Mathais 27:1-10
Nqe cim:
“Yudas txawm muab cov nyiaj ntawd pov rau hauv lub Tuamtsev; ces nws txawm mus dai cajdab tuag lawm” (Mathais 27:5)
Lus nug xav:
– Tomqab uas ntxeev siab muag tus Tswv lawm, Yudas Ixakhali-us tau ua dabtsi?
– Vim licas Tswv Yexus thiaj hu Yudas hais tias “tus uas yeej yuav puastsuaj”?
– Peb tau qhuab ntuas txog yam dabtsi dhau ntawm zaj xwm hais txog Yudas?
Yudas Ixakhali-us ntxeev siab muag tus Tswv tau 30 lub nyiaj. Tomqab uas nws taug qab thiab paub hais tias cov pov thawj hlob thiab cov kev txwj laus tau ntes Tswv Yexus khi thiab coj mus cob rau tswvxeev Philaj yuam kom muab tua povtseg, vim raws li kevcai cov Yudais tej tsev hais plaub tsis muaj cai txiav txim tuag; ces Yudas txawm khuv xim, tu siab rau nws tej kev txhaum, nws thiaj rov mus ntsib cov pov thawj hlob thiab cov kev txwj laus. Nws hais tias, “Qhov uas kuv muab ib tug neeg tsis tau ua txhaum rau luag tua, yog kuv ua txhaum lawm!” Tiamsis nws tsuas tau lo lus teb hais tias: “Peb tsis nrog koj paub, ntawd yog koj haujlwm xwb!” (nqe 4).
Ua ntej yuav raug txomnyem, Tswv Yexus tau thov Leej Txiv hais tias, Yudas Ixakhali-us yog “tus uas yeej yuav puastsuaj” (Yauhas 17:12); thiab thaum xubthawj Nws twb hais rau cov thwjtim txog Yudas hais tias, “nej cov ko muaj ib tug yog dab ntxwgnyoog!” (Yauhas 6:70). Vim licas? Ntu Vajluskub hnub no qhia rau peb nrhiav tau lo lus teb. Yudas tu siab, khuv xim tiamsis nws tsis nco txog tus Tswv tej lus qhia hauv peb lub xyoos dhau los, nws tsuas nco txog tej lus sib tham hais nqe nyiaj thaum nws txais 30 lub nyiaj los ntxeev siab rau tus Tswv xwb! Nws tsis lees txim rau tus Tswv tiamsis ho mus lees txim rau tibneeg uas yog cov thawjcoj sab kev ntseeg. Koom yog Tswv Yexus ib tug timthawj tiamsis Yudas tsis hloov siab “quaj tu siab kawg” ib yam li Timthawj Petus, nws tsuas hais tej lus chim thiab muab cov nyiaj uas nws txais tau coj mus pov rau hauv lub Tuamtsev xwb. Yudas tawm hauv lub Tuamtsev mus tiamsis nws tsis rov los cuag tus Tswv, nws ua raws tus kheej kev xav thiaj li ntsib kev poob siab kawg nkaus. Thaum kawg, nws xaiv txojkev tuag kom dim ntawm kev iab siab, tiamsis nws tsis xav txog hais tias thaum nws lub cev raug hlua dai yuj yees tom teb, ces nws tus ntsujplig yuav mus nyob rau qhov twg?
Niaj hnub nimno, thaum nyeem cov phau Moo Zoo, qee zaus peb yuav thuam Yudas. Tiamsis, thov tus Tswv pab kom peb txhua tus paub rov tig saib yus tus kheej hauv lub caij nco txog tus Tswv Txomnyem xyoo no. Ntau zaus peb kuj nyiam mus cuag tibneeg, tshwjxeeb yog cov neeg uas muaj hwjchim, meejmom, peb ho tsis mus cuag tus Tswv. Ntau zaus thaum ua txhaum, peb tsuas tu siab xwb tiamsis tsis hloov siab hlo li, thiaj li tseem pheej mus ua txhaum ntxiv. Ntau zaus peb nco tej lus zoo thiab tej lus sib qhia rau lwm tus ntau dua li nco Vajtswv Txojlus qhia. Ntau zaus peb tsuas txiav txim siab rau peb lubneej xwb, tsis khiav mus cuag tus Tswv thiab muab lubneej tso rau hauv Nws txhais tes. Tibneeg yuav tsis quavntsej peb, tsuas yog tus Tswv tibleeg xwb thiaj li pab daws peb tej teebmeem kom tau txais kev zam txim. Thov tus Tswv pab kom peb tig rov los cuag Nws hnub no.
Thov Vajtswv,
Tus Tswv, Yudas zaj xwm qhia rau nyuam yaus zeem paub txog tus kheej kev qaug zog, ntau zaus nyuam yaus xaiv yam tsis yog, mus raws li tibneeg, tsis mus raws Koj qab. Thov zam txim rau nyuam yaus, ntxuav nyuam yaus nplooj siab kom dim ntawm kev ntshaw, kev cuav, thiab lub siab tawv, pab nyuam yaus paub hloov siab lees txim thiab rov los cuag Koj. Nyuam yaus tuav Tswv Yexus Khetos lub npe thov, Amees.
Peb puas pom peb tus kheej tseem muaj qhov twg zoo li Yudas Ixakhali-us? Peb txiav txim siab li cas hauv lub caij nco txog tus Tswv Txomnyem xyoo no?
Nyeem Vajluskub hauv peb lub xyoos: Exekees 36
Kênh Youtube BHKTHN:
