Klei Aê Diê Blŭ: II Klei Yăl Dliê 19:1‑3
Êlan kliăng: “Anak kâo, đăm bi êmut ôh kơ klei Yêhôwa mkra, leh anăn đăm êdu ai ôh kơ klei Ñu ƀuah. Kyuadah Yêhôwa mkra hlei pô Ñu khăp, msĕ si sa čô ama ngă kơ anak ñu khăp” (Klei Bi Hriêng 3:11‑12)
Klei êmuh ksiêm mĭn: Ya klei Khua pô hưn êlâo Y‑Jêhu ƀuah kơ Mtao Jôsaphat hlăk ñu mrâo truh ti sang mtao? Ya ngă? Ya klei arăng mni kơ mtao? Aê Diê srăng ƀuah ăl amâodah bi mni tơdah Ñu dlăng hlăm klei hdĭp leh anăn ai tiê drei?
Mtao Jôsaphat wĭt leh ti ƀuôn Yêrusalem êđăp ênang leh gưl bi blah ti ƀuôn Ramôt-Galaat msĕ si klei Khua pô hưn êkâo Y‑Mika hưn leh êlâo, grăp čô mnuih srăng wĭt kơ sang êđăp ênang êngao kơ Mtao Ahap (II Klei Yăl Dliê 18:16). Yêhôwa Aê Diê tiŏ nao pô bi thâo ƀuh Y‑Jêhu nao drông Mtao Jôsaphat čiăng ƀuah ăl kjham kyua bi hgŭm leh anăn đru kơ Mtao Ahap jing sa čô ƀai, kyua anăn ngă kơ “klei ngêñ mơ̆ng Yêhôwa truh kơ ih” (êlan 3).
Drei ƀuh klei kjham mơ̆ng klei Aê Diê ƀuah. Ñu “ngêñ” snăk tơdah phung anak čô Ñu ngă soh. Kyua anăn, leh Mtao Jôsaphat mrâo truh ti Yêrusalem mtam snăn Aê Diê tiŏ nao Khua pô hưn êlâo Y‑Jêhu nao ƀuah mtam. Aê Diê jing Ama hlăm adiê, Ñu amâo ư ai ôh hŏng klei soh Mtao Jôsaphat “đru pô ƀai leh anăn khăp kơ phung bi êmut kơ Yêhôwa”, kyua anăn Ñu ƀuah mtam leh mtao mrâo truh sang mtao Yêrusalem. Klei ƀuah ăl anei ăt kñăm mblang kơ mtao thâo kơ klei mtao tlaih mơ̆ng klei djiê kyua klei pap Aê Diê tơdah Aê Diê ƀuh “mâo klei jăk hlăm ih” (êlan 3). Aê Diê brei kơ mtao dưi hdĭp ƀiădah mtao klam boh jhat mơ̆ng klei soh leh mtao păt čiăng djiê hlăm klei bi blah ti ƀuôn Ramôt-Galaat. Ară anei mtao lŏ tŭ klei Yêhôwa ƀuah kjham snăk. Khădah snăn, mtao lăm lui leh ti čar klei kkuh kơ rup yang Asêra leh anăn “ai tiê čuăn duah Aê Diê.” Aê Diê ƀuh klei hdĭp leh anăn ai tiê mtao, kyua anăn mtao amâo klam thiăm ya klei Aê Diê bi kmhal mtam hlăk anăn ôh.
Klei Aê Diê khăp amâo bi mlih ôh. Ñu ăt bi êdah klei khăp prŏng snăk leh anăn klei Ñu pap brei kơ drei mơ̆ng klei Anak Ñu djiê leh ti kyâo bi kal. Grăp čô drei brei hdĭp năng hŏng klei hdĭp mrâo Aê Diê brei leh kơ pô. Aê Diê ăt srăng ngêñ tơdah drei jing anak čô Ñu ƀiădah lŏ hdĭp tui si pô čiăng leh anăn amâo gưt asăp Khua Yang. Tơdah ngă soh, klă sĭt drei srăng klam boh jhat mơ̆ng klei soh, klei Aê Diê ƀuah ăl, leh anăn tăp năng jing klei Ñu ƀuah mkra. Amâo djŏ ôh grăp čô msĕ si Mtao Jôsaphat, tlaih mơ̆ng klei djiê leh anăn amâo hlŏng tŭ thiăm klei Aê Diê ƀuah mkra ôh. Brei drei thâo săng kyua amâo thâo ôh si Aê Diê srăng ƀuah mkra amâodah bi kmhal pô leh anăn Ñu ƀuh klei hdĭp leh anăn ai tiê pô si ngă. Hŏng Aê Diê, klei soh jing klei kjham leh anăn Ñu srăng mkra mjuăt phung Ñu khăp (Hêbrơ 12:6).
Ya klei hlăm klei hdĭp drei ngă kơ klei ngêñ Aê Diê truh kơ pô?
Wah lač: Ơ Khua Yang, akâo ko Ih brei kơ kâo ai tiê luă gŭ, thâo huĭ mpŭ leh anăn kmhal mtam tơdah mâo klei Ih ƀuah mkra čiăng kâo dưi mâo klei pap brei leh anăn amâo klam thiăm klei ngêñ Ih.
Dlăng Klei Aê Diê Blŭ hlăm tlâo thŭn: Y‑Amôs 7:10‑8:14
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
