Êsai 53:3-6
“Đĭ đăng lu bơ̆n thoi triu jrok trong. Rim ‘nu kiơ̆ trong kơdih: Lei na Kră Yang iŏk đĭ tơdrong yoch lu bơ̆n tơpŭ ăn kơ sư.” (Êsai 53:6)
Nơ̆r jet tơchĕng pơwao:
– ‘Bok mă chu pơmat ‘noh bu păng sư chu pơmat yua kơ bu?
– Sư đei chu pơmat thoi yơ?
– Tơdrong Sư chu pơmat đei yua kiơ kơ bơ̆n?
Êsai 53 ‘noh tơdrong hơri gah tơdrong chu pơmat đơ̆ng đĭch đam Kră Yang ‘Bok Kei-Dei. Bơngai đĭch đam ‘nâu bơih ‘bok Mêsi mă ‘Bok pơkă wă ăn ‘noh bơih Kră Yang Yêsu Krist. Hrĕng sơnăm adrol kơ đe tơpŭ kơ Kră Yang. Êsai ‘bok khan lê̆ adrol pơma roi hơđăl gah tơdrong Kră Yang chu pơmat. Nơ̆r Kră Yang khan hơđăl tơpă ‘Bok Mêsi chu pơmat yua kơ lu bơ̆n: “Sĭt tơpă, sư bơih pŭ tơdrong jĭ-jăn kơ lu bơ̆n, sư pŭ hơnong iŏk tơdrong ơh sơ’ngon lu bơ̆n, mă lu bơ̆n lăng ngeh khan đơ̆ng Kră Yang ‘Bok Kei-Dei teh pơjĭ, păng pơmat Sư.” (trong 4), “yua kơ tơdrong yoch lu bơ̆n”, “yua kơ tơdrong kơnê̆ lu bơ̆n” (trong 5). Nơ̆r “lu bơ̆n” lăm âu wă pơma kơ Kon Kră Yang, lu bơngai đei glăi hăm khôi juăt Kră Yang. Pơma sĭn to dơ̆ng “lu bơ̆n” ‘noh đĭ đăng kon bơngai, lu tơmam mă ‘Bok Kei-Dei pơjing mălei sơngah kơ Kră Yang, arih kiơ̆ kơdih păng puh lăm tơdrong yoch. “Sư lôch tang bơ̆n wă pơklaih bơ̆n đơ̆ng tơdrong yoch. Mă-lei ưh kơ sĭ Sư wă pơklaih kơdrô̆ yoch bơ̆n đĕch ôh, Sư pơklaih đĭ đăng bơngai ala teh âu mơ̆n.” (I Yôhan 2:2).
Yua kơ tơdrong yoch lu bơ̆n, Kră Yang Yêsu đe “areh păng kuă kơ Sư, Sư ling lang pŭ iŏk tơdrong ơh sơ’ngon pơmat tat jĭ jơhngơ̆m”. Akâu jăn Sư ‘bĕnh kơ jĭ rơka đe teh păng sơnguĕt. Păng atol Sư tơ ‘long pơglang. Kră Yang chu đe pơ̆ng Sư hăm kơ đinh păng lôch thoi minh ‘nu bơngai pơm yoch kơ khôi juăt trăp tih. Tơdrong krưp dêh noh Kră Yang Yêsu tơ’bơ̆p tơdrong pơmat dah tơdrong lôch, na “Đĭ đăng lu bơ̆n thoi triu jrok trong. Rim ‘nu kiơ̆ trong kơdih: Lei na Kră Yang iŏk đĭ tơdrong yoch lu bơ̆n tơpŭ ăn kơ sư.” (trong 6). Yua kơ kiơ kon mă ‘Bok Kei-Dei ‘mêm kơeng, Tơ’ngla ‘lơ̆ng rơgoh păng ưh kơ đei yoch, na pŭ iŏk tơdrong yoch đĭ đăng kon bơngai, đe jô̆ thoi bơngai pơm tơdrong yoch kơnê̆ thoi noh? Tơdrong kơnhăm lăm tơdrong Kră Yang Yêsu pŭ iŏk noh wă kơ bơ̆n gơh hơđơ̆ng păng gơh dŏng pơklaih (trong 5). Đĭ đăng kơ bơ̆n thoi triu jrok trong năm kiơ̆ trong hiong răm, păng tơdrong bơ̆n gô iŏk noh tơdrong phak ling lang lăm dơnâu ŭnh. Mălei Kră Yang Yêsu đei pŭ tang păng pơdrĕo dôm tơdrong yoch wă kơ rim đe bu lui sơng iŏk Kră Yang, gơh jô̆ ưh kơ đei yoch, jô̆ ‘lơ̆ng tơpăt, păng đei tơdrong arih ling lang.
Lăm tơdrong hơri Kră Yang tôi ‘long pơglang, ‘bok bơtho Lê Đinh Tươi chih: “Dŏng bơngai, Kră Yang tôi ‘long pơglang; tang inh Kră Yang chu lôch. Inh ưh kơ băt wă iŏk tơdrong kiơ ‘mong ăn, tơdrong ‘mêm ăn đĕch. Ơ Kră Yang ơi! Tơdrong hlôi mơn tơdrong Kră Yang chu pơmat tih dêh yua kơ lu bơ̆n. Iŏk tơdrong ‘mêm Sư ăn đĕch, rim ‘nu athei arih pơyơ̆r kơ Sư.
Ơ Kră Yang, yua kơ Ih ‘mêm kơ inh na Ih jur chă păng dŏng inh, chu pơmat yua kơ inh. Inh ưh kơ trŏ wă iŏk tơdrong chu pơmat tih đơ̆ng Ih. Bơyan ‘blŏk kơ Kră Yang chu pơmat – Iung arih sơnăm ‘nâu, apinh Ih tơgŭm inh băt tơchĕng pơwao gah dôm tơdrong kiơ Ih pơm wă ‘bôh tơdrong ‘mêm tih Ih, păng inh pơjao pơyơ̆r chăl arih inh ling lang kơ Ih, krao khan yua anăn Kră Yang Yêsu Krist, Amen!
Năr ‘nâu, bơ̆n wă iŏk tơdrong kiơ wă ‘mong kơ tơdrong ‘mêm tih Kră Yang chu lôch yua kơ bơ̆n?
Đŏk Sơ̆p Hla bơar ‘Bok Kei-Dei lăm pêng sơnăm: II Lu Pơtao 9
Kênh Youtube BHKTHN:
