Klei Aê Diê Blŭ: Bruă Phung Khua Ƀĭng Kna 12:1-12
Êlan kliăng: “Êjai Ñu dôk hdĭp hlăm asei mlei, Yêsu wah lač leh anăn kwưh hŏng klei ur ktang leh anăn hŏng êa ală kơ Pô dưi bi mtlaih Ñu mơ̆ng klei djiê; leh anăn Aê Diê hmư̆ Ñu leh kyua Ñu huĭ mpŭ kơ Aê Diê.” (Hêbrơ 5:7)
Klei êmuh ksiêm mĭn: Tơdah arăng mă krư̆ khua ƀĭng kna Y-Pêtrôs, ya bruă Phung Sang Aê Diê ngă leh? Si boh tŭ mâo? Ya ngă brei drei wah lač hŏng jih ai tiê leh anăn amâo mdei ôh?
Boh klei jing mơ̆ng jih klei wah lač hŏng jih ai tiê anei jing Phung Sang Aê Diê tal êlâo mâo lu klei myang, ênoh phung đăo đĭ lu pral snăk, dơ̆ng lar truh kơ phung ƀuôn sang tue. Yang jhat amâo lui Phung Sang Aê Diê dôk hơĭt ênang ôh, leh anăn djŏ tui si klei Khua Yang Yêsu lač leh êlâo, “Hlăm lăn ala diih srăng mâo klei knap mñai;” (Y-Yôhan 16:33). Klei truh kdlưn dlông hĭn jing klei arăng ngă jhat kơ dua gơ̆ng kmeh Phung Sang Aê Diê: Arăng khăt kkuê khua ƀĭng kna Y-Yakơ, bi khua ƀĭng kna Y-Pêtrôs arăng mă krư̆ hlăm war mnă. Phung Sang Aê Diê hlăk anăn knŏng mâo sa êlan čiăng dưi găn klei lông dlăng, anăn jing “Snăn Y-Pêtrôs tŭ klei krư̆ hlăm war; ƀiădah Phung Sang Aê Diê wah lač kơ gơ̆ hŏng jih ai tiê.” (êlan 5).
Tơdah klei pap Khua Yang truh kơ hnơ̆ng bi kčah, snăn drei srăng tuôm hŏng klei lông dlăng ktang hĭn mơh, leh anăn tăp năng amâo ƀuh klei myang ôh. Khua ƀĭng kna Y-Yakơ hlăm boh klei truh anei. Khua ƀĭng Y-Pôl hlăk dôk hlăm anôk bruă kdlưn dlông hĭn, Khua Yang dưm sa aruăt êruê hlăm asei mlei ñu, ñu ruă knap tơl wah lač hŏng jih ai tiê lu blư̆ ƀiădah Khua Yang amâo mă mđuê̆ hĕ ôh kyuadah klei pap kơ ñu djăp leh (II Kôrantô 12:6-10). Tăp năng Khua Yang yua lu gưl klei dleh dlan amâodah klei mmăt tĭt hĭn truh hlăm klei hdĭp tui hlue Khua Yang čiăng kơ drei đĭ hriê kơ prŏng hĭn hŏng klei wah lač hŏng jih ai tiê hĭn. Hlăm klei truh kơ khua ƀĭng kna Y-Pêtrôs, wăt tơdah êjai mâo dĭng buăl jăk bi mtlaih, ñu ăt mĭndah ñu dôk mâo klei bi ƀuh (êlan 9)! Ƀiădah kyua hŏng klei jih Phung Sang Aê Diê wah lač hŏng jih ai tiê, Khua Yang brei klei săng đai ktlaih mơ̆ng kngan ñu leh anăn bi ktang kjăp klei đăo ñu.
Tơdah jih Phung Sang Aê Diê sa ai, hŏng jih ai tiê dôk gĭr wah lač amâo mdei ôh, mbĭt hŏng jih jang phung mniê dôk bi kƀĭn ti sang H’Mari (êlan 12), snăn klei myang bi êdah. Tăp năng drei akâo kơ Khua Yang brei kơ ayŏng adei drei ya mta klei, ƀiădah êdei kơnăn, hruê êdei kơnăn, hruê kăm êdei kơnăn… drei amâo hdơr ôh lŏ kwưh akâo brei! Khua Yang Yêsu brei leh klei bi hmô kơ drei wah lač hŏng jih ai tiê êjai dôk hdĭp hlăm kđeh, hlăm mmông knhal tuč Ñu wah lač leh hŏng êa ală (Hêbrơ 5:7), êa kơhŏ Ñu jing msĕ si kdrah êrah (Y-Luk 22:44).
Khua Yang mđing uêñ kơ klei phung anak ƀuôn sang Ñu kwưh akâo hŏng jih ai tiê, Ñu ƀuăn leh anăn čiăng brei kơ drei klei drei akâo, ƀiădah sĭt yơh kơ klei čiăng yuôm hĭn, amâo djŏ ôh kơ ya mta klei drei hmăng hmưi amâo jăk kơ drei. Khua Yang wĭt lač nanao ƀiădah tăp năng klei Khua Yang wĭt lač mâo djŏ tui si klei drei čiăng ôh kyuanăn năng ai drei amâo thâo kral. Brei drei ăt wah lač nanao hŏng jih ai tiê leh anăn wah lač amâo mdei ôh.
Si ngă drei wah lač hŏng jih ai tiê mơ̆ ti anăp klei lông dlăng, klei knap mñai?
Wah lač: Ơ Khua Yang, brei kâo dôk hdĭp nanao hlăm klei bi mguôp hŏng Khua Yang leh anăn hŏng jih ai tiê wah lač hlăm klei dleh dlan truh. Akâo Khua Yang đru kâo đăo kjăp kơ Khua Yang Pô khăp srăng brei ya klei jing jăk hĭn kơ kâo. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y-Êsai 38-39
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
