Klei Aê Diê Blŭ: Klei Kbiă 32:30‑35
Êlan kliăng: “Kyuadah Aê Diê khăp êdimi kơ lăn ala, tơl Ñu brei Anak Ñu pô mâo knŏng sa čô, čiăng kơ hlei pô đăo kơ Anak Ñu anăn amâo rai tuč ôh, ƀiădah mâo klei hdĭp hlŏng lar” (Y‑Yôhan 3:16)
Klei êmuh ksiêm mĭn: Ya ngă Y‑Môis wah lač brei kơ phung ƀuôn sang Aê Diê? Si ai tiê Y‑Môis hŏng phung ƀuôn sang Aê Diê? Ya klei hriăm drei mâo mơ̆ng klei Aê Diê wĭt lač?
Y‑Môis jing mnuih Aê Diê tiŏ nao ngă khua gĭt gai phung ƀuôn sang Ñu leh anăn bi ala kơ diñu nao ti anăp Aê Diê. Jing khua gĭt gai phung ƀuôn sang Aê Diê, ñu bi kmhal klei phung ƀuôn sang kkuh kơ rup yang hŏng klei ƀuah ăl kpă mngač Y‑Arôn, bi lik rup êđai êmô mah, brei phung ƀuôn sang mnăm êa ƀruih mơ̆ng klei hêñ, brei phung ƀuôn sang lŏ bi mrâo klei đăo kơ Aê Diê, leh anăn bi kmhal djŏ klă phung mâo klei mĭn bi kdơ̆ng hŏng Aê Diê.
Jing pô bi ala kơ phung ƀuôn sang Aê Diê, Y‑Môis dôk ti anăp Aê Diê. Ai tiê Y‑Môis ktrŏ snăk kyua klei Aê Diê ngêñ ktang đei (êlan 7‑10). Hŏng knuih doh jăk, Aê Diê amâo lăm lui ôh klei soh, Ñu srăng mă klei soh phung aduôn aê bi kmhal phung anak čô truh tlâo pă ênuk. Khădah snăn, ăt adôk mâo klei čang hmăng kyua Aê Diê jing klei khăp, Ñu khăng pap brei, êmưt ngêñ leh anăn bŏ hŏng klei pap brei. Aê Diê srăng pap brei truh êbâo ênuk kơ hlei pô khăp kơ Ñu leh anăn djă pioh klei bhiăn Ñu (Klei Kbiă 20:4‑6).
Hlăk dôk ti anăp Aê Diê, Y‑Môis hưn klei soh phung ƀuôn sang ngă leh leh anăn akâo kơ Aê Diê pap brei kơ digơ̆. Ñu kwưh kơ Aê Diê hŏng jih ai tiê ñu: “ƀiădah tơdah Ih amâo čiăng ôh, akâo kơ Ih lăm hĕ anăn Kâo mơ̆ng hdruôm hră Ih čih leh” (êlan 32). Y‑Môis bi êdah ai tiê khăp kơ phung ƀuôn sang Aê Diê hĭn kơ klei hdĭp pô! Wăt tơdah Aê Diê mơak kơ ñu, ƀuăn srăng mjing kơ ñu sa êpul ƀuôn sang prŏng (êlan 10) ƀiădah amâo djŏ kyua snăn ôh ñu dưi klam brei klei soh phung ƀuôn sang Aê Diê. Aê Diê lač: “Hlei pô ngă soh leh hŏng Kâo, Kâo srăng lăm anăn ñu mơ̆ng hdruôm hră Kâo” (êlan 33). Anăn jing hdruôm hră klei hdĭp dưi lač hlăm Klei bi mguôp hđăp leh anăn Klei bi mguôp mrâo (Klei Mmuñ Hđăp 69:28; Y‑Đaniel 12:1; Y‑Luk 10:20; Philip 4:3). Aê Diê amâo bi kmhal ôh phung ƀuôn sang Ñu mtam ƀiădah srăng bi kmhal diñu djŏ mông Ñu kčah (êlan 34). Aê Diê tiŏ nao Y‑Môis lŏ dơ̆ng atăt phung ƀuôn sang nao ti anôk Ñu ktrâo leh leh anăn tiŏ nao ding buăl jăk nao êlâo kơ diñu.
Hruê anei, mâo mơ̆ klei pô amâo ngă soh hŏng Aê Diê čiăng dưi čih anăn hlăm hră klei hdĭp? “Kyuadah jih jang mnuih soh leh sơăi leh anăn amâo tơl mâo klei guh kơang Aê Diê ôh” (Rôm 3:23). Khădah snăn, “Kyuadah Aê Diê khăp êdimi kơ lăn ala, tơl Ñu brei Anak Ñu pô mâo knŏng sa čô, čiăng kơ hlei pô đăo kơ Anak Ñu anăn amâo rai tuč ôh, ƀiădah mâo klei hdĭp hlŏng lar” (Y‑Yôhan 3:16). Y‑Môis amâo djăp hnơ̆ng čuăn čiăng djiê hrô kơ phung ƀuôn sang Aê Diê ôh, knŏng hjăn Anak Aê Diê dưi djiê hrô kơ jih jang anak mnuih. Khua Yang Yêsu jing êlan sa anăn čiăng kơ anak mnuih hlăm djăp gưl ênuk dưi nao hŏng Aê Diê leh anăn dưi čih anăn hlăm hră klei hdĭp.
Anăn diih dưi čih anăn hlăm hră klei hdĭp leh mơ̆ amâodah ka?
Wah lač: Kâo bi mni lač jăk kơ Aê Diê Tlâo Yang, kyua Ih kâo dưi yap kpă ênô ti anăp Aê Diê, dưi čih anăn hlăm hră klei hdĭp leh anăn srăng dưi hdĭp hlăm ƀuôn ala mtao, klei jăk mơak hŏng Ñu.
Dlăng Klei Aê Diê Blŭ hlăm tlâo thŭn: Y‑Êsai 53
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
