Pajlug 18:16-19
Nqe cim:
“Nej tsis txhob ua ib yam dabtsi kom zoo rau nej lossis kom neeg qhuas nej xwb; tiamsis nej yuav tsum txo hwjchim thiab ib tug tsis txhob khav hais tias ib tug zoo dua ib tug. Nej tsis txhob xav txog nej xwb, tiamsis nej yuav tsum xav txog lwm tus thiab. Tsimnyog nej muaj lub siab zoo ib yam li Yexus Khetos lub” (Filipis 2:3-5).
Lus nug rau sawvdaws xav:
- Vajntxwv Xalumoos qhia hais tias yam dabtsi ua rau tsis muaj kev ncaj ncees?
- Yog ib tug thawjcoj lossis ib tug tu plaub ntug, peb yuav tsum pom txog yam dabtsi?
- Yuav ua cas kom tswj tau kev ua plaub ntug thiab ua tau neej nyob sib haum xeeb?
Nyob hauv lubneej yeej qaij tsis dhau kev ua plaub ua ntug. Thaum ntej, yuav tu plaub ntug, ob tog yuav tsum nrhiav ib tug lossis ib pab neeg los tu plaub. Tiamsis tsis yog txhua rooj txiav txim puavleej ncaj ncees thiab ua txaus txhua tus lub siab. Yog tus txiav txim txais khoom lossis nyiaj xiab, nws yuav txiav txim tsis ncaj ncees. Nqe lus “Pub ib yam dabtsi rau luag kuj yog qheb kev rau yus” (nqe 16a PTT) muaj lub ntsiab hais tias tus uas txais khoom yuav pub ib yam dabtsi rau tus uas nqa tej khoom tuaj. Nyiaj txiag yog yam ua rau tsis muaj kev ncajncees. Thaum sib cav, leej twg kuj hais tias nws yog. Yog li ntawd tus txiav txim yuav tsum ua tib zoo mloog ob tog piav nyias zaj (nqe 17). Nyob tiam thaum ub, cov Yixalayees muaj txojcai rho ntawv kom tseg tsis sib cav ntxiv thiab lawv ntseeg hais tias Vajtswv yog tus txiav txim. Pivtxwv li thaum tus Tswv haivneeg rho ntawv faib feem av, lossis cov tubrog rho ntawv twv Tswv Yexus lub tsho ntev. Qhov kawg, nqe 19 ceebtoom hais tias, kev sib cav sib ceg yuav tsum tu kom ncaj ncees sawvdaws thiaj nyob taus sib haum xeeb. Tej rooj plaub tsis muaj neeg tu, lossis tu tsis ncaj ncees yuav ua tshwm ntau yam teebmeem tuaj, lossis ua rau muaj kev sib faib mus li.
Tibneeg tsis muaj ib tug zoo txaus, thiab kuj tsis muaj ib pab pawg twg yuav qaij dhau kev ua plaub ntug. Muaj ntau pab pawg raug tawg vim kev ua plaub ua ntug. Thov tus Tswv pab peb txhua tus paub ua neej qhia tshwm Nws txojkev ncaj ncees txhua lub tsamthawj. Thaum pom muaj kev tsis ncaj ncees, muaj kev quab yuam peb yuav tsum tawm ncauj tawm lus. Yog peb tau lub meejmom ua thawjcoj lossis ua tus tu plaub ntug, yuav tsum ua ncaj ncees, tsis cia nyiaj txiag ua rau tus Tswv kev ncaj ncees raug qias.
Tus Tswv cov menyuam yuav tsum zeem paub hais tias tus kheej yog ib yam ntawm lub cev thiab tus Tswv yog lub taubhau. Tus Tswv paub zoo peb tej kev xav thiab peb tej haujlwm. Nws yog tus muab nqi zog thiab yuav txiav txim ncaj ncees rau txhua tus raws li tej uas nyias ua. Timthawj Paulus taw qhia rau peb paub txog kev sib raug zoo thiab txhim kho Pawg Ntseeg kom muaj zog li no: “Nej tsis txhob ua ib yam dabtsi kom zoo rau nej lossis kom neeg qhuas nej xwb; tiamsis nej yuav tsum txo hwjchim thiab ib tug tsis txhob khav hais tias ib tug zoo dua ib tug. Nej tsis txhob xav txog nej xwb, tiamsis nej yuav tsum xav txog lwm tus thiab. Tsimnyog nej muaj lub siab zoo ib yam li Yexus Khetos lub” (Filipis 2:3-5).
Thov Vajtswv
Tus Tswv uas yog peb Leej Txiv, nyuam yaus ua Koj tsaug vim Koj pub Txojlus rau nyuam yaus. Thov qhia nyuam yaus paub ua neeg zoo, qhia tshwm koj txojkev ncaj ncees raws li Koj Txojlus qhia. Thov pub rau nyuam yaus muaj lub siab ib yam li Tswv Yexus lub, ua neej txo hwjchim, saib taus lwm leej lwm tus. Amees.
Peb lubneej puas tau qhia tshwm kev ncaj ncees, txo hwjchim li Tswv Yexus tus qauv lawm?
Nyeem Vajluskub hauv peb lub xyoos: Yaxayas 54:1-55:5
Kênh Youtube BHKTHN:
