Klei Aê Diê Blŭ: Y-Yôhan 16:13-15
Êlan kliăng: “Tơdah Mngăt Myang klei sĭt nik truh, Ñu srăng atăt diih hlăm jih jang klei sĭt nik. Kyuadah Ñu amâo srăng blŭ hŏng klei kơhưm Ñu pô ôh, ƀiădah Ñu srăng blŭ jih klei Ñu hmư̆, leh anăn Ñu srăng hưn kơ diih klei srăng truh êdei.” (Y-Yôhan 16:13)
Klei êmuh ksiêm mĭn: Ya ngă Khua Yang Yêsu akâo kơ Aê Diê Ama brei Yang Mngăt Jăk kơ phung anak ƀuôn sang Ñu? Ya bruă Yang Mngăt Jăk ngă? Si klei bi hmăi kơ klei hdĭp drei tui hlue Khua Yang mơ̆ng klei Yang Mngăt Jăk truh?
Jih jang phung Israel thâo săng sơăi, diñu amâo dưi găn ôh kdrăn tač Sinai prŏng prĭn tơdah amâo mâo ôh pô thâo raih atăt êlan. Msĕ snăn mơh, tơdah Khua Yang Yêsu thâo êlâo kơ phung ƀĭng kna Ñu srăng dôk kŏ krei hjăn păn, leh anăn amâo thâo bĭt êlan nao tơdah amâo mâo ôh Ñu dôk mbĭt ti lăn ala anei. Kyuanăn Khua Yang akâo kơ Aê Diê Ama brei sa Pô Bi Juh mkăn jing Yang Mngăt Jăk trŭn hriê čiăng atăt êlan leh anăn bi juh phung anak ƀuôn sang Ñu, đru digơ̆ ăt dôk kjăp hlăm êlan êbat wĭt kơ Ƀuôn Jăk. Khua Yang Yêsu lač: “Tơdah Mngăt Myang klei sĭt nik truh, Ñu srăng atăt diih hlăm jih jang klei sĭt nik.” (êlan 13). Yang Mngăt Jăk jing Pô lŏ čuê atăt êlan kơ phung ƀĭng kna mŭt hlăm klei sĭt nik kluôm dhuôm. Klei anei drei ƀuh klă mngač hlăm hdruôm hră Bruă Phung Khua Ƀĭng Kna 2:1-41, tơdah Yang Mngăt Jăk truh hlăm Knăm Pantơkôt, Ñu brei leh kơ phung khua ƀĭng kna klei thâo mĭn leh anăn klei jhŏng mdê yuôm êdimi, čiăng kơ mơ̆ng anôk digơ̆ huĭ hyưt amâo thâo si srăng ngă, truh kơ anôk mâo klei jhŏng ngă klei Khua Yang mtă, hưn lar Klei Mrâo Mrang Jăk tal êlâo hĭn, mâo boh tŭ dưn, êngao kơ klei dưi bi mĭn.
Hlăm êlan 14-15, msĕ si bruă tiŏ nao leh Khua Yang Yêsu jing klei mpŭ mni kơ Aê Diê Ama, bruă tiŏ nao Yang Mngăt Jăk jing klei mpŭ mni kơ Khua Yang Yêsu. Msĕ si Khua Yang Yêsu gưt asăp nanao, mtô hưn leh anăn ngă djŏ jih klei Ama čiăng (Y-Yôhan 5:19, 30), snăn bruă Yang Mngăt Jăk ăt lŏ čuê mtô hưn, bi hriăm jih jang klei Khua Yang Yêsu mtô hưn leh, leh anăn ngă bi leh hdră bruă klei bi mtlaih Aê Diê brei kơ mnuih. Aê Diê Ama jing phŭn kyuadah Khua Yang Yêsu mă tŭ leh bruă tiŏ nao mơ̆ng Ama, leh anăn bruă klam mơ̆ng Yang Mngăt Jăk jing mtô hưn jih jang klei mơ̆ng Khua Yang Yêsu leh anăn jih jang klei bi êdah kơ phung ƀĭng kna.
Phung đăo kơ Krist hŏng ai ktang pô amâo dưi ôh êbat hjăn păn ti lăn ala bŏ hŏng lu mnêč mplư yang jhat dôk kăp. Khua Yang Yêsu pô yơh jing êlan klei hdĭp leh anăn Yang Mngăt Jăk jing Pô atăt gai drei êbat ti êlan anăn. Yang Mngăt Jăk yơh Jing Pô Bi Juh, jing Pô mtô bi hriăm, Pô Dŏng mgang leh anăn wăt jing Pô Atăt gai hŏng klei sĭt êmĭt hlăm klei sĭt nik.
Phŭn akŏ klei ktang myang mơ̆ng Yang Mngăt Jăk jing mnơ̆ng brei yuôm bhăn Khua Yang Yêsu kwưh akâo leh kơ Aê Diê Ama brei kơ phung anak ƀuôn sang Ñu. Brei drei hŏng jih ai tiê đăo knang leh anăn wah lač čiăng dưi hmư̆ asăp blŭ mơ̆ng Yang Mngăt Jăk đru drei dưi găn gao jih klei lông dlăng hlăm lăn ala bi roh hŏng drei, leh anăn bi leh bruă jao myang jing hưn lar Klei Mrâo Mrang Jăk bi mtlaih kơ jih jang mnuih tơl truh hruê Khua Yang Yêsu lŏ hriê.
Ya klei drei čuăn ngă tơdah leh ruê̆ knăm bi hdơr Yang Mngăt Jăk truh?
Wah lač: Ơ Ama, bi mni kơ Ama brei leh Yang Mngăt Jăk kơ kâo. Akâo kơ Yang Mngăt Jăk bi juh, bi hriăm, leh anăn atăt gai kâo dôk hdĭp nanao hlăm klei sĭt nik kluôm dhuôm. Akâo Khua Yang răng mgang leh anăn brei kơ kâo klei ktang myang mơ̆ng Khua Yang čiăng kơ kâo jhŏng hưn Klei Mrâo Mrang Jăk kơ jih jang mnuih. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y-Êsai 37
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
