nyuam yaus ua neej kom tsimnyog yog Koj ib tug menyuam, uas tau yug dua tshiab hauv cajceg kev ntseeg Tswv Yexus. Nyuam yaus tuav Tswv Yexus Khetos lub npe thov, Amees.
Ib tsoom mloog uas hmov tshua,
Koj puas zeem pom hais tias Vajtswv twb xaiv koj lawm?
Nyeem Vajluskub hauv peb lub xyoos: Yausuas 20
Kênh Youtube BHKTHN:
