Luka 18:1-8
“Klaih kơ noh Yêsu pơma pơtih gia kơ lu sư thoi âu wă kơ lu sư băt kơ krao khan ling lang huay kơ hăl” (Luka 18:1)
Nơ̆r jet tơchĕng pơwao:
– Yua kơ kiơ ‘bok sek tơlang lơ ‘măng pơjăng kuă kơ tơdŏng yă adro?
– Tơdrong kiơ pơm kơ yă adro ‘nâu jei sư?
– Yua kơ kiơ lu bơ̆n athei krao khan adrin?
Năr ‘nâu lu bơ̆n pơhrăm pơtrơp dơ̆ng tơdrong hơ’mon Yêsu roi tơdrong pơtih gia. Juđê sơ̆, đei lu yă adro mơ’nah pơmat tat păng ưh kơ đei bơngai wei rong thoi noh na đe juăt pơgŏ pơđep. Mă khan nơ̆r Kră Yang bơtho: “Lu iĕm ‘nĕ kơ pơjuă yă adro dah bơngai mơti.” (LĐ Êyiptơ 22:22). Mălei yua kơ ưh kơ đei bu wă tơdŏng lu sư păng ưh kơ đei jên wă sa pơgâm lu sư. Thoi noh na tơdrong đe jâu lu sư noh lu ‘bok sek tơlang ưh kơ wă tơdŏng lu sư: “Lu yŏng pơgơ̆r iĕm tă kơ blơ̆ blĕch ngăl, pơm buăl hăm lu bơngai tơtông, rim ‘nu lu sư tă kơ ‘maih chă pơgơ̆m sa tơmam, ‘maih druh kiơ̆ mŭk tơmam đe ăn, ưh kơ dŏng tơgŭm lu bơngai mơti, pă ‘maih lăng dŏng tơgŭm lu drŏ-kăn adro.” (Êsai 1:23). Tơdrong hli yom kơ Kră Yang noh bơih hơnă tơm gĭt wă kơ lu ‘bok sek tơlang kiơ̆ tơdrong tơpăt. ‘Bok sek tơlang lăm hơ’mon mă Yêsu pơtih gia ‘nâu minh ‘nu bơngai ưh kơ băt chu yom kơ ‘Bok Kei-Dei păng ưh kơ đei hli kơ đe, thoi noh na lơ wơ̆t sư pơjăng kuă kơ sek tơlang, lei na yă adro noh chă trong sư apinh ‘bơ’bel, adrin krao apinh.
Tơdrong “apinh ‘bơ’bel” đơ̆ng yă adro ‘nâu pơm kơ ‘bok sek tơlang hơhrah kơ sư, mălei tuch luch ‘bok sek tơlang kư̆m chu tơdŏng sư. Kră Yang Yêsu yua rup ‘nâu wă pơlung lu bơngai pơhrăm păng Sư adrin krao khan. Ưh kơ thoi ‘bok sek tơlang noh. “Kră Yang ‘Bok Kei-Dei oei tơ anih rơgoh. Sư jing ‘Bă kơ lu mơti, Păng jing Tơ’ngla wei lu drŏ-kăn adro.” (Hơriso 68:5). Sĭt tơpă Kră Yang gô tơgŭm lu sư. Kră Yang khan: “Pơma kơ kiơ kơ ‘Bok Kei-Dei Sư gô tơdŏng tơpă lu bơngai mă Sư đĭ rơih boih mă oei krao khan kơ Sư măng năr. ‘Bok Kei-Dei hăm ngê̆ gô đunh ưh? 8 Inh khan kơ iĕm tơpă, ‘Bok Kei-Dei gô tơdŏng hloi lu sư noh. Mă-lei lăp Inh Kon Bơngai jur dơ̆ng ning-mônh, Inh hăm oei ‘bôh lu bơngai lui dơ̆ng ưh kơnh lah?” (trong 7-8 BTTHĐ). “Krao khan kơ Sư măng năr” wă khan “krao khan ling lang huay kơ hăl” wă pơma hơđăl athei adrin krao khan. Mă bu bu lăm lu bơ̆n băt kơ krao khan ngăl bơih păng juăt kơ krao khan mơ̆n. Mălei phŏ lăp năr pơm kơ bơ̆n hăl yua kơ krao khan đunh bơih ưh kơ ‘bôh Kră Yang tơl tơwih. Mălei Kră Yang bơih Yang băt tôm tơdrong, gơh hơgei thoi noh na Sư gô tơgŭm lu bơ̆n kiơ̆ thoi Sư wă, păng trŏ kơ jơ Sư wă ba ăn kơ bơ̆n tơdrong ‘lơ̆ng hloh. Sư wă kơ đon lui bơ̆n adrin huay kơ bơ̆l hăl.
Krao khan nhen thoi bơ̆n dui jơhngơ̆m. Dah bơ̆n dui jơhngơ̆m ưh kơ pơdơh, lei na bơ̆n krao khan kư̆m dai ling lang ưh kơ pơdơh. Tơdrong kơnhăm Kră Yang Yêsu roi hơ’mon tơdrong pơtih gia ‘nâu wă bơtho kơ lu bơ̆n adrin krao khan ling lang, ‘nĕ kơ hăl kơplah bơ̆n krao khan apinh Kră Yang (trong 1). Kră Yang iơ̆m dim! Kră Yang ‘mêm kơ inh dêh! Thoi noh, ‘nĕ kơ tơchĕng khan Kră Yang hiơ̆ kơ tơl tơwih ăn kơ lu bơ̆n, athei krao khan măng năr krao apinh Kră Yang ding truh jơ Sư tơl tơwih. Kră Yang hăm ngê̆ gô đunh ưh!
Ơ Kră Yang mă iơ̆m dim, inh bơnê kơ Ih đei pơlung inh krao khan ling lang, huay kơ hăl. Apinh Ih tơgŭm inh adrin krao khan, krao khan kơmăng kơ’năr apinh Ih păng inh lui ngeh Kră Yang gô tơl tơwih kiơ̆ kơ tơdrong tơpăt păng trŏ kơ jơ Ih. Krao khan yua anăn Kră Yang Yêsu Krist, Amen.
Dah Kră Yang tam mă tơl tơwih, lei lu bơ̆n hăm oei adrin krao khan dah ưh?
Đŏk Sơ̆p Hla bơar ‘Bok Kei-Dei lăm pêng sơnăm: Êsai 36
Kênh Youtube BHKTHN:
