Klei Aê Diê Blŭ: Y-Mathiơ 17:24-27
Êlan kliăng: “Snăn thâodah diih ƀơ̆ng huă mnăm, amâodah ya klei diih ngă, ngă bĕ jih čiăng bi guh kơang kơ Aê Diê. Đăm bi têč hnêč ôh kơ phung Yuđa, kơ phung Grĕk, amâodah kơ Phung Sang Aê Diê” (I Kôrantô 10:31-32)
Klei êmuh ksiêm mĭn: Ya klei pô rĭng jia Sang kkuh mpŭ êmuh leh Khua ƀĭng kna Y-Pêtrôs? Si Khua Yang Yêsu mblang kơ Khua ƀĭng kna Y-Pêtrôs kơ bruă tuh jia Sang Kkuh Mpŭ? Phung đăo hdĭp bi leh bruă klam hŏng ala ƀuôn leh anăn amâo bi têč hnêč kơ pô mkăn ôh snăn ya srăng mâo?
Jia Sang kkuh ppŭ jing mta jia bruă sang čư̆ êa Rôm brei phung Yuđa hrui mă čiăng yua kơ bruă ngă leh anăn mkra mđĭ Sang kkuh mpŭ Yêrusalem. Hlăm Klei Kbiă 30:11-16, Aê Diê kčah grăp thŭn grăp čô êkei mơ̆ng 20 thŭn brei tuh jia mkrah sêkel čiăng yua hlăm bruă sang čhiăm. Hjăn wưng phung ƀuôn sang Israel mơ̆ng anôk jing hlŭn lŏ wĭt, klei hdĭp dôk dleh dlan anăn Y-Nêhêmi kčah knŏng hrui mă sa kdrêč tlâo sêkel grăp thŭn kơ bruă Sang kkuh mpŭ kơ Aê Diê (Y-Nêhêmi 10:32).
Hlăm ênuk Khua Yang Yêsu, phung êkei Yuđa mơ̆ng dua pluh thŭn kơ dlông srăng mâo bruă klam tuh jia Sang kkuh mpŭ, kyua anăn tơdah hmư̆ klei êmuh Khua Yang Yêsu tuh jia mơ̆, Khua ƀĭng kna Y-Pêtrôs wĭt lač brei kơ Khua Yang jing “Ơ̆”. Tơdah mŭt hlăm sang, Khua Yang êmuh Khua ƀĭng kna Y-Pêtrôs, “Ya ih mĭn, Ơ Y-Simôn? Mơ̆ng hlei pô phung mtao ti lăn ala rĭng jia? Mơ̆ng phung anak diñu amâodah mơ̆ng phung mkăn?” Ñu wĭt lač, “Mơ̆ng phung mkăn”. Klei Khua Yang Yêsu blŭ, “Snăn phung anak tlaih tuh jia” čiăng lač Ñu jing Anak Aê Diê, hlue si klei hdĭp anak mnuih snăn Ñu amâo guôn tuh jia ôh. Ƀiădah kyua amâo čiăng bi hmô jhat kơ phung mkăn leh anăn ăt kăn čiăng pô jing klei ktrŏ kơ Khua ƀĭng kna Y-Pêtrôs anăn Khua Yang Yêsu brei ñu nao wah kan hlăm êa ksĭ, leh anăn hlăm ƀăng êgei kan djŏ wah tal êlâo srăng ƀuh sa asăr prăk ênoh dưi tuh jia djăp kơ Khua Yang leh anăn ñu. Klei Khua Yang mtă myang snăk ƀiădah tơdah Khua ƀĭng kna Y-Pêtrôs đăo knang, gưt asăp, Khua Yang ngă leh klei ñu čiăng, “tuh brei jia kơ kâo leh anăn kơ ih pô”
Mơ̆ng klei mblang mơ̆ng Khua Yang Yêsu kơ Khua ƀĭng kna Y-Pêtrôs, drei ƀuh Khua Yang mâo klei dưi hngah kơ bruă tuh jia Sang kkuh mpŭ kyua Ñu jing Anak Aê Diê ƀiădah Ñu bi hmô kơ drei hlăm bruă bi leh djăp bruă hŏng Aê Diê leh anăn boh nik amâo bi têč hnêč ôh kơ pô mkăn. Phung đăo hruê anei, brei bi leh bruă klam jing mnuih ƀuôn sang hŏng ala ƀuôn drei dôk hdĭp, tuh jia djăp ênŭm wăt tơdah drei dưi bi mtlaih leh leh anăn jing mnuih ƀuôn sang Lăn Adiê. Drei amâo bi hmô soh ôh hlăm bruă hlue ngă bruă klam sa čô mnuih ƀuôn sang lăn čar drei dôk hdĭp, amâo dưi ôh mă mta phŭn “amâo tŭ jing”, “luč liê mang”, “amâo djŏ guôp”… čiăng hngah tuh jia kdrêč pô. Tơdah hdĭp bi leh bruă klam hŏng ala ƀuôn leh anăn amâo bi têč hnêč ôh kơ pô mkăn, drei srăng dưi mpŭ leh anăn amâo mâo phung ti êngao blŭ jhat amâodah čhuai ôh.
Drei tuôm ñĕ amâodah amâo bi leh bruă klam tuh tia mơ̆?
Wah lač: Ơ Khua Yang, akâo kơ Ih đru kâo hdĭp bi hmô jăk, bi leh bruă klam hŏng ala ƀuôn, boh nik tuh jia djăp ênŭm čiăng kâo amâo bi têč hnêč ôh kơ pô mkăn leh anăn amâo ngă kơ arăng bi čhŏ Anăn Aê Diê ôh. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Klei Mtô Mñă Klei Bhiăn 34
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
