Klei Aê Diê Blŭ: Y-Philêmôn 1:8-21
Êlan kliăng: “…amâo djŏ msĕ si sa čô hlŭn ôh, ƀiădah êgao hĭn kơ sa čô hlŭn, jing sa čô adei drei khăp hlăm kđeh leh anăn hlăm Khua Yang, boh nik nak kơ kâo, ƀiădah kdlưn hĭn kơ ih!” (Y-Philêmôn 1:16)
Klei êmuh ksiêm mĭn: Khua ƀĭng kna Y-Pôl kwưh Y-Philêmôn kơ ya mta klei? Ya mta phŭn ñu hưn mdah leh anăn hŏng si knuih? Ya klei hriăm drei mă tŭ mơ̆ng ênhă êlan Y-Pôl mgaih mkra klei amâo bi djŏ?
Y-Philêmôn jing sa čô đăo mdrŏng sah ti ƀuôn prŏng Kôlôs, mâo lu dĭng buăl leh anăn khăp kơ Khua Yang, ñu mơak brei yua sang ñu dôk pioh kơ Phung Sang Aê Diê bi kƀĭn kkuh mpŭ kơ Aê Diê. Khua ƀĭng kna Y-Pôl čih hră mơĭt anei êjai ñu dôk hlăm war mnă. Hŏng anôk bruă ñu jing khua gĭt gai klei hdĭp mngăt, Khua ƀĭng kna Y-Pôl mâo klei dưi yơh yua khưm ñu “mtă mtrŭn” kơ Y-Philêmôn ngă ya mta klei čiăng. Ƀiădah hŏng klei mpŭ leh anăn klei khăp, Khua ƀĭng kna Y-Pôl “kwưh” kơ ñu lŏ jum wĭt anak “ñu kkiêng leh êjai arăng krư̆, jing Y-Ônêsim” (êlan 8-10).
Y-Ônêsim, jing sa čô hlŭn kơ Y-Philêmôn, đuĕ dêč leh. Hŏng si bĕ êlan, êjai đuĕ dêč, Y-Ônêsim bi tuôm hĕ hŏng Khua ƀĭng kna Y-Pôl leh anăn đăo kơ Khua Yang ti čar Rôm. dơ̆ng mơ̆ng anăn, Y-Ônêsim jing pô đru bruă kơ Khua ƀĭng kna Y-Pôl lu snăk (Kôlôs 4:9; êlan 13). Wăt tơdah čiăng snăk kơ̆ng Y-Ônêsim dôk mbĭt đru bruă kơ ñu pô ti sang mnă čar Rôm, ƀiădah tơdah thâo ti krah diñu dua mâo klei amâo jăk ôh, Khua ƀĭng kna Y-Pôl bi mđĭ ai Y-Ônêsim lŏ wĭt bi grăng hŏng khua ñu Y-Philêmôn êlâo. Hlue si dhar kreh hlăk anăn, khua mâo klei dưi bi mdjiê hlŭn ñu đuĕ dêč, kyuadah diñu jing ngăn drăp khua diñu. Kyuanăn, čiăng rơ̆ng klei hơĭt ênang kơ Y-Ônêsim, Khua ƀĭng kna Y-Pôl čih hră mơĭt kơ Y-Philêmôn čiăng mblang klă kơ hlŭn đuĕ dêč anei mâo klei bi mlih leh. Khua ƀĭng kna Y-Pôl iêô kơ Y-Ônêsim jing anak hlăm mngăt leh anăn “ai tiê” ñu hmăng hmưi kơ Y-Philêmôn srăng kyua ñu yơh, pap brei kơ hlŭn Y-Ônêsim.
Hŏng klei iêô kwưh sĭt êmĭt, Khua ƀĭng kna Y-Pôl mtă kơ Y-Philêmôn tŭ ư Y-Ônêsim, ƀiădah mmông anei, “amâo djŏ msĕ si sa čô hlŭn ôh, ƀiădah êgao hĭn kơ sa čô hlŭn, jing sa čô adei drei khăp” (êlan 16). Ñu ăt mblang mơh, năng ai klei Y-Ônêsim đuĕ dêč brei mmông găl kơ ñu dưi thâo kral Khua Yang Yêsu leh anăn jing mnuih tŭ dưn. Hŏng klei anăn Y-Philêmôn dưi lŏ mâo Y-Ônêsim nanao hlăm klei jing jăk hĭn leh anăn tŭ dưn hĭn (êlan 11, 14-16). Khua ƀĭng kna Y-Pôl ăt kwưh kơ Y-Philêmôn “jum bĕ ñu msĕ si ih jum kâo pô mơh” (êlan 17). Ñu ăt mkăp săn asei, ƀuăn tŭ klam brei jih nư klei Y-Ônêsim čiăng kơ Y-Philêmôn pap brei leh anăn lŏ bi mrâo kluôm dhuôm (êlan 18-19).
Klei yăl dliê anei jing sa klei bi hmô tloh ênoh kơ bruă bi grăng leh anăn hnơ̆ng yuôm bhăn hlăm bruă đru mnuih mkăn mâo klei pap brei leh anăn lŏ bi mrâo. Brei drei tui hriăm klei bi hmô mơ̆ng Khua ƀĭng kna Y-Pôl, mgaih mkra klei amâo thâo bi djŏ hlăm Phung Sang Aê Diê hŏng klei mpŭ, klei khăp, hrô kơ klei khăng tui si hdră bhiăn, leh anăn ăt kăp săn asei klei tŭ dưn pô čiăng dưi đru mnuih mkăn hmiêt mkăp pap brei leh anăn lŏ bi mrâo.
Si klei drei khăng đru mgaih mkra klei amâo thâo bi djŏ hlăm Phung Sang Aê Diê?
Wah lač: Ơ Khua Yang, bi mni Khua Yang kơ rup bi hmô mơ̆ng Khua ƀĭng kna Y-Pôl. Akâo klei pap Khua Yang yua kâo dưi đru ayŏng amai adei hlăm Phung Sang Aê Diê mgaih mkra klei amâo thâo bi djŏ hlăm klei pap brei leh anăn lŏ bi mrâo. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y-Yôsuê 12
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
