Pajlug 16:16-19
Nqe cim:
“Tiamsis nej yuav tsum xub nrhiav Vajtswv lub Tebchaws thiab ua raws li Vajtswv lub siab nyiam tso, Vajtswv mam muab tej no ntxiv rau nej” (Mathais 6:33).
Lus nug rau sawvdaws xav:
– Ntu Vajluskub no qhia kom xaiv yuav yam twg?
– Xaiv yog lossis yuam yuav tau txais nqi zog sib txawv licas?
– Koj cheemtsum hloov pauv licas kom koj lub neej tau txais yam zoo thiab lub tswvyim zoo?
Vajntxwv Xalumoos nyiam siv qhov kev sib piv lossis muab ob yam sib txawv los qhia nws cov menyuam paub xaiv ua qhov zoo. Nyob hauv 4 nqe Vajluskub luv luv no, Xalumoos qhia peb yam rau tus neeg muaj tswvyim xaiv. Tim ib, xaiv ua neej txawj ntse zoo dua xaiv khoom txhua yam (nqe 16). Tibneeg rau siab ua haujlwm kom npluanuj nyob hauv ntiajteb no tsis txhaum, tiamsis qhov txhaum lossis tsis zoo mas yog thaum lawv muab tej khoom uas nyob ib vuag dua hauv ntiajteb no saib tseemceeb dua sab ntsujplig uas nyob ntev dhawv mus ibtxhis saum ntuj. Tus uas hwm tus Tswv thiaj yog tus uas muaj kev txawj ntse lossis yog qhov tseemceeb ntawm txojkev txawj ntse. Kev txawj ntse lossis lub tswvyim tseeb yuav coj tibneeg mus cuag tau Vajtswv thiab ua rau tibneeg tau lub neej npluamias mus tsis paub kawg. Tim ob, xaiv taug txojkev ncaj ncees thiaj zam dhau tej kev phem kev qias (nqe 17). Ntau zaus koj pom hais tias yus tsis muaj nyiaj txiag, swb lwm tus thaum ua neeg ncaj ncees, tiamsis thaum lub neej xaus, koj yuav yog tus npluanuj sab ntsujplig, tau txojsia ntev dhawv mus ibtxhis. Vajntxwv Xalumoos hais txog nqe lus “ua tib zoo saib txojkev uas koj yuav mus” qhia kom cov menyuam ua zoo saib, ceevfaj vim thaum tsis xyuam xim yuav ua rau lawv yuam kev, poob mus rau txojkev ua txhaum. Nws qhia kom cov menyuam yuav tsum muaj homphiaj ua neej, txawm yog txomnyem, nyuaj siab licas los yuav tsum taug txojkev zoo mus txog thaum kawg xwb. Tim peb, xaiv txo hwjchim zoo dua ua neeg khavtheeb (nqe 18-19). Vajntxwv Xalumoos hais tias: “Kev khavtheeb coj mus raug kev puastsuaj, thiab kev muab hlob yuav poob ntsejmuag”. Vajtswv ntxub “ua qhovmuag qaujles” (Pajlug 6:16-17), Nws yuav rhuav tshem cov neeg muab hlob (Pajlug 15:25). Kev khavtheeb tsis yog tawmtsam tus Tswv lub siab nyiam xwb, nws tseem coj tibneeg mus raug kev puastsuaj, poob ntsejmuag thiab.
Vajtswv pub rau tibneeg muaj kev ywjpheej xaiv, thiab Vajtswv Txojlus qhia rau peb paub xaiv qhov zoo kom peb tau txais tej uas muaj nqis thiab lub tswvyim zoo dua. Tswv Yexus hais tias “Tiamsis nej yuav tsum xub nrhiav Vajtswv lub Tebchaws thiab ua raws li Vajtswv lub siab nyiam tso, Vajtswv mam muab tej no ntxiv rau nej” (Mathais 6:33). Tus Tswv xav kom peb txhua tus ua neeg muaj tswvyim kom peb paub hwm tus Tswv, ua neej ncaj ncees peb thiaj tau txais Vajtswv lub Tebchaws, thiab ua neeg txo hwjchim qhia tawm txojkev hwm tus Tswv thiab qhia tshwm tus Tswv txoj koob hmoov pub dawb mus rau txhua tus. Xav kom peb txhua tus tsis txhob vim tej uas nyob ib vuag yuav puas tsuaj hauv ntiajteb no, es ua poob yam muaj nuj nqis nyob mus ibtxhis uas nyiaj yuav tsis tau.
Koj tabtom siv qhov kev ywjpheej xaiv zoo licas? Zaj kawm no pab tau koj yam dabtsi?
Thov Vajtswv
Vajtswv, nyuam yaus ua Koj tsaug vim Koj qhia nyuam yaus paub xaiv qhov yog thiab ua neej muaj tswvyim raws li Koj nyiam. Thov Koj pab kom nyuam yaus paub ua neeg txawj ntse, ncaj ncees thiab txo hwjchim raws li Koj lub siab nyiam. Amees.
Nyeem Vajluskub hauv peb lub xyoo: Phau Ntawv Nkauj 70:1-72:20.
