Blŭng a 13:1-13
“…gah Lot sư oei tơ pơlei gah thŭng na hiŏng bơsŭn sư truh tơ jê̆ pơlei Sôđôm. 13 Kon pơlei Sôđôm kơnê̆ păng lu mơ’nah pơm yoch tih dêh hăm Kră Yang.” (Blŭng a 13:12b-13)
Nơ̆r jet tơchĕng pơwao:
– ‘Bok Lot hlôi rơih iŏk teh noh kiơ̆ kơ tơdrong kiơ?
– Tơdrong rơih iŏk ei pơdah tơdrong kiơ gah bơngai ‘bok Lot noh?
– Đơ̆ng tơdrong ‘bok Lot rơih iŏk ‘nâu hŏk kơ bơ̆n tơdrong kiơ?
‘Bok Lot, đơ̆ng rŏng kơ dôm yơ khei sơnăm yak năm hơdai, jang hơdai Abraham, păng đei Abraham hiơ̆k dŏng tơgŭm, na jơ ‘nâu ‘bok Lot hăm Abraham khŏm klah asong bri seh teh choh wă arih sa wă kơ ‘lơ̆ng pơđĭ kơ bre sư.Đơ̆ng kơdih ‘bok Abraham ‘mơ̆i pơrơ̆ng ‘măn wă pơyua ăn kơ mon sư adrol, lê̆ kơ mon sư rơih adrol pah teh mă mon sư ‘maih wă ‘mơ̆i noh. Mă trŏ sư, kơplah ‘bok Abraham athei ‘bok Lot rơih iŏk noh, ‘bok Lot kư̆m athei tơchĕng kơ mih sư, lê̆ mih sư rơih adrol lei trŏ. Mă-lei Lot ưh kơ pơm thoi ôh, sư rôp iŏk, yua iŏk jơ trŏ lăp noh na rơih iŏk hloi pah teh mă sư tơchĕng rŏ kơ đei yua ăn kơ sư dêh noh. Lot hlôi rơih iŏk teh dơnă pah đak krong Jôrđăn tơ gah hơlĕch yua “Lot sư tơmang lăng ‘bôh tơ thŭng gah Krong Jôrđăn noh, anih mă đei đak ro hngôm truh tơ pơlei Suar; bri chŭn noh kư̆m thoi lĕ pơgar Kră Yang pơm, thoi char Êyiptơ mơ̆n. Năr noh adrol kơ Kră Yang tam mă pơrăm pơlei Sôđôm păng pơlei Gômôrơ.” (trong 10). Rơđah hơđăl hloi bơih, Lot rơih iŏk noh sư lăng gah tơdrong jang sa, lei na tơdrong sư rơih iŏk noh ‘lơ̆ng dêh bơih, yua kơ teh tơring bro ‘nâu teh mơ̆r nhen thoi teh pơgar Êđen sơ̆,kư̆m nhen thoi tơ dêh teh dơnă lăm char Êyiptơ mơ̆n. Mă khan lei ră, tơdrong ‘bok Lot rơih iŏk noh pôm wă pơyua ăn tơdrong jang sa gah akâu akar sư đĕch,ưh kơ tơchĕng hiơ̆k kơ pang gah bơhngol sư,păng ưh kơ tơchĕng kơ tơring noh jơhngơ̆m đon kon pơlei pơla mă oei tơ noh kơnê̆ ‘mê̆. ‘Bok Lot năm oei tơ pơlei Sôđôm arih sa tơ noh, na Hla bơar ‘Bok Kei-Dei roi khan: “Kon pơlei Sôđôm kơnê̆ păng lu mơ’nah pơm yoch tih dêh hăm Kră Yang.” (trong 13)
Tơdrong ‘bok Lot rơih iŏk noh tơ’bôh sư bơngai ‘măn adrol hloh hăt chơchă wă kơ lơi yua đei mŭk tơmam dei dei hloi. Tơdrong arih ‘bok Lot ‘nâu, sư pôm lăng, pôm gơnang kơ dôm tơdrong kiơ mă sư‘bôh păng măt đĕch, ưh kơ gơnang kơ đon lui. ‘Bok Lot kư̆m ưh kơ hiơ̆k tơchĕng kơ tơdrong sư rơih iŏk noh Kră Yang lăp đon dah ưh.Sư kư̆m gơh mơ̆n tơchĕng thoi âu dơ̆ng, mă khan sư năm oei tơ pơlei. Sôđôm noh ưh kơ trŏ tơdrong sư pơm noh yoch hloi bơih ôh, mă sư tơ noh kư̆ kơ sư hăm hnam dơnŏ sư gơh găi kơchăng bơwei akâu lu sư kơdih ưh oei pơm rok dôm lu tơdrong yoch mă kon pơlei pơla oei lăm ei pơm noh. Mă-lei Lot ưh kơ băt kơ năm oei tơ pơlei Sôđôm noh bơih drơ̆ng iŏk arih hơdai hăm lu bơngai yoch. Tơdrong rơih iŏk noh kiơ̆ kơ ‘bok Lot tơchĕng khan pŭn hiôk dêh. Mă-lei kiơ̆ kơ tơdrong hơgăt lăm Sơ̆p hla bơar‘Bok Kei-Dei, tơdrong ‘bok Lot rơih iŏk noh ưh kơ pŭn hiôk ôh. Lăm Hla bơar Hơriso 1:1 khan: “Pŭn dêh kơ bơngai bu, ưh kơ kiơ̆ trong lu bơngai kơnê̆, kư̆m ưh kơ oei lăm trong lu bơngai yoch, kư̆m ưh kơ ngôi hơdai hăm lu pơjăm đe;”
Lơ bơngai dang ei kư̆m đei lơ tơdrong rơih iŏk tơdrong lăm chăl arih kư̆m lei-lăi thoi ‘bok Lot sơ̆ mơ̆n. Mưh wă lơi yua gah mŭk tơmam lei tơchĕng hơlen sele dêh, mưh tơdrong wă lơi yua ăn gah bơhngol lei tă tơ lăng hơnhơl, lăng hơi đĕch. Mă bơ̆n kư̆m lơ wơ̆t rơih iŏk tơdrong kiơ kiơ ăn kơ chăl arih bơ̆n kơdih noh ngăl gơnang kiơ̆ kơ măt lăng ‘bôh, na lê̆ tơdrong bơ̆n rơih iŏk noh ‘bơm kơ tơdrong wă pơrăm tơdrong arih gah bơhngol bơ̆n kơdih, kư̆m’bơm kơ tơdrong wă pơrăm tơdrong arih gah bơhngol lu kon sâu bơ̆n wă răm thoi noh mơ̆n kơnh. Apinh Kră Yang tơgŭm bơ̆n ling-lang gơnang kơ Sư păng mă kơchăng, mă pơ’lơ̆ng lăm dôm tơdrong bơ̆n rơih iŏk wă pơm.
Ơ Kră Yang, inh băt kơnăl bơih dôm tơdrong lăm chăl arih inh kơdih oei kơ’bah.Apinh Ih mơnat pă jô̆ yo, păng tơgŭm inh hlôh hơđăl kơ oei lăm Ih noh Ih lăp đon, noh bơih pŭn hiôk tơpă, inh khŏm druh kiơ̆, khŏm chơchă; păng oei lăm Ih, Ih lăp đon, noh bơih hơnă tơm kơ dôm tơdrong mă inh rơih iŏk lăm chăl arih inh. Inh krao khan yua anăn Kră Yang Yêsu Krist, Amen!
Bơ̆n ngăl rơih iŏk pơm tơdrong pơyua ăn gah bơhngol dah mă rơih iŏk pơm tơdrong wă pơyua ăn gah mŭk tơmam?
Đŏk Sơ̆p Hla bơar’Bok Kei-Dei lăm pêng sơnăm: Malachi 3-4
Kênh Youtube BHKTHN:
