2 Kevcai 29:1-8
Nqe cim:
“Yexus teb hais tias, hlub tus Tswv uas yog nej tus Vajtswv kom kawg siab kawg ntsws, kawg plab kawg plawv thiab kawg nej lub dag lub zog. Nqe no thiaj yog nqe uas tseemceeb dua ntais. Thiab nqe ob uas tseemceeb hais li no hais tias: Hlub koj tej kwvtij zej zog ib yam li koj hlub koj lub cev.” (Mathais 22:37-39)
Lus nug rau sawvdaws xav:
– Mauxes qhia rau cov Yixalayees yam dab tsi?
– Mauxes rov qhia tej uas twb hais dhau los yog muaj hom phiaj li cas?
– Peb cheemtsum ua dab tsi thiaj pab tau tej xeebntxwv paub tus Tswv?
Tom qab uas hais txog tej koob hmoov thiab tej kev foom tsis zoo lawd, Mauxes hais txog “tus Tswv cov lus cog tseg” ntawm Henploos thiab qee yam cob qhia ntxiv. Mauxes qhia txog qhov uas Vajtswv tau pab cov neeg Yixalayees thaum lawv ua neej nyob hauv lub tebchaws Iziv. Vajtswv cawm lawv dim kev ua cev qhev, coj lawv kev los txog rau lub tebchaws coglus tseg, pab lawv tiv dhau tej kev txomnyem hauv tiaj suabpuam thiab pub lawv los txeeb tau lub tebchaws cog lus tseg ntawm sab hnub tuaj ua lawv tug.
Thaum ntawd tsuas yog cov povthawj thiab cov Levis thiaj muaj phau kevcai los saib, dua li lwm tus ces tsuas yog kawm nco xwb. Yog li ntawd Mauxes thiaj qhia mus qhia los tej uas Vajtswv tau ua rau lawv pom nyob hauv lub neej yav dhau los kom sawvdaws nco ntsoov. Thaum lub sijhawm ntawd Vajtswv tsis pub Nws haiv neeg muaj lub siab totaub, vim lawv pheej tawv ncauj, tsis xav mloog Vajtswv lus (nqe 4). Yog li ntawd kev qhia mus qhia los yog qhov tseemceeb rau tus Tswv haivneeg. Dhau ntawd yog yuav tsum qhia rau tej xeebntxwv tom qab yam uas tus Tswv ua zoo rau lawv cov yawgkoob los lawm, kom tej xeebntxwv paub hais tias Vajtswv yog tus uas ua raws li Nws tej lus cog tseg. Tej lus qhia no tsis zoo li ib daim ntawv thooj yim kom ob tog ua, tiamsis yog kev cog lus los ntawm txoj koob hmoov. Vajtswv yog tus uas cog lus yuav ua tagnrho raws li Nws hais, tiamsis Vajtswv haivneeg tsuas yog cov uas txais dawb, ua neej kom tsimnyog thiab ncaj ncees xwb. Tej ntawd txhais tau hais tias, hlub Vajtswv kawg siab kawg ntsws, kawg plab kawg plawv, pehawm Vajtswv thiab ua raws li Nws tej kevcai cog tseg. Tsis yog Vajtswv haiv neeg tiam thaud cog lus nrog Vajtswv, ho muab cob rau tiam neeg tom qab siv ces tau, tiamsis txhua tiam neeg yuav tsum cog lus ua ncaj nrog Vajtswv thiab txhua tus yuav tsum muaj kev cog lus hais tias hlub Vajtswv.
Tig saib yav tas los, ua rau peb pom txog Vajtswv txoj kev tsomkwm saib xyuas peb thiab saib mus tom hauv ntej peb yuav tsum ua neeg paub ua Vajtswv tsaug thiab cia siab ntsoov rau Vajtswv. Dhau ntawd, peb yuav tsum hais mus hais los txog tej uas Vajtswv twb pab peb dhau los lawd rau tej xeebntxwv paub kom lawv muaj kev cog lus ua neej nrog tus Tswv. Kev cog lus ntawm tus kheej nrog tus Tswv yog yam tseemceeb, tsis yog niamtxiv, tsis yog pogyawg pab cog lus this tau ib leejtwg. Qhov uas cog lus ua lub neej hlub Vajtswv thiab ua neej cia siab ntsoov rau lub tebchaws tom ntej yog yam tseem ceeb rau txhua haiv neeg thiab txhua tus tibneeg.
Thov Vajtswv,
Vajtswv, nyuam yaus ua Koj tsaug vim Koj tau coj nyuam yaus tiv dhau txhua yam ntawm lub neej. Thov Koj pab kom nyuam yaus muaj lub siab hlub Koj, hwm Koj thiab mloog Koj lus hauv kev ua neej txhua hnub. Nyuam yaus tuav Cawmseej Tswv Yexus lub npe thov, Amees.
Ib tsoom cov mloog uas hmov thiab tshua,
Peb twb coglus nrog tus Tswv zoo li cas lawm?
Nyeem Vajluskub hauv peb lub xyoo: Henplais 13
Kênh Youtube BHKTHN:
