Klei Aê Diê Blŭ: Y-Mathiơ 18:1-4
Êlan kliăng: “…Ƀiădah amâo djŏ snăn ôh ti krah diih, hlei pô čiăng jing prŏng hlăm phung diih, brei ñu jing dĭng buăl diih. Leh anăn hlei pô čiăng jing mrô sa hlăm phung diih, brei ñu jing hlŭn kơ jih jang” (Y-Markôs 10:43-44)
Klei êmuh ksiêm mĭn: Ya ngă phung ƀĭng kna êmuh Khua Yang hlei pô jing prŏng hĭn hlăm Ƀuôn Ala Mtao Adiê? Si Khua Yang wĭt lač kơ phung ƀĭng kna? Si ngă čiăng dưi mă bruă hlăm ai tiê jing dĭng buăl?
Tơdah nao ti ƀuôn prŏng Kapernum phung ƀĭng kna êmuh Khua Yang, “Hlei pô jing prŏng hĭn hlăm ƀuôn ala mtao adiê?” Dlăng Y-Luk 9:46 leh anăn Y-Markôs 9:34 drei thâo diñu dôk bi tăng kơ bruă anei snăn diñu akâo kơ Khua Yang mâo klei blŭ. Ya ngă phung ƀĭng kna mđing hlei pô srăng jing prŏng hĭn? Kyua tơdah Khua Yang Yêsu hưn êlâo kơ klei Ñu Tŭ knap mñai leh anăn Kbiă lŏ hdĭp, diñu amâo thâo săng ôh anăn mphŭn bi mĭn kơ kơhưm kơ pô leh Khua Yang mkŏ mjing ƀuôn ala mtao Ñu ti lăn, leh anăn grăp čô čiăng kơ pô srăng mâo anôk kdlưn hĭn sơăi.
Khua Yang Yêsu mdơ̆ng sa čô hđeh dôk ti krah diñu čiăng bi hmô klă mngač kơ phung ƀĭng kna, Khua Yang lač kơ diñu brei “bi mlih” msĕ si hđeh, jing brei Khua Yang bi mlih knuih leh anăn klei čang hmăng diñu tơdah tui hlue Khua Yang. Knuih phung hđeh jing jăk, jưh kơ pô mkăn, čiăng klei đru, đăo knang, luă gŭ, amâo mâo klei čiăng lu ôh… Khua Yang bi mklă hŏng phung ƀĭng kna tơdah luă gŭ msĕ si hđeh anei snăn srăng jing pô prŏng hĭn hlăm Ƀuôn ala mtao adiê, Ñu ăt hưn brei răng tơdah diñu amâo hdĭp leh anăn mă bruă hŏng knuih msĕ si hđeh, diñu srăng amâo dưi mŭt hlăm Ƀuôn ala mtao adiê ôh. Khua Yang Yêsu čiăng mtô kơ klei soh phung ƀĭng kna tơdah diñu amâo mă bruă hlăm ai tiê jing dĭng buăl msĕ si Khua Yang (Y-Markôs 10:45) ƀiădah lŏ tĭng yap msĕ si mnuih hlăm lăn ala anei, čiăng mâo klei dưi, atăt kơ klei bi lông ktưn hlei kdlưn hĭn. Diñu amâo lŏ mpŭ kơ Aê Diê ôh ƀiădah mđĭ kơ pô, klei anei ba klei amâo jăk jing bi tăng mgăl, mbha êpul, bi kah mbha leh anăn bi êka phung mkăn.
Hruê anei, ăt ênưih kơ drei dôk tui hlue Khua Yang ƀiădah ăt tĭng yap, klei bi mmiă hmăi djŏ, drei knŏng čiăng “jing prŏng hĭn” hlăm êpul phung đăo pô. Klei Aê Diê Blŭ mñă ala ƀuôn anak mnuih dlăng myuôm gưl mnuih mdrŏng ƀun, ƀiădah gưl mnuih mdrŏng ƀun amâo mâo anôk hlăm ênoh čuăn Khua Yang Yêsu ôh. Hlei pô mđing kơ kơhưm hlăm Sang Aê Diê srăng hdĭp mgao, čuôt klih leh anăn duah mă klei tŭ kơ pô, knŏng bi mguôp hŏng hlei phung ba klei tŭ dưn kơ pô đuč. Grăp čô drei brei bi tuôm hŏng Khua Yang leh anăn brei Ñu lŏ bi hdĭp, bi mlih knuih. Brei drei thâo pô êdu awăt, soh jhat, điêt dhiêt leh anăn năng tŭ klei bi kmhal lă lar. Tơdah thâo snăn drei ƀrư̆ hdơr knga kơ Khua Yang leh anăn hdĭp luă gŭ hŏng phung riêng gah čiăng dưi bi ti gŭ pô, săn asei mă bruă kơ pô mkăn hlăm ai tiê jing dĭng buăl msĕ si Khua Yang Yêsu. Knŏng tơdah drei jing dĭng buăl mă bruă ti lăn ala anei, drei srăng jing “prŏng hĭn hlăm Ƀuôn ala mtao adiê”.
Drei čiăng pô prŏng hĭn ti lăn amâodah prŏng hĭn hlăm Ƀuôn ala mtao adiê?
Wah lač: Ơ Khua Yang Yêsu, akâo kơ Ih đru kâo ƀuh klei Ih bi ti gŭ pô mă bruă čiăng kâo jing sa čô luă gŭ jing dĭng buăl mă bruă kơ phung Khua Yang dưm dŭm dar kâo. Akâo kơ Khua Yang đru kâo mđing kơ klei mưn hlăm adiê đăm duah ôh klei mưn ti lăn ala anei. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y-Yôhan 1
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
