Philemoos 1:8-21
Nqe cim:
“…Koj tsis txhob suav hais tias, nws yog ib tug tubtxib xwb, nimno nws tsimtxiaj dua ib tug tubtxib, nws los ua Koj ib tug kwv, rau qhov nws ntseeg Yexus Khetos lawm. Kuv hlub nws kawg li thiab kuv paub hais tias Koj hajyam yuav hlub nws heev dua, rau qhov nws yeej yog Koj ib tug tubtxib thiab nws yog ib tug uas ntseeg tus Tswv!” (Filemoos 1:16)
Lus nug rau sawvdaws xav:
– Timthawj Paulus thov Filemoos yam dab tsi?
– Nws qhia tawm tej yam dab tsi twg thiab muaj tus cwjpwm li cas?
– Peb kawm tau dab tsi dhau los ntawm Paulus lub tswvyim daws teebmeem?
Filemoos yog ib tug ntseeg npluanuj nyob hauv lub nroog Kaulauxais, nws muaj qhev coob, nws hlub Vajtswv thiab zoo siab siv nws lub tsev rau pawg ntseeg pehawm Vajtswv. Timthawj Paulus sau tsab ntawv no thaum nws tseem nyob hauv tsev lojcuj. Raws li ib tug thawj coj ntawm sab ntsuj plig, Timthawj Paulus muaj cai “samhwm” rau Filemoos yam uas yuavtsum ua. Tiamsis los ntawm txoj kev sib hwm thiab kev hlub timthawj Paulus “thov” Filemoos rov txais yuav Auneximus uas yog Paulus tus tub ntawm sab ntsujplig (nqe 8-10).
Auneximus, yog Filemoos ib tug qhev uas tau nyiag kev khiav tawm mus lawm. Hauv txoj kev khiav Auneximus ntsib Paulus thiab ntseeg Vajtswv hauv tebchaws Loos. Txij thaum ntawd los, Auneximus dhau los ua tus pab haujlwm rau Paulus ntau kawg li (Kaulauxais 4:9; nqe 13). Txawm hais tias Paulus yeej xav kom Auneximus tu nws hauv tsev lojcuj ntawm teb chaws Loos, tiamsis thaum nws paub txog kev tsis sib haum xeeb ntawm nkawd ob leeg, timthawj Paulus txhawb kom Auneximus rov qab mus nrog nws tus tswv Filemoos hais kom sib haum ua ntej. Raws li kev coj noj coj ua lub sijhawm ntawd, tus tswv muaj cai tua ib tug qhev uas khiav tawm vim lawv yog tus tswv li cuabtam. Yog li ntawd, cia kom muaj kev tiv thaiv rau Auneximus, timthawj Paulus thiaj sau ib tsab ntawv koom nrog xa mus rau Filemoos kom piav qhia meej txog kev hloov pauv ntawm Auneximus. Timthawj Paulus hu Auneximus yog nws tus tub ntawm sab ntsujplig thiab yog nws “nplooj siab” Paulus cia siab hais tias vim Paulus Filemoos yuav zam txim rau Auneximus.
Nrog rau tej lus nqua hu tiag tiag, timthawj Paulus ntuas kom Filemoos cia li txais yuav Auneximus, thiab hais Filemoos hais tias tiamsis tam sim no, “Koj tsis txhob suav hais tias, nws yog ib tug tubtxib xwb, nimno nws tsimtxiaj dua ib tug tubtxib, nws los ua Koj ib tug kwv, rau qhov nws ntseeg Yexus Khetos lawm” (nqe 16). Paulus kuj piav qhia qhov vimchiv uas Auneximus khiav tawm, tej zaum qhov ntawd yog cia kom nws paub Tswv Yexus, ntseeg txais yuav Yexus thiab dhau los ua ib tus neeg muaj nqis. Vim li ntawd Filemoos rov tau Aunexumus ua nws ib tus kwvtij zoo dua thiab muaj nqis dua (nqe 11, 14-16). Timthawj Paulus thov Filemoos ntxiv hais tias “Koj yuav tsum rov qab txais yuav nws” ib yam Filemoos txais Paulus (nqe 17). Paulus kuj coglus yuav txaus siab them tej nuj nqis uas Auneximus tshuav, cia kom Filemoos zam txim rau Auneximus thiab rov kho kom nkawd sib raug zoo dua (nqe 18-19).
Zaj xwm no yog ib zaj timkhawv zoo kawg nkaus txog tes haujlwm daws teebmeem thiab yog qhov tseemceeb hauv tes haujlwm pab lwm tus thaum muaj teebmeem kom tau kev zam txim thiab rov kho dua tshiab. Peb yuavtsum kawm timthawj Paulus tus qauv, daws tej kev teebmeem hauv pawg ntseeg tsis yog yuav siv tej kevcai nruj nruj tiamsis yog los ntawm txoj kev sib hwm, sib hlub, thiab txaus siab poob txhua yam uas yus muaj kom pab lwm tus zoo siab zam txim thiab rov kho dua.
Thov Vajtswv.
Tus Tswv, nyuamyaus ua Koj tsaug txog timthawj Paulus tus qauv. Thov pub koob hmoov rau nyuamyaus, kom tau Tus Tswv koj siv pab cov kwv tij hauv pawg ntseeg daws tej teebmeem ntawm kev sib zam txim thiab rov sib raug zoo. Nyuam yaus tuav Cawmseej Tswv Yexus lub npe thov, Amees.
Ib tsoom mloog uas hmov tshua
Peb pheej koom feem nrog daws tej teebmeem hauv pawg ntseeg li cas?
Nyeem Vajluskub hauv peb lub xyoos: 12
Kênh Youtube BHKTHN:
