Klei Aê Diê Blŭ: I Kôrantô 5:1-8
Êlan kliăng: “Mă hĕ kpei hđăp, čiăng kơ diih dưi jing kpŭng mrâo, kyuadah sĭt nik diih amâo mâo kpei ôh. Kyuadah Krist, êđai biăp Knăm Klei Găn drei, arăng myơr ngă yang leh” (I Kôrantô 5:7)
Klei êmuh ksiêm mĭn: Si knuih Phung Sang Aê Diê Kôrantô hŏng phung đăo hdĭp ngă knhông? Ya klei ñu čiăng mtô êjai yua rup “kpei” leh anăn “kpŭng amâo mâo kpei”? Si knuih leh anăn bruă ngă Khua ƀĭng kna Y-Pôl mtô kơ Phung Sang Aê Diê brei mâo? Ya drei ngă tơdah mâo klei amâo doh jăk hlăm klei bi dôk êkei mniê hlăm pô?
Bruă mâo sa čô đăo hdĭp knhông tơl dôk hŏng mô̆ hjŭng ama pô hlăm Phung Sang Aê Diê anôk Khua ƀĭng kna Y-Pôl mâo klei mĭn mkŏ mjing leh anăn mkŏ mjing leh ngă ñu bi kngăr leh anăn ruă ai tiê. Khădah snăn, klei ngă kơ ñu bi kngăr hĭn jing knuih amâo mâo ruă ênguôt ôh, boh nik lŏ “jing mgao” mơ̆ng phung đăo hlăm
Phung Sang Aê Diê Kôrantô hŏng pô ngă soh anăn (êlan 2). “Ênguôt” jing boh blŭ yua hlăk êjai čŏk hia kơ mnuih djiê, bi êdah klei ênguôt hnĭng hlăm ai tiê sa čô mnuih. Hrô kơ ênguôt, čŏk hia hlăk ayŏng adei pô ngă soh kjham, phung đăo ti Kôrantô “ăt ngă mgao” (êlan 2). Djŏ mơ̆ diñu ktưn hưn kyua pô mâo ai tiê “amâo dlăng yuôm ôh” hlăm klei mĭn bi dôk êkei mniê, pô “mpŭ kơ klei mdê” hlăm knuih hdĭp, kyua pô “rông ba” tơdah lač “anăn jing bruă arăng gơ̆”, msĕ si klei arăng ăt khăng bi mĭn hruê anei.
Čiăng đru kơ Phung Sang Aê Diê Kôrantô thâo săng kơ hnơ̆ng huĭ hyưt leh anăn kjham mơ̆ng knuih ênưih, ngơi mang msĕ snăn, Khua ƀĭng kna Y-Pôl yua rup kpei čiăng bi hmô. “Diih amâo thâo hĕ kpei ƀiă dưi bi buk jih klŏ kpŭng” (êlan 6), klei soh sa čô mnuih mâo klei tưp lar kơ lu mnuih hlăm Phung Sang Aê Diê. Boh blŭ “kpei klei mplư leh anăn klei ƀai” hlăm êlan 8 bi mklăk hŏng “kpŭng amâo mâo kpei jing klei doh leh anăn klei sĭt nik”. Kpei hđăp jing klei mĭn, knuih hdĭp, klei dôk dơ̆ng ƀơ̆ng huă anak mnuih hlăk êjai ka mâo klei bi mtlaih, leh anăn brei “bi mdoh” ñu. Klei hdĭp mrâo, klei ngă mrâo kơh dưi bi hmô hŏng “kpŭng amâo mâo kpei” (êlan 7-8).
Snăn Phung Sang Aê Diê brei mâo si knuih hŏng klei knhông kjham snăk mâo Klei Aê Diê kčah klă mngač msĕ snăn? Brei “ênguôt”, jih ai tiê mtô lač, tơdah diñu ăt kăn kmhal mơh, brei lăm lui pô anăn mơ̆ng Phung Sang Aê Diê hŏng klei “jao hĕ êkei anăn kơ Satan bi rai hĕ kđeh ñu”. Klei soh hưn mdah klă mngač sa čô mnuih tơdah amâo dưi kpĭ mjuăt klă mngač, amâo hnui ôh srăng tưp lar hlăm Phung Sang Aê Diê. Khădah snăn, brei kpĭ mjuăt hŏng knuih “ênguôt”, leh anăn wah lač kơ ayŏng adei pô čiăng “mngăt ñu dưi tlaih hlăm hruê Khua Yang Yêsu” (êlan 5).
Akâo kơ Khua Yang đru drei gĭr lui kpei hđăp ăt dôk hlăm klei hdĭp drei. Tơdah mâo klei amâo doh jăk kơ klei bi dôk êkei mniê dôk mŭt hlăm klei mĭn leh anăn bruă ngă drei, akâo kơ Khua Yang đru drei knang kơ klei pap Ñu bi doh čiăng kơ knuih hdĭp drei bi guh kơang Anăn Aê Diê hlăm Phung Sang Aê Diê leh anăn êpul êya phung ka thâo kral Khua Yang.
Drei dôk jing “kpŭng mâo kpei” amâodah “amâo mâo kpei” hlăm knuih hdĭp?
Wah lač: Ơ Khua Yang, akâo kơ Ih đru kâo amâo ênưih leh anăn sa ai ôh hŏng klei soh pô leh anăn phung găp djuê pô, ƀiădah yua knuih thâo ênguôt leh anăn bruă ngă kjăp hŏng ai tiê wah lač čiăng đru kơ kâo pô leh anăn ayŏng amai adei pô mdih, kmhal klei soh leh anăn dưi bi mrâo. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Klei Bi Êdah 20
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
