Pajlug 4:11-19
Nqe cim:
“Kuv tau qhia tswvyim rau koj thiab coj koj ua neej rau txojkev ncaj ncees.” (Pajlug 4:11).
Lus nug rau sawvdaws xav:
– Vajntxwv Xalumoos qhia yam dabtsi rau menyuam hais txog ob txojkev ua neej?
– Qhov kawg ntawm ob txojkev ntawd yog dabtsi?
– Vim li cas niamtxiv yuav tsum qhia menyuam paub txojkev txawj ntse thiab kev phem qias?
Vajntxwv Xalumoos qhia nws cov menyuam hais txog qhov sib txawv ntawm ob txojkev ncaj ncees thiab kev phem qias (nqe 11-15), thiab nqi zog ntawm qhov uas xaiv sib txawv (nqe 18-19).
Thawj txojkev yog txojkev txawj ntse, kev ncaj ncees. Xalumoos qhia menyuam ua neej thaum lawv tseem yau xws li nws hais: “Qhia menyuam kom paub ua nws lub neej, nws yuav nco ntsoov tej lus ntawd mus tas nws sim neej.” (Pajlug 22:6). Txojkev txawj ntse, ua rau menyuam “mus” tsis nres tiamsis mus khov khov. Lo lus “dhia” hais txog ib ntu sijhawm tshiab ntawm tus menyuam thaum nws mus tau khov. Menyuam “yuav tsis qaug”, tsis yog yuav tsum tiv kev mob, kev nyuaj vim tus menyuam twb paub thiab swm txojkev lawm. Xalumoos qhia menyuam taug txojkev ncaj ncees txawm yog nyuaj, khwv los thaum kawg txojkev no yuav yog txojsia tshiab zoo li lub hnub ci tuaj. Yog li ntawd, “koj tej kev kawm txawj kawm ntse… cia li ceev nws kom zoo.” (nqe 13).
Txojkev thib ob yog txojkev ua phem ua qias, menyuam yuav tsum qaij deb vim yuav coj menyuam mus poob rau kev txhaum. Cov neeg ua phem ua qias txaus siab rau tej kev txhaum uas lawv ua. Kub siab lug ua qhov phem, txaus siab hlo ua neeg phem mus. Cov neeg taug txojkev ua phem uas qias yuav log hauv txojkev txhaum tawm tsis tau, tsis paub kev tawm los. Cov neeg phem txojkev tsaus ntuj nti, mus zuj zus rau txojkev puastsuaj, yog li menyuam yuav tsum txiav tu nrho “tsis txhob mus… tsis txhob xyaum ua raws li tej neeg siab phem tus yamntxwv. Tsis txhob ua phem ua qias hlo li! Cia li khiav kom dhau txojkev phem qias ntawd!” (nqe 14-15).
Qhov kawg ntawm ob txojkev nws txawv. Qhov kawg ntawm cov neeg ncaj ncees yog txojsia ntev dhawv mus ibtxhis, ci ntsa iab zoo ib yam li lub hnub ci tuaj thaum tav su, tiamsis qhov kawg ntawm cov neeg phem qias yog lub txim nyob ibtxhis hauv qhov chaw tsaus ntuj. Yog niamtxiv tsis qhia cov menyuam, neeg ntiajteb yuav qhia thiab ntxias menyuam mus noj tej mov ua phem ua qias, haus cov cawv ua nruj ua tsiv (nqe 17). Qhov uas mob siab tshaj yog lawv tsis paub tias lawv qaug zog thaum twg los (nqe 19), ua li ntawd yuav ua li cas hloov tau tshiab; menyuam lub neej puas ib tiam dhau ib tiam, log tob rau hauv txojkev txhaum. Yog peb tsis qhia menyuam thaum nws nyuam qhuav paub mus kev, paub dhia, ces cov menyuam yeej tsis paub xaiv txojkev txawj ntse taug thaum nws loj hlob tuaj li. Tswv Yexus hais tias: “Kuv yog txojkev, yog qhov tseeb thiab yog txojsia; tsis muaj leejtwg mus cuag tau Leej Txiv, tsuas yog mus ntawm kuv mus xwb thiaj tau.” (Yauhas 14:6). Niamtxiv yuav tsum kawm Vajntxwv Xalumoos tus qauv qhia menyuam no los qhia menyuam kom paub xaiv taug txojkev uas coj mus tau txojsia, yog txojkev mus cuag tau Vajtswv. Tswv Yexus yog txojkev, yog qhov tseeb thiab yog txojsia.
Thov Vajtswv,
Nyuam yaus tus Tswv, ua tsaug uas Koj pub rau nyuam yaus taug txojkev ciaj sia. Thov Koj pab kom nyuam yaus hmov tshua txog kev qhia menyuam, thov Koj pub rau nyuam yaus zeem paub thiab xaiv txojkev tau txojsia. Nyuam yaus tuav Tswv Yexus lub npe thov, Amees.
Ib tsoom mloog uas hmov thiab tshua,
Peb twb qhia menyuam taug txojkev ncaj ncees kom tau txojkev zoo siab txaus nkaus hauv kev ua neej thiab tau txojsia lawm tau? Yog menyuam, peb twb mloog niamtxiv tej lus qhia thiab taug tus Tswv txojkev ncaj ncees lawm los tsis tau?
Nyeem Vajluskub hauv peb lub xyoo: Teev Npe 8
Kênh Youtube BHKTHN:
