Klei Aê Diê Blŭ: Klei Bi Hriêng 16:16-19
Êlan kliăng: “Ƀiădah brei diih duah êlâo hĭn ƀuôn ala mtao Aê Diê leh anăn klei kpă ênô Ñu, leh anăn Ñu srăng thiăm brei kơ diih jih jang mnơ̆ng anăn.” (Y‑Mathiơ 6:33).
Klei êmuh ksiêm mĭn: Kdrêč Klei Aê Diê Blŭ anei kñăm mâo dŭm mta klei brei ruah? Ya boh srăng mă tŭ mdê mdê mơ̆ng klei ruah djŏ, amâodah ruah soh? Si klei ruah brei drei bi mlih hĕ čiăng kơ klei hdĭp drei dưi mă tŭ ênoh yuôm bhăn hĭn leh anăn thâo mĭn hĭn?
Mtao Salômôn khăng yua hdră êlan bi msĕ amâodah bi mklăk čiăng mtô anak ruah klei jăk hĭn. Hlăm 4 êlan Klei Aê Diê blŭ đŭt anei, ñu kñăm tlâo klei ruah hlăm knhuah hdĭp thâo mĭn. Tal sa, brei anak ruah dôk hdĭp thâo mĭn hĭn kơ ruah ngăn drăp mnơ̆ng mnuă (êlan 16). Anak mnuih amâo soh ôh tơdah kriăng kreh mă bruă čiăng mâo klei mdrŏng sah ti lăn ala, ƀiădah jing soh tơdah knŏng tui tiŏ ênoh tŭ dưn mơ̆ng mnơ̆ng mnuă jĭng êjai hlăm klei hdĭp đŭt bhiâo ti lăn ala ƀiădah bi luč hĕ ngăn drăp mngăt myang adôk nanao hlŏng lar ti dlông adiê. Huĭ mpŭ kơ Yêhôwa jing kčưm dơ̆ng amâodah phŭn klei thâo mĭn. Klei thâo mĭn sĭt atăt anak mnuih nao kơ Aê Diê leh anăn ba kơ anak mnuih klei hdĭp êbeh dlai hlŏng lar. Tal dua, brei anak ruah êbat êlan kpă ênô hrô kơ hlue êlan phung ƀai (êlan 17). Lu blư̆ anak srăng ƀuh luh liê, hriă luč êdu awăt hĭn kơ arăng hlăm prăk kăk ngăn drăp tơdah dôk hdĭp kpă ênô, ƀiădah ti knhal tuč klei hdĭp, anak srăng mă tŭ klei mdrŏng hlăm mngăt myang, klei hdĭp êbeh dlai hlŏng lar. Mtao kñăm kơ boh blŭ “răng kriê kơ êlan ñu êbat pioh mngăt ñu” mñă kơ anak brei uêñ mĭn, thâo răng kyuadah tăp năng kƀah klei răng amâodah mluk mgu ngă kơ anak wơr êlan, lĕ hlăm ƀăng êlam klei soh. Brei anak dlăng klă phă anôk kñăm čiăng brei anak êbat nao, thâodah dleh dlan knap mñai dưn ăt êbat djŏ êlan, tơl truh kơ anôk bi kčah. Tal tlâo, brei anak ruah klei luă gŭ hĭn kơ klei mgao (êlan 18-19). Mtao Salômôn kñăm: “Klei mgao nao êlâo kơ klei rai luč, leh anăn klei krưh nao êlâo kơ klei lĕ”. Aê Diê bi êmut kơ “ală dlăng hŏng klei krưh” (Klei Bi Hriêng 6:16-17), Ñu srăng bi klưh sang phung mgao (Klei Bi Hriêng 15:25). Klei mgao ngă kơ anak bi kdơ̆ng hŏng klei Aê Diê čiăng leh anăn wăt atăt anak kơ klei rai luč, êbuh lĕ êjai ti lăn ala mơh.
Aê Diê brei kơ anak mnuih mâo klei êngiê dưi hrŏng ruah, leh anăn Klei Aê Diê Blŭ đru drei thâo ruah klei jăk hĭn čiăng dưi mă tŭ ênoh yuôm bhăn leh anăn thâo mĭn hĭn. Khua Yang Yêsu lač: “Ƀiădah brei diih duah êlâo hĭn ƀuôn ala mtao Aê Diê leh anăn klei kpă ênô Ñu, leh anăn Ñu srăng thiăm brei kơ diih jih jang mnơ̆ng anăn.” (Y‑Mathiơ 6:33). Khua Yang čiăng kơ grăp čô drei dôk hdĭp thâo mĭn čiăng huĭ mpŭ kơ Aê Diê, dôk hdĭp kpă ênô čiăng dưi dưn Ƀuôn Jăk Aê Diê, leh anăn dôk hdĭp luă gŭ čiăng bi êdah klei huĭ mpŭ kơ Khua Yang leh anăn bi êdah klei khăp klei pap Khua Yang kơ jih jang mnuih. Hmăng hmưi kơ grăp čô drei đăm ôh kyua ênoh tŭ dưn bhiâo, djăl rai ti lăn ala tơl ngă bi luč hĕ klei yuôm bhăn dôk nanao hlŏng lar amâo dưi blei hŏng prăk kăk ôh.
Si drei dôk yua klei êngiê dưi ruah? Ya klei đru diih mơ̆ng klei hriăm anei?
Wah lač: Ơ Khua Yang, bi mni kơ Khua Yang kyua mtô kâo brei thâo ruah bi djŏ leh anăn dôk hdĭp thâo mĭn tui hlue êlan Ih. Akâo kơ Khua Yang đru kâo dôk hdĭp thâo mĭn, kpă ênô leh anăn luă gŭ bi mơak kơ Khua Yang.
Dlăng Klei Aê Diê Blŭ hlăm tlâo thŭn: Klei Mmuñ Hđăp 70:1-5; 71:1-24; 72:1-20
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
