II Xwmtxheej Vajntxwv 19:1-3
Nqe cim: Pajlug 3:11-12:
“Metub, thaum tus Tswv qhuab ntuas koj, ua tib zoo mloog thiab khaws nkaus nws tej lus rau nruab siab kom koj thiaj paub ceevfaj. Tus Tswv qhuab ntuas tus uas nws hlub ib yam li leej txiv qhuab ntuas tus tub uas nws cia siab rau.”
Lus nug rau sawvdaws xav:
– Tus cevlus Yehus cem Vajntxwv Yehausafas yam dabtsi thaum vajntxwv rov los txog hauv vaj loog? Vim li cas?
– Vajntxwv tau qhuas dabtsi?
– Tus Tswv thuam lossis qhuas thaum Nws ntsia peb lub neej?
Vajntxwv Yehausafas rov qab los txog hauv nroog Yeluxalees kaj siab lug tom qab uas mus ntaus kob rog ntawm lub nroog Lamaus hauv cheebtsam Nkile-as, raws li tus cevlus Mikayas twb qhia ua ntej, txhua tus puavleej los txog tsev noj qab nyob zoo tshwj Vajntxwv Ahaj (II Xwmtxheej Vajntxwv 18:16). Tus Tswv txib Nws tus cevlus hu ua Yehus tuaj tos Yehausafas cem nws vim koom siab thiab pab Vajntxwv Ahaj, yog li “ua rau tus Tswv chim heev” (nqe 3).
Peb pom qhov tseemceeb uas tus Tswv cem. Nws “chim heev” thaum nws cov menyuam ua txhaum. Yog li ntawd, thaum Vajntxwv yehausafas nyuam qhuav los txog ntua hauv lub nroog Yeluxalees ces tus Tswv twb txib tus cevlus Yehus tuaj cem tamsim. Vajtswv yog Leej Txiv tus muaj hwjchim loj, Nws tsis txaus siab rau Yehausafas tej kev txhaum, “pab cov neeg ua phem ua qias thiab hlub cov neeg uas ntxub tus Tswv”, yog li Nws thiaj cem thaum vajntxwv los txog ntua hauv vaj loog nroog Yeluxalees. Qhov uas cem no kuj qhia rau vajntxwv paub tias nws tsis raug tua yog tus Tswv hlub thiab pom nws“ua raws li Vajtswv lub siab nyiam” (nqe 3). Tus Tswv pub rau vajntxwv muaj sia nyob tiamsis vajntxwv yuav tsum ris lub txim ua txhaum thaum yuav luag raug tua hauv tshav rog Lamaus cheebtsam Nkili-as. Zaum no vajntxwv yuav tsum nyiaj tej lus uas tus Tswv cem. Txawm li ntawd los, vajntxwv twb rhuav tej chaw pe tus mlom pojniam Aselas thiab “ua raws li Vajtswv lub siab nyiam”. Tus Tswv pom vajntxwv lub siab thiab kev ua neej, yog li vajntxwv tsis raug txim ntxiv lub sijhawm ntawd.
Vajtswv Txojkev hlub tsis hloov. Nws twb qhia tshwm txojkev hlub thiab kev zam txim rau peb dhau los ntawm Nws tus Tub txojkev tuag saum tus ntoo khaublig. Peb txhua tus yuav tsum ua lub neej kom tsimnyog lub neej tshiab uas tus Tswv muab pub rau yus. Vajtswv kuj chim heev thaum peb cov uas yog Nws cov menyuam ua raws li peb lub siab nyiam thiab tsis mloog Nws lus. Thaum ua txhaum, peb yeej yuav tau ris lub txim ntawd, tus Tswv cem thiab qhuab ntuas peb. Tsis yog leejtwg kuj zoo ib yam li Yehausafas, dim tsis raug tua thiab kuj tsis raug tus Tswv cem ntxiv thaum Nws rau txim. Peb yuav tsum ua tib zoo saib, rau qhov tsis paub tus Tswv yuav cem lossis rau txim rau peb zoo li cas, Nws pom peb lub neej thiab lub siab ua li cas. Ntawm tus Tswv, kev txhaum yog yam uas phem kawg nkaus, Nws cem lossis qhuab ntuas tus uas Nws hlub (Henplais 12:6).
Thov Vajtswv,
Tus Tswv, thov Koj pub kom nyuam yaus txo hwjchim, mloog Koj lus thiab tso kev txhaum tseg thaum Koj ntuas; kom nyuam yaus tau txais kev zam txim thiab Koj tsis chim. Amees.
Peb lub neej puas muaj yam dabtsi ua rau tus Tswv chim rau yus?
Nyeem Vajluskub hauv peb lub xyoo: Amaus 7:10-8:14
Kênh Youtube BHKTHN:
