Pajlug 24:1-2
Nqe cim:
“Tsis txhob khib rau cov neeg ua phem ua qias, thiab tsis txhob nrog lawv ua phoojywg, rau qhov lawv lub siab xav ua limhiam, thiab lawv lub ncauj hais tej lus tsis zoo.” (Pajlug 24:1-2)
Lus nug rau sawvdaws xav:
– Vim li cas Vajntxwv Xalumoos qhia cov menyuam tsis txhob khib cov neeg phem?
– Vajtswv Txojlus qhia paub cov neeg phem lub neej yuav xaus zoo li cas?
– Peb yuav ua li cas kom tau txais lub neej npluamias nyob mus ibtxhis uas Vajtswv pub?
Tibneeg pheej muaj lub siab khib rau cov neeg phem, tiamsis Vajtswv qhia rau Nws cov menyuam hais tias tsis txhob khib lawv. Lo lus khib no muaj lub ntsiab hais tias ntxub, feeb pij thaum tus neeg ua zoo pom tus neeg phem muaj nyiaj, muaj koob npe, muaj meejmom dua yus. Ntau leej hnyav siab, khib siab thaum pom cov neeg ua ncaj, ua zoo raug txomnyem, raug ua saib tsis taus, tiamsis cov neeg ua phem, ua tsis ncaj tseem npluanuj dua; zoo li lub ntiajteb tsis ncaj ncees rau qhov ua zoo!
Cov lus uas Vajntxwv Xalumoos qhia rau nws cov menyuam no, tsis yog tsis tau khib rau cov neeg phem xwb, tiamsis yuav tau txav deb cov neeg ntawd thiab. Tsis txhob ua phoojywg nrog cov neeg ntawd, tsis cia lawv ntxias mus koom nrog cov neeg phem ua tej haujlwm txhaum kom muaj nyiaj. Qhov vimchiv txav deb cov neeg phem yog vim lawv lub siab tsuas xav txog yam ua nruj tsiv, rhuav thiab lawv lub qhovncauj hais tej lus dag, ua rau ntau leej tu siab. Thaum mus koom nrog cov neeg phem, tus neeg zoo lub siab kuj cia li ua zoo li cov neeg phem zuj zus, lub siab dawb pib hloov mus ua lub siab tawv, xyaum ua zuj zus li cov neeg phem ua thiab cia li mus ua txhaum. Lub siab xav yuam kev yuav coj mus ua tej haujlwm txhaum, tsis yog, ua nruj ua tsiv, ua phem.
Yog ua tib zoo saib kev ua neej, peb yuav pom cov neeg phem txojkev npluanuj tsuas yog ib vuag zoo li tej nroj ntsuag sawv ntxov ntsuab tsaus ntuj ces ntsws xwb (Phau Ntawv Nkauj 37:1-2). Qhov tseeb nimno qhia paub ntau tus neeg muaj nyiaj tabtom raug kaw hauv tsev loj cuj. Yog li peb tsis txhob ntxhov siab, khib, ntshaw lossis mus koom nrog lawv tes haujlwm. Vajtswv Txojlus qhia: “Cov neeg uas tau koob hmoov yog cov uas tsis ua raws li cov neeg siab phem tej lus haub ntxias, thiab tsis xyaum ua raws li cov neeg txhaum ua lossis tsis nrog cov neeg uas tsis hwm Vajtswv koom ua ib lub siab.” (Phau Ntawv Nkauj 1:1). Thov Vajtswv pab kom peb txhua tus tsis txhob vim tej koob npe nyob ib vuag es mus taug txojkev puastsuaj.
Timthawj Paulus txhawb kom cov ntseeg Vajtswv yuav tsum hloov kev ua neeg tshiab thaum los ntseeg Tswv Yexus. Paulus qhia hais tias: “Nej tsis txhob ua nej lub neej zoo li tej neeg ntiajteb ua, tiamsis nej yuav tsum cia Vajtswv hloov nej lub siab kom nej muaj lub siab tshiab. Nej thiaj yuav paub ua raws li Vajtswv lub siab nyiam. Yog nej ua li ntawd, nej thiaj paub ua qhov zoo, ua haum Vajtswv siab thiab paub ua zoo kawg nkaus.” (Loos 12:2). Cov ntseeg Yexus tsis ua neej zoo li neeg ntiajteb ua, tsis nrhiav kev npluanuj ib vuag, tiamsis rau siab ntso thov Vajtswv, nrhiav qhov uas ua raws li Vajtswv lub siab nyiam hauv kev ua neeg, kom ua tau neeg zoo, tau txais txojkev npluanuj nyob mus ibtxhis hauv Tswv Yexus.
Thov Vajtswv,
Tus Tswv, ua tsaug uas Koj qhia nyuam yaus paub ntsia qhov zoo ntawm nyuam yaus txojkev ua neej. Thov Vaj Ntsujplig qhia kom nyuam yaus qaij deb txojkev ntxias ntawm cov neeg phem thiab muab siab rau ntseeg Koj txhua hnub. Nyuam yaus tuav Yexus Khetos lub npe thov, Amees.
Peb lub homphiaj ua neej yog nrhiav kev zoo siab, kev txaus siab hauv tus Tswv lossis tseem pheej khib rau cov neeg phem?
Nyeem Vajluskub hauv peb lub xyoo: Yaxayas 12-13
Kênh Youtube BHKTHN:
