Lukas 18:1-8
Nqe cim:
“Yexus hais ib zaj lus pivtxwv rau nws cov thwjtim hais tias, kom lawv niaj hnub thov Vajtswv tsis txhob qaug zog” (Lukas 18:1)
Lus nug rau sawvdaws xav:
– Vim li cas tus nom txiav txim ntau zaug tsis kam pab tus poj ntsuam hais nws rooj plaub?
– Haukev tus poj ntsuam yeej yog dab tsi?
– Vim li cas peb yuavtsum thov Vajtswv tsis tu ncua?
Hnub no peb rov qab kawm ntxiv zaj lus pivtxwv uas Tswv Yexus hais. Kev ua neej hauv cov Yixalayees hnub thaud, feem coob cov poj ntsuam yog tibneeg pluag thiab tsis muaj chaw vam, thiaj pheej raug luag tsim txom. Txawm yog Vajtswv Txojlus tau hais tias: “Nej tsis txhob tsimtxom ib tug pojntsuam lossis ib tug menyuam ntsuag twg” (Khiavdim 22:22) tiamsis tsis muaj leejtwg pab thiab kuj tsis muaj nyiaj xiab vim li ntawd lawv cov rooj plaub uas raug kom thiaj tsis muaj leejtwg pab hais: “Koj cov nomtswv tau ntxeev siab thiab thooj siab koom ntsws nrog cov neeg tubsab; lawv txaus siab rau tej nyiaj uas luag coj tuaj xiab thiab tej khoom pub. Lawv tsis pab txheem cov menyuam ntsuag hauv tsev tu plaub thiab tsis mloog cov pojntsuam tej lus peev” (Yaxayas 1:23). Tsuas yog kev ntshai Vajtswv xwb thiaj yog qhov uas tus txiav txim thiaj txiav txim ncaj ncees. Tus nom hauv zaj lus piv txwv uas Tswv Yexus hais nws tsis ntshai Vajtswv thiab tsis hwm leejtwg li, thiaj li ntau zaug tsis kam pab tus poj ntsuam hais nws rooj plaub, tus poj ntsuam tsuas tshuav tib txoj kev uas yog siab ntev thiab mus thov tsis tu ncua li.
Tus poj ntsuam kev thov tsis paub xaus uas rau tus nom txaiv txim ntxov siab thiab tsis tau zoo nyob li thaum kawg nws yuavtsum txiv txim ncaj ncees rau tus poj ntsuam. Tswv Yexus xav siv tus duab ntawd los txhawb cov thwjtim lub zog kom lawv thov Vajtswv tsis tu ncua. Vajtswv tsis zoo li tus nom ntawd, “Vajtswv tus uas nyob hauv lub Tuamtsev dawbhuv, nws tu cov menyuam ntsuag thiab tsomkwm cov pojntsuam” (Phau Ntawv Nkauj 68:5) yog li ntawd paub tseeb hais tias Vajtswv yuav pab hais lawv zaj sai sai. Tswv Yexus hais tias: “Vajtswv haivneeg uas niaj hnub niaj hmo thov Vajtswv pab, Vajtswv yuav tsis pab hais lawv zaj los? Vajtswv yuav tos ntev mam li pab lawv los? Kuv qhia rau nej hais tias, Vajtswv yeej yuav pab hais lawv zaj sai sai. Thaum Neeg Leej Tub los, cov neeg uas nyob hauv ntiajteb no puas yuav muaj tus uas ntseeg nws lawm?” (nqe 7-8). “Niaj hnub niaj hmo thov Vajtswv” yog “thov Vajtswv txhua lub sijhawm, tsis qaug zog li” lub ntsiab yog thov Vajtswv tsis tu ncua. Peb cov leejtwg paub thov Vajtswv thiab kuj kheev thov Vajtswv. Txawm li ntawd los muaj ib lub sijhawm peb yuav qaug zog, vim thov Vajtswv ntev tsis pom Vajtswv nyob qhov twg li. Tiamsis Vajtswv yog tus txawjntse, pom txhua yam, Nws yuav daws peb zaj raws li nws siab nyiam, yog Nws lub sijhawm kom Vajtswv cov menyuam txais tau yam uas zoo kawg nkaus. Nws xav pom peb kev ntseeg ruaj khov, tsis qaug zog.
Thov Vajtswv zoo li peb kev ua pa. Yog peb yuavtsum ua pa tsis so li, ces peb kuj yuavtsum thov Vajtswv tsis tu ncua. Homphiaj Tswv Yexus hais zaj lus pivtxwv no los qhia kom peb ua siab ntev thov Vajtswv mus li, tsis txhob qaug zog thov Vajtswv (nqe 1). Vajtswv muaj kev hlub tshua kawg nkaus! Nws hlub kuv heev! Yog li ntawd, tsis txhob xav hais tias tshuav ntev Vajtswv mam teb peb tej lus thov. Ciali txeev thov Vajtswv nruab hnub hmo ntuj mus txog thaum yog Vajtswv lub sijhawm. Nws yeej tsis tos ntev li!
Thov Vajtswv,
Vajtswv, Ua tsaug uas Koj txhawb nyuam yaus lub zog txeev thov Vajtswv mus li, thov tsis qaug zog. Thov pab nyuam yaus thov Vajtswv tsis tu ncua nruab hnub hmo ntuj, vim ntseeg hais tias koj yuav teb thiab ua ncaj ncees rau nyuam yaus thaum yog Koj lub sijhawm. Nyuam yaus tuav Tswv Yexus Khetos lub npe thov. Amees.
Yog Vajtswv tsis tau teb, peb puas tseem rov ua siab ntev txeev thov Vajtswv ntxiv?
Nyeem Vajluskub hauv peb lub xyoos: Yaxayas 36
Kênh Youtube BHKTHN:
