I Kauleethaus 5:1-8
Nqe cim:
“Nej yuav tsum muab tej keeb qub uas yog txojkev txhaum tso povtseg, nej thiaj yuav ua tau neeg dawbhuv. Yog nej ua li ntawd, nej thiaj yuav zoo li lub ncuav tshiab uas tsis xyaw keeb; kuv paub hais tias tsis muaj keeb nyob hauv nej lawm. Rau qhov Yexus Khetos uas yog tus menyuam yaj uas luag muab tua ua kevcai Hla Dhau, nws twb tuag theej peb lub txhoj lawm” (1 Kauleethaus 5:7)
Lus nug xav:
– Pawg ntseeg Kauleethaus muaj tus cwjpwm li cas rau cov ntseeg ua nkauj ua nraug?
– Timthawj Paulus siv tus duab “keeb” thiab “ncuav tsis xyaws keeb” los qhia txog yam dabtsi?
– Timthawj Paulus qhia Pawg ntseeg cheem tsum muaj tus cwjpwm thiab ua tes haujlwm meej pem twg?
– Peb yuav tsum ua dabtsi thaum uas muaj kev tsis dawbhuv txog kev nkauj nraug ntawm koj?
Qhov uas muaj ib tug ntseeg ua txhaum kev nkauj nraug txog qib uas pw nrog nws txiv tus niam yau ntawm Pawg ntseeg timthawj Paulus tsim tsa, ua rau Paulus xav tsis thoob thiab nyuaj siab kawg li. Txawm li ntawd los, qhov uas timthawj Paulus xav tsis thoob tshaj plaws yog tus cwjpwm tsis txhawj, tsis nyuaj siab, “tseem muaj plhus khav” ntawm cov ntseeg Kauleethaus txog tus neeg ua txhaum ntawd (nqe 2). “Nyuaj siab” yog lo lus siv thaum lub sijhawm quaj rau ib tug neeg tuag, qhia tshwm kev mob siab thiab nyuaj siab twjywm ntawm ib tug tibneeg. Tsimnyog nyuaj siab quaj ntsuag rau yus cov kwvtij ntseeg ua txhaum loj, tiamsis cov ntseeg Kauleethaus “tseem khav” (nqe 2). Puas yog lawv txaus siab hais tias vim yus muaj “lub siab dav” hauv xav fab (quan điểm) txog kev nkauj nraug, yus “saib taus qhov sib txawv” hauv kev ua neej, yus nyiaj taus “vim ntawd yog luag tej teebmeem”, zoo li qhov uas tibneeg pheej xav niaj hnub nim no!
Cia kom pab tau Pawg ntseeg Kauleethaus nkag siab txog txoj kev txaus ntshai loj heev ntawm lawv tus cwjpwm coj yoojyim, tsis quavntsej leejtwg ntawd, timthawj Paulus siv tus duab ntawm cov keeb los qhia: “Ib qhov keeb me me xwb ua rau lub ncuav su tuaj” (nqe 6), kev txhaum ntawm ib tug neeg muaj taug kis mus rau ntau tus neeg hauv Pawg ntseeg. Lo lus “cov qub keeb uas yog kev txhaum thiab kev phem kev qias” hauv nqe 8 txawv “cov ncuav tsis xyaw keeb uas yog txojkev ncaj ncees thiab kev tseeb”. Keeb qub yog txoj kev xav, txoj kev ua neej, thiab tus cwj pwm ntawm ib tug tibneeg thaum tseem tsis tau txais kev cawmdim, thiab tej no yuav raug “ua kom huv mus”. Lub neej tshiab, txoj kev coj tshiab piv rau “cov ncuav tsis xyaw keeb” (nqe 7–8).
Yog li ntawd, Pawg ntseeg yuav tsum muaj tus cwjpwm li cas rau txoj kev txhaum nkauj nraug uas Vajluskub twb hais meej lawm? Yuav tsum “nyuaj siab”, siv zog qhuab ntuas, yog tseem tsis kam tso kev txhaum tseg, ces yuav tau muab rho tawm Pawg ntseeg thiab “muab tus ntawd cob rau dab Ntxwgnyoog”. Tej kev ua txhaum tabmeeg sawvdaws ntawm ib tug neeg yog tsis qhuab ntuas kom nruj, ntxov tsis lig yeej yuav kis mus rau Pawg ntseeg. Txawm li ntawd los, yuav tsum qhuab ntuas los ntawm tus cwjpwm “nyuaj siab” thiab thov Vajtswv rau yus tus kwvtij ntseeg ntawd kom “txog Hnub uas tus Tswv los tus ntawd tus ntsujplig thiaj yuav dim” (nqe 5).
Thov Vajtswv pab kom peb txiav txim siab tshem tawm cov keeb qub uas tseem muaj nyob hauv peb lub neej. Yog muaj txoj kev tsis dawbhuv twg txog nkauj nraug nkag los rau peb txoj kev xav, thiab peb tus cwjpwm, vamkhom Vajtswv ntxhuav peb lub neej dawbhuv kom peb muaj lub neej ua rau Vajtswv tau ntsejmuag nyob hauv Pawg ntseeg thiab tej neeg uas tsis ntseeg Vajtswv.
Thov Vajtswv,
Vajtswv, thov pab nyuam yaus txhob ua yoojyim rau kev txhaum lossis cia kev txhaum nyob twjywm hauv nyuam yaus lossis koom nrog lwm tus ua kev txhaum. Tiamsis thov pab nyuam yaus paub siv kev nyuaj siab, kev ntuas nruj rau tus ua txhaum thiab thov Vajtswv pab lawv kom lawv tsim los lees kev txhaum thiab tau Koj zam txim. Nyuam yaus tuav Tswv Yexus Khetos lub npe thov, Amees.
Peb tabtom yog “cov ncuav muaj keeb” lossis “cov ncuav tsis muaj keeb” hauv seem kev ua neej zoo?
Nyeem Vajluskub hauv peb lub xyoos: Tshwmsim 20
Kênh Youtube BHKTHN:
