Klei Aê Diê Blŭ: Y-Yôsuê 3:6-17
Êlan kliăng: “Ƀiădah Yêsu lač, “Jăk mơak hĭn phung dôk hmư̆ leh anăn djă pioh gưt klei Aê Diê blŭ.”” (Y-Luk 11:28)
Klei êmuh ksiêm mĭn: Ya klei Aê Diê lač kơ Y-Yôsuê? Ya klei Y-Yôsuê brei phung ƀuôn sang ngă êlâo kơ găn êa krông? Ya jing boh kơ klei ngă anăn? Si drei srăng yua sĭt klei hriăm anei hlăm klei hdĭp tui hlue Khua Yang?
Êlâo kơ găn êa krông Yurdan, Aê Diê ƀuăn kơ Y-Yôsuê, Ñu srăng dôk mbĭt hŏng gơ̆ msĕ si Ñu dôk mbĭt leh hŏng Y-Môis. Aê Diê brei gơ̆ mtă kơ phung khua ngă yang tơdah digơ̆ truh ti hang êa krông Yurdan brei digơ̆ dôk dơ̆ng mjưh hlăm êa krông êjai kkung hip klei bi mguôp ti mra tơl mâo klei mtă mrâo mơ̆ng Aê Diê.
Y-Yôsuê iêô mtam phung ƀuôn sang hriê giăm hmư̆ ñu hưn klei Aê Diê blŭ. Ñu lač Aê Diê srăng atăt digơ̆ găn êa krông Yurdan, leh anăn hip klei bi mguôp bi hmô kơ klei Aê Diê dôk mbĭt srăng nao êlâo ti anăp digơ̆. Hŏng klei anăn digơ̆ srăng thâo Aê Diê Pô hdĭp hlŏng lar dôk ti krah digơ̆ leh anăn Ñu srăng suôt ti anăp digơ̆ jih jang phung găp djuê tue dôk leh hlăm Čar Aê Diê Ƀuăn. Brei digơ̆ mă pluh dua čô êkei mơ̆ng phung găp djuê Israel. Ñu brei thâo msĕ mơh tơdah plă jơ̆ng phung khua ngă yang kkung hip klei bi mguôp juă hlăm êa, êa srăng dôk hĕ, amâo lŏ đoh ôh, êa mơ̆ng akŏ dôk mkăm sa anôk čiăng kơ digơ̆ găn. Phung ƀuôn sang gưt mtam kơ jih jang klei Aê Diê mtă, digơ̆ ruh sang čhiăm čiăng găn êa mbĭt hŏng phung khua ngă yang kkung hip klei bi mguôp nao êlâo ti anăp digơ̆. Digơ̆ êbat nao hŏng klei gưt asăp wăt tơdah anei jing yan êa krông Yurdan đĭ dlai hang. Phung ƀuôn sang Aê Diê êbat nao hŏng klei đăo kyuadah digơ̆ đăo sĭt nik kơ Aê Diê Pô dôk hdĭp hlŏng lar srăng dôk mbĭt hŏng digơ̆, atăt êlan leh anăn brei kơ digơ̆ klei dưi. Tơdah jơ̆ng phung khua ngă yang êbat hŏng klei đăo leh anăn klei gưt asăp juă ti êa, êa đoh mơ̆ng akŏ dôk hĕ mtam leh anăn đĭ mkăm sa anôk. Phung ƀuôn sang găn ti lăn thu êjai phung khua ngă yang kkung hip klei bi mguôp dôk dơ̆ng ti lăn thu ti krah êa krông Yurdan.
Phung Israel dưi ƀuh klei bi knăl mdê Aê Diê ngă leh kyua klei digơ̆ gưt asăp. Êlâo găn êa krông, digơ̆ “hriê tinei leh anăn hmư̆ klei Yêhôwa Aê Diê blŭ”. Digơ̆ amâo ngă tui si klei mĭn digơ̆ pô ôh, amâo mâo klei lŏ êmuh kăn đing rei, knŏng đăo leh anăn gưt asăp kơ Aê Diê. Anei jing klei yuôm bhăn tal êlâo hlăm lu klei yuôm bhăn mkăn digơ̆ srăng ƀuh êdei anăp tơdah digơ̆ ăt gưt asăp kơ Aê Diê.
Jing phung đăo kơ Krist, brei đăo leh anăn gưt asăp kơ Aê Diê êlâo hĭn wăt tơdah drei ƀuh mâo klei dleh jing dleh snăk. Tăp năng mâo klei mplư brei drei ngă ya klei drei ƀuh jing ênưih amâo djŏ ngă jih tui si klei Khua Yang čiăng ôh. Tăp năng drei mâo klei lŏ êmuh amâo tui ngă ôh jih jang klei Ñu atăt gai, amâo jhŏng êbat nao hŏng klei đăo ôh, kăn jhŏng lui ya mnơ̆ng pô mâo čiăng juă jơ̆ng ti êa rei. Akâo Khua Yang đru drei tui hriăm klei đăo leh anăn klei gưt asăp mơ̆ng phung Israel leh anăn phung khua ngă yang bi hmô leh mphŭn dô, kăp “hriê giăm leh anăn hmư̆ klei Aê Diê blŭ” čiăng thâo si klei Aê Diê čiăng leh anăn hlue ngă, sĭt nik drei srăng ƀuh jih jang bruă yuôm bhăn Aê Diê ngă hlăm klei hdĭp drei.
Drei ƀuh hlăm ya anôk hlăm klei hdĭp drei, drei ka gưt asăp ôh kơ Khua Yang?
Wah lač: Ơ Khua Yang, đru kâo gưt asăp kơ Ih nanao hlăm jih jang klei truh. Đru kâo hriê giăm Ih leh anăn hmư̆ Klei Ih Blŭ čiăng hlue ngă, čiăng kơ kâo dưi ƀuh klei Ih dôk mbĭt, atăt ba leh anăn đru hlăm klei hdĭp kâo. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: Klei Bi Êdah 6
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
