Klei Aê Diê Blŭ: Y-Luk 18:1-8
Êlan kliăng: “Yêsu blŭ sa klei bi hriêng kơ digơ̆ čiăng bi hriăm digơ̆ jing yuôm wah lač nanao amâo êdu ai ôh.” (Y-Luk 18:1)
Klei êmuh ksiêm mĭn: Ya ngă khua phat kđi hngah lu blư̆ amâo mkra kđi kơ mniê djiê ung ôh? Ya êlan ba klei tŭ jing kơ mniê djiê ung anei? Ya ngă brei drei wah lač amâo mdei ôh?
Hruê anei drei lŏ čuê hriăm klei bi hriêng Khua Yang Yêsu yăl dliê. Hlăm ala ƀuôn phung Israel ênuk đưm, lu phung mniê djiê ung jing ƀun ƀin leh anăn kŏ krei asei hjăn kyuanăn arăng ktư̆ juă. Wăt tơdah klei Khua Yang mtô: “Đăm ktư̆ juă ôh mniê djiê ung amâodah anak êrĭt.” (Klei Kbiă 22:22) ƀiădah kyua amâo mâo pô dŏng mgang digơ̆ leh anăn wăt kăn mâo prăk sun rei, kyuanăn jih kđi digơ̆ akâo mkra khua phat kđi khăng amâo mkra brei ôh: “Phung khua kiă kriê ih … Grăp čô khăp kơ ngăn sun leh anăn tui tiŏ klei mưn. Diñu amâo mgang phung anak êrĭt ôh, kăn diñu uêñ rei kơ klei kpă phung mniê djiê ung.” (Y-Êsai 1:23). Knŏng hjăn klei huĭ mpŭ kơ Aê Diê yơh jing tur čiăng kơ khua phat kđi ksiêm dlăng klei kpă. Khua phat kđi hlăm klei bi hriêng Khua Yang yăl dliê amâo huĭ mpŭ kơ Aê Diê ôh, wăt kăn uêñ kơ mnuih rei, kyuanăn sui hruê leh ñu hngah mkra brei kđi gơ̆, mniê djiê ung amâo lŏ mâo êlan mkăn ôh knŏng hjăn sa êlan yơh jing dôk gĭr, kwưh akâo amâo mdei ôh.
Klei “lĭk” mơ̆ng mniê djiê ung anei bi rŭng, bi êmăn khua phat kđi, leh anăn knhal tuč hŏng klei mgô̆ mơan ñu mkra brei bi kpă kđi gơ̆. Khua Yang Yêsu čiăng yua rup anăn čiăng bi mđĭ ai phung ƀĭng kna amâo mdei ôh hlăm klei wah lač. Amâo msĕ ôh hŏng khua phat kđi anăn, “Hlăm anôk dôk doh jăk Ñu, Aê Diê jing ama kơ phung anak êrĭt, Pô mgang kơ phung mniê djiê ung.” (Klei Mmuñ Hđăp 68:5) snăn sĭt nik Ñu srăng mkra bi kpă kđi kơ digơ̆ djăl. Khua Yang lač: “Leh anăn amâo djŏ hĕ Aê Diê srăng mkra brei bi kpă kđi kơ phung Ñu ruah leh, phung krao kwưh kơ Ñu hruê mlam? Ñu srăng bi kdung hruê đru digơ̆ mơ̆? Kâo hưn kơ diih, Ñu srăng mkra brei bi kpă kđi kơ digơ̆ djăl. Ƀiădah tơdah Anak Mnuih hriê, Ñu srăng ƀuh klei đăo ti lăn ala mơ̆?” (êlan 7-8). “Krao kwưh kơ Ñu hruê mlam” jing “wah lač nanao, amâo êdu ai ôh”, čiăng lač wah lač amâo mdei ôh. Jih jang drei thâo wah lač sơăi leh anăn ăt khăng wah lač mơh. Ƀiădah mâo mơh đa đa blư̆ drei êdu ai kyua wah lač sui đei ƀiădah amâo ƀuh Khua Yang ôh. Ƀiădah Khua Yang jing Pô Thâo jih, Pô Thâo mĭn, srăng mkra brei klei dleh dlan kơ drei tui si hdră êlan Ñu, tui si hruê mmông Ñu, čiăng ba klei jăk hĭn kơ phung anak ƀuôn sang Khua Yang. Ñu čiăng ƀuh klei drei đăo dôk kjăp nanao, amâo êdu ai ôh.
Klei wah lač yap msĕ si klei bi êwa drei. Tơdah drei bi êwa amâo tuôm mdei ôh, msĕ snăn mơh brei amâo mdei ôh wah lač. Klei kñăm čiăng Khua Yang Yêsu blŭ klei bi hriêng čiăng bi hriăm drei dôk gĭr ai tiê wah lač nanao, đăm êdu ai ôh tơdah kwưh akâo kơ Khua Yang (êlan 1). Khua Yang jing jăk êdi! Khua Yang khăp đei kơ kâo! Kyuanăn, đăm mĭn ôh Ñu bi kdung wĭt lač kơ drei, kwưh akâo bĕ tơl truh hruê mmông Khua Yang. Ñu amâo bi kdung ôh!
Tơdah Khua Yang ka wĭt lač, drei ăt dôk gĭr wah lač nanao mơ̆?
Wah lač: Ơ Ama Pô jăk! Bi mni kơ Khua Yang bi mđĭ ai kâo ăt wah lač nanao, amâo êdu ai ôh. Brei kâo wah lač amâo mdei ôh, hruê mlam kwưh akâo kyuadah đăo sĭt Khua Yang srăng wĭt lač leh anăn mkra brei kđi kpă kơ kâo tui si hruê mmông Khua Yang. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y-Êsai 36
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
