Yauhas 16:13-15
Nqe cim:
“Thaum Vaj Ntsujplig tus uas qhia qhov tseeb los lawm, nws yuav qhia qhov tseeb rau nej; nws yuav tsis hais raws li nws xav, tiamsis nws tsuas hais tej uas nws tau hnov, thiab nws yuav qhia tej uas yuav muaj los yav tom ntej rau nej” (Yauhas 16:13)
Lus nug rau sawvdaws xav:
– Vim li cas Tswv Yexus thov Vaj Leej Txiv pub Vaj Ntsujplig rau Nws cov Menyuam?
– Vaj Ntsujplig feem xyuam yog dab tsi?
– Vaj Ntsujplig nqis los ntsig txog li cas peb lub neej nrog tus Tswv mus?
Cov Yixalayees txhua tus puavleej paub hais tias lawv yeej tsis muaj peevxwm hla dhau lub tiaj suab puam Xinais uas loj thiab dav ntawd li, yog tias tsis muaj ib tug coj kev uas paub kev zoo. Ib yam li ntawd, Tswv Yexus paub ua ntej hais tias Nws cov thwjtim yuav muaj kev ntxhov siab thiab yuam kev hauv ua neej thaum Nws tsis nrog lawv nyob lawd. Yog li ntawd Tswv Yexus thiaj thov Leej Txiv txib Vaj Ntsujplig tus pab los nrog Nws cov menyuam nyob txhawb lawv zog thiab coj lawv kev kom sawv ruaj rau txoj mus Ntuj Ceebtsheej. Tswv Yexus hais tias: “Thaum Vaj Ntsujplig tus uas qhia qhov tseeb los lawm, nws yuav qhia qhov tseeb rau nej; nws yuav tsis hais raws li nws xav, tiamsis nws tsuas hais tej uas nws tau hnov, thiab nws yuav qhia tej uas yuav muaj los yav tom ntej rau nej” (nqe 13). Vaj Ntsujplig yog Tus uas rov coj cov thwjtim ntxiv mus tagnrho rau qhov tseeb. Qhov no pom muaj tseeb nyob hauv Tes Haujlwm 2:1-41, thaum uas Vaj Ntsujplig nqis los rau hnub Peetekos, Nws pub rau cov thwjtim tswvyim thiab muaj lub siab tawv uas xav tsis thoob, hauv kev ntshai tsis paub dab tsi dhau los muaj lub siab uas ua raws li Tswv Yexus lolus samhwm, thawj zaus qhia tawm Txoj Moo Zoo muaj tibneeg los ntseeg coob tshaj qhov uas tibneeg xav.
Hauv nqe 14-15, kuj zoo ib yam li Tswv Yexus tes haujlwm yog txhawb nqa Vaj Leej Txiv, Vaj Ntsujplig tes haujlwm yog txhawb nqa Tswv Yexus. Zoo li Tswv Yexus ib txwm mloog Leej Txiv lus, qhia thiab ua raws li Leej Txiv siab nyiam (Yauhas 5:19, 30), ces Vaj Ntsujplig feem xyuam kuj yog rov qhia txhua yam uas Tswv Yexus twb qhia lawm thiab ua tiav Vajtswv txoj kev cawmdim uas twb npaj tseg rau tibneeg lawm. Vaj Leej Txiv yog lub hauv paug vim Tswv Yexus txais lub luag haujlwm ntawd ntawm Leej Txiv, thiab Vaj Ntsujplig feem xyuam yog qhia tej uas los ntawm Tswv Yexus los thiab tej uas twb qhia rau cov thwjtim lawm.
Ib tug ntseeg yeej tsis muaj peevxwm kovyeej txoj kev ua neej uas muaj puv npo dab ntxwg nyoog txoj kev dag ntxias. Tswv Yexus yog txoj kev thiab yog txoj sia thiab Vaj Ntsujplig yog Tus coj peb taug txoj kev ntawd. Vaj Ntsujplig yog Tus txhawb zog, tus qhia, tus pab thiab yog tus coj peb kev mus rau qhov tseeb.
Lub zog uas zoo kawg nkaus los ntawm Vaj Ntsujplig yog ib yam khoom plig muaj nqis heev uas Tswv Yexus tau thov Vaj Leej Txiv pub rau Nws cov Menyuam. Peb yuavtsum tas siab vamkhom Vajtswv thiab thov Vajtswv kom hnov Vaj Ntsujplig tej lus qhia thiaj pab tau peb hla tej kev sim siab tawmtsam hauv lub ntiajteb no, thiab ua tiav Vajtswv tej lus samhwm, qhia Txoj Moo Zoo cawmdim mus txog hnub Tswv Yexus rov los.
Thov Vajtswv,
Vajtswv, nyuam yaus ua Koj tsaug uas tau pub Vaj Ntsujplig rau nyuam yaus. Thov Vaj Ntsujplig txhawb nyuam yaus zog, qhia thiab coj nyuam yaus kev ua neej raws Vajtswv Txojlus tseeb. Thov Vaj Leej Txiv Koj tiv thaiv thiab pub Koj lub zog rau nyuam yaus kom muaj lub siab tawv qhia Koj Txoj Moo Zoo Cawmdim rau neeg ntiajteb. Nyuam yaus tuav Tswv Yexus Khetos lub npe thov. Amees.
Peb txiav txim siab ua dab tsi tom qab uas ua koobtsheej Vaj Ntsujplig nqis los?
Nyeem Vajluskub hauv peb lub xyoos: Yaxayas 37
Kênh Youtube BHKTHN:
