Khiavdim 33:7-10
Nqe cim:
“Nws txojkev chim tsuas nyob ib pliag xwb, nws txojkev ua zoo nyob mus tsis paub kawg li” (Phau Ntawv Nkauj 30:5a).
Lus nug rau sawvdaws xav:
- Mauxes ua dabtsi pab cov pejxeem nrhiav tus Tswv?
- Tus Tswv haivneeg nplooj siab rau tus Tswv zoo licas?
- Tauv huab txav los rau ntawm lub qhov rooj Tsevntaub muaj lub ntsiab licas rau cov Yixalayees hnub thaud thiab peb niaj hnub nimno?
Thaum tus Tswv chim vim Nws haivneeg mus pe tus mlom nyuj, Nws tsis nrog lawv mus hauv tebchaws Kana-as thiab tsis teb Mauxes tej lus thov lawm, Mauxes thiaj coj tus Tswv lub Tsevntaub mus rub rau tom ntug yeej ua chaw rau txhua tus uas mob siab nrhiav tus Tswv (nqe 7). Mauxes rub lub Tsevntaub rau tom ntug yeej vim Vajtswv tus uas Dawbhuv tsis nyob nrog cov neeg ua txhaum pe mlom li Nws tej lus hais tseg. Tiamsis, Mauxes cia siab rau tus Tswv txojkev hlub, tus Tswv yuav tsis chim ntev thiab yuav teb lawv tej lus taij thov tas siab tas ntsws.
Thaum pom Mauxes tsis rub lub Tsevntaub rau hauv nruab nrab lub yeej li Vajtswv Txojlus qhia (Khiavdim 25:8), tus Tswv haivneeg pom qhov teebmeem loj uas yog Vajtswv tsis xav nrog lawv nyob lawm. Lawv ceevfaj heev, lawv ntsia ntsoov Mauxes mus kom nkag plaws rau hauv lub Tsevntaub. Tamsim ntawd, tauv huab txawm txav los npog nkaus lub qhov rooj Tsevntaub, cov pejxeem txawm tawm hauv lawv tej tsev ntaub tuaj sawv ntawm nyias lub qhovrooj pehawm tus Tswv. Tauv huab ibtxwm piv rau kev tshwm ntsejmuag ntawm tus Tswv txav los rau ntawm lub Tsevntaub, ntawd yog lawv txojkev cia siab. Tus Tswv tseem hlub tshua lawv. Tus Tswv kev tshwm los ua rau Nws haivneeg lees kev txhaum, Nws qhib lawv lub qhov muag kom lawv pom lawv txojkev digmuag sab ntsujplig thaum saib tus mlom nyuj zoo li lawv tus vajtswv. Txhua tus sawv ntawm nyias lub qhovrooj pehawm tus Tswv. Tus Tswv haivneeg tau paub txog tus Tswv zoo li vajntxwv Daviv hais tias: “Tus TSWV yog tus siab dawb siab zoo thiab muaj kev hlub, Nws tsis chim sai thiab nws hlub mus ibtxhis. Nws tsis cem thiab nws tsis chim mus ibtxhis. Nws tsis rau txim rau peb raws li tej kev txhaum uas tsimnyog peb raug, lossis tsis ua pauj peb lub txim thiab tej kev txhaum uas peb ua” (Phau Ntawv Nkauj 103:8-10).
Thaum ua txhaum rau tus Tswv, peb pom meej txog kev sib raug zoo nrog tus Tswv raug tu ncua. Raws li kev xav, tej lub sijhawm ntawd peb ntshai los cuag Vajtswv tus uas Dawbhuv. Tiamsis, tus Tswv zoo li Leej Txiv puv npo txojkev hlub, Nws kub siab lug nqua hu peb rov qab los, txhim kho kev sib raug zoo nrog Nws. Tus Tswv nqua hu hais tias: “Yixalayees uas siab tsis ncaj, koj cia li rov los cuag kuv. Kuv yog tus uas muaj kev hlub thiab yuav tsis chim; kuv yuav tsis chim rau koj mus ibtxhis” (Yelemis 3:12). Cia li lees kev txhaum thiab taij thov tus Tswv kom tau Nws zam txim (I Yauhas 1:9).
Thov Vajtswv,
Tus Tswv, thov ua Koj tsaug vim Koj txojkev hlub thiab lub siab ntev muab pub rau nyuam yaus. Nyuam yaus pom Koj txojkev hlub thiab hnov Koj lub suab hu thaum mus yuam kev. Thov pab nyuam yaus paub nrhiav Koj, sib txuas nrog Koj zoo li ceg txiv hmab los txuas rau lub hauvpaus thiaj txi taus txiv. Amees.
Peb pheej ua dabtsi thaum ua txhaum rau tus Tswv?
Nyeem Vajluskub hauv peb lub xyoos: Yelemis 17
Kênh Youtube BHKTHN:
