Klei Aê Diê Blŭ: Klei Mtô Mñă Klei Bhiăn 29:1-8
Êlan kliăng: “Yêsu lač kơ ñu, “Ih srăng khăp kơ Khua Yang Aê Diê ih hŏng jih ai tiê, hŏng jih mngăt, leh anăn hŏng jih klei mĭn ih. Klei mtă anăn jing prŏng hĭn leh anăn êlâo hĭn. Leh anăn klei mtă tal dua jing msĕ snăn mơh, Ih srăng khăp kơ pô riêng gah ih msĕ si kơ ih pô. ” (Y-Mathiơ 22:37-39)
Klei êmuh ksiêm mĭn: Ya klei Y-Môis mñă kơ phung ênuk mrâo phung ƀuôn sang Israel? Ya ngă ñu mñă wĭt mñă nao klei anăn? Ya klei brei drei ngă čiăng đru anak čô thâo kral Khua Yang hjăn diñu pô?
Leh lač kơ klei jăk mơak leh anăn klei tăm pah, Y-Môis lŏ mñă “dŭm klei bi mguôp” hŏng diñu Aê Diê ngă leh ti čư̆ Hôrep leh anăn dŭm klei dưi mblang thiăm hlăm klei ñu mtô. Ñu mñă klă klei Aê Diê kriê dlăng hŏng phung ƀuôn sang Israel hlăm wưng hdĭp ti Êjip, klei Aê Diê bi mtlaih mơ̆ng klei jing hlŭn, klei kriê dlăng mdê hjăn mơ̆ng Aê Diê hlăm jih hdră ba diñu nao ti krĭng Lăn Aê Diê Ƀuăn, đru diñu găn jih kdrăn tač thu krô, mblah dưi leh anăn mâo mă krĭng ngŏ êa krông Yurdan jing ngăn drăp.
Kyua knŏng phung khua yang ngă leh anăn phung Lêwi kơh mâo sa klei bhiăn mrâo čiăng ksiêm dlăng, bi phung ƀuôn sang Aê Diê knang hlăm klei thâo hdơr mơ̆ng Y-Môis mñă wĭt mñă nao ya klei hlăm hƀuê ênuk Aê Diê ngă leh kơ phung ƀuôn sang Ñu. Ară anei Aê Diê ka brei kơ diñu ai tiê čiăng thâo săng ôh kyua diñu khăng ai tiê nanao, amâo gưt asăp Aê Diê ôh (êlan 4). Kyua anăn mñă wĭt mñă nao ya akŏ mưng leh jing klei yuôm bhăn hŏng phung ƀuôn sang Ñu. Hĭn mơh, mñă kơ ênuk mrâo klei jăk mơak Aê Diê ngă leh kơ aduôn aê diñu jing čiăng kơ diñu thâo kral Aê Diê sĭt suôr bi sĭt klei Ñu ƀuăn leh hlăm klei bi mguôp. Anei amâo djŏ jing sa klei bi mguôp mtăp mđơr dua nah ôh, ƀiădah jing klei bi mguôp klei pap, hlăm anăn Aê Diê hjăn păn ƀuăn rơ̆ng hlue ngă Klei Ñu ƀuăn leh, bi phung ƀuôn sang Ñu knŏng kăp mă, hdĭp năng djŏ leh anăn sĭt suôr, jing knŏng jih ai tiê, jih klei mĭn khăp, mpŭ kơ Aê Diê leh anăn gưt klei bhiăn Ñu. Snăn, amâo mâo ôh ya ênuk dưi dlăng klei bi mguôp Aê Diê jing sa klei ba jao brei mâo mơ̆ng ênuk anei truh kơ ênuk mkăn, ƀiădah grăp ênuk brei mkŏ mjing klei bi mguôp mrâo hŏng Aê Diê leh anăn mâo klei ƀuăn rơ̆ng mdê mdê plah wah diñu hŏng Aê Diê.
Lŏ dlăng wĭt hruê mmông leh êgao drei ƀuh klei Pô sĭt suôr kriê dlăng hlăm klei hdĭp pô leh anăn lŏ dơ̆ng mđing kơ mgi dih hlăm ai tiê hdĭp hdơr knga leh anăn đăo knang kơ Ñu. Hĭn mơh, drei lŏ mñă wĭt mñă nao kơ anak čô thâo klei prŏng prĭn Aê Diê ngă kơ gŏ sang pô kñăm mđĭ ai diñu mâo klei ƀuăn rơ̆ng hjăn diñu hŏng Aê Diê, anăn jing klei bi mguôp hjăn plah wah anak čô drei hŏng Aê Diê amâo knang hlăm klei bi mguôp mơ̆ng amĭ ama, aduôn aê hŏng Aê Diê ôh. Klei ngă bi mguôp hlăm grăp ênuk, grăp čô, đru thâo kơ Khua Yang mdê mdê hlăm klei hdĭp grăp čô mnuih čiăng dưi mđing kơ êdei anăp hlăm klei Khua Yang atăt gai.
Si drei bi mguôp hjăn hŏng Khua Yang?
Wah lač: Ơ Khua Yang, kâo jih ai tiê hdơr knga kơ Ih kyua atăt kâo găn jih djăp klei ênguôt hnĭng jăk mơak hlăm klei hdĭp. Akâo kơ Ih đru kâo khăp, gưt asăp Khua Yang čiăng kơ kâo dưi hdĭp nanao hlăm klei bi mguôp hŏng Ih. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Hêbrơ 13
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
