Klei Aê Diê Blŭ: Klei Kbiă 33:7:10
Êlan kliăng: “Kyuadah klei Ñu ăl dôk knŏng bhiâo, ƀiădah klei Ñu pap dôk nanao jih hruê arăng dôk hdĭp.” (Klei Mmuñ Hđăp 30:5a)
Klei êmuh ksiêm mĭn: Ya klei Y‑Môis ngă čiăng đru kơ phung ƀuôn sang wah lač kơ Aê Diê? Si ai tiê phung ƀuôn sang hŏng Aê Diê hlăk anăn? Ya klei yuôm bhăn kmeh knam ti ƀăng bhă sang čhiăm hŏng phung ƀuôn sang Israel hlăk anăn leh anăn hŏng drei hruê anei?
Hlăk êjai Aê Diê dôk ăl kyua phung ƀuôn sang Aê Diê kkuh kơ rup êđai êmô mah, Ñu hngah nao mbĭt hŏng diñu hlăm krĭng Kanaan ăt hngah klei Y‑Môis wah lač, Y‑Môis mdơ̆ng leh sa boh sang čhiăm nah êngao wăl ngă anôk wah lač kơ klei pô jih ai tiê čiăng duah Yêhôwa (êlan 7). Y‑Môis mdơ̆ng sang čhiăm nah êngao wăl kyua Aê Diê doh jăk amâo dôk ôh ti krah phung ƀuôn sang ngă soh kkuh kơ rup yang msĕ si Klei Aê Diê Blŭ čih leh. Khădah snăn, Y‑Môis đăo kơ knuih bŏ hŏng klei khăp mơ̆ng Aê Diê, Ñu srăng jih klei ngêñ leh anăn wĭt lač sĭt phung ƀuôn sang jih ai tiê wah lač hŏng Ñu.
Leh ƀuh Y‑Môis amâo mdơ̆ng ôh sang čhiăm ti krah wăl msĕ si Klei Aê Diê Blŭ čih (Klei Kbiă 25:8), phung ƀuôn sang ƀuh leh klei kjham jing Aê Diê amâo čiăng dôk ôh ti krah diñu. Diñu thâo răng hĭn, ktuê dlăng grăp knhuang êbat Y‑Môis tơl leh gơ̆ nao hlăm sang čhiăm klei bi kƀĭn. Hlăk anăn mtam, kmeh knam trŭn dôk ti ƀăng bhă sang čhiăm, jih jang phung ƀuôn sang kgŭ leh anăn kkuh mpŭ, grăp čô ti ƀăng bhă sang čhiăm ñu pô. Kmeh knam mưng hmư̆, bi knăl kơ klei Aê Diê trŭn mtam ti anăp ƀăng bhă sang čhiăm, anei jing klei čang hmăng kơ diñu. Aê Diê ăt pap kơ diñu. Klei Aê Diê trŭn ba kơ phung ƀuôn sang Ñu kmhal klei soh, Aê Diê mblang ală diñu thâo ƀuh klei mmăt tĭt hlăm mngăt leh diñu kkuh kơ rup êđai êmô mah jing yang diñu. Grăp čô mnuih dôk dơ̆ng ti anăp ƀăng bhă sang čhiăm, leh anăn kkuh mpŭ kơ Aê Diê. Klă sĭt phung ƀuôn sang Aê Diê thâo kral leh Yêhôwa msĕ si Mtao Đawit čih: “Yêhôwa jing jăk leh anăn thâo pap, amâo djăl ăl ôh, mdrŏng hŏng klei khăp. Ñu amâo ƀuah nanao ôh, kăn ñu djă pioh klei ñu ăl hlŏng lar rei. Ñu amâo ngă kơ drei tui si klei soh drei ôh, kăn bi kmhal rei tui si klei wê drei” (Klei Mmuñ Hđăp 103:8-10).
Sĭt ngă soh hŏng Aê Diê, drei ƀuh klei bi kgăn hlăm klei bi mguôp pô hŏng Aê Diê klă snăk. Hlue si klei mĭn khăng mâo, hlăk anăn msĕ si drei amâo jhŏng ôh leh anăn huĭ sĭt tlă anăp hŏng Aê Diê doh jăk. Khădah snăn, msĕ si sa čô Ama bŏ hŏng klei khăp, Aê Diê iêô mthưr drei wĭt, lŏ mkŏ klei bi mguôp siă suôr hŏng Ñu: “Nao bĕ hưn klei blŭ anei phă dưr leh anăn lač, ‘Lŏ wĭt bĕ, Ơ Israel amâo sĭt suôr, Yêhôwa lač, kâo amâo srăng dlăng kơ ih hŏng klei ngêñ ôh, kyuadah kâo thâo pap, Yêhôwa lač; kâo amâo srăng ngêñ nanao ôh” (Y‑Yêrêmi 3:12). Brei kmhal klei soh pô leh anăn wah lač hŏng Aê Diê čiăng Ñu pap brei (I Y‑Yôhan 1:9).
Ya drei khăng ngă sĭt ngă soh hŏng Aê Diê?
Wah lač: Bi mni kơ Aê Diê kyua klei pap leh anăn klei gĭr Aê Diê amâo mdei tui hlue kâo. Kâo thâo ƀuh klei pap Aê Diê răng mgang kâo leh anăn asăp Aê Diê iêô kwang sĭt kâo ngă soh. Akâo kơ Ih đru kâo wah lač nanao hŏng Aê Diê, lŏ dơ̆ng bi mguôp hŏng Ih msĕ si adhan ana boh kriăk ƀâo dôk nanao hlăm phŭn agha boh kriăk ƀâo čiăng dưi mboh lu.
Dlăng Klei Aê Diê Blŭ hlăm tlâo thŭn: Y‑Yêrêmi 17
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
