II Hơ’mon 30:23-27
“Dang ei inh gô năm truh tơ anih Chơnang soi kơ Kră Yang ‘Bok Kei-Dei. Wă khan truh tơ Kră Yang ‘Bok Kei-Dei, noh boih tơdrong mă inh chơt hiôk ‘nă hal,” (Hơriso 43:4a)
Nơ̆r jet tơchĕng pơwao:
– Yua kơ kiơ đĭ kon pơlei ‘maih wei tơdrong giĕng thim tơpơh năr?
– Rim ‘nu kơkuh kơ Kră Yang hăm jơhngơ̆m thoi yơ? Đei yua liơ?
– Dang ei lu bơ̆n athei kơkuh thoi yơ wă kơ Kră Yang mơ̆ng păng ăn pŭn hiôk?
Đơ̆ng rŏng kơ wei tơdrong Giĕng sa ‘Bĕng Ưh kơ đei Puih Pông đei tơpơh năr lei na kon pơlei drơ̆ng pơkă pơm giĕng thim tơpơh năr dơ̆ng. ‘Nâu jơ̆ tơdrong đêl adrol sơ̆ lăp lăm chăl pơtao Sôlômôn (I Lu Pơtao 8:65). Tơdrong juăt đei hơgăt lê̆ pơm giĕng lăm tơpơh năr đĕch mălei lu sư pơm thoi noh yua jơhngơ̆m hưch hanh dêh păng chơt hiôk lĕch đơ̆ng lăm jơhngơ̆m kơplah đei Kră Yang oei hơdai. Pơtao Hesekia păng lu ‘bok kuan tih đe Juđa kư̆m đei tơ’bôh tơdrong hiôk chơt tih kơplah pơyơ̆r ăn kơ kon pơlei ‘bar rơbâu tŏ rơmo tơno, mơjĭt tơpơh rơbâu tŏ triu, na đĭ đăng đei tơmam sa mah tôm lăm tơpơh năr pơtrơp dơ̆ng.
Đĭ đăng kon pơlei Juđa hăm lu ‘bok soi păng bơngai Lêwi, lu bơngai Juđê đơ̆ng Isơrael, kư̆m hăm lu bơngai tơmoi arih lăm dêh Juđa kư̆m đei bơngai Isơrael, đĭ đăng chơt hiôk. Kiơ̆ kơ khôi juăt ‘bok Môis, lu bơngai tơmoi arih lăm dêh noh kư̆m năm akŭm pơm Giĕng Năm Brih tơdah lu sư wă (Jô̆ bơngai 9:14). Lăm tơdrong akŭm kơkuh kơplah pôm jơhngơ̆m đon lei đei tơdrong chơt hiôk, đĭ đăng bơngai chhôk ngă ‘nă hal. Tơdrong chơt hiôk ‘noh lanh jơ̆p dêh char Isơrael, “thoi ei bơih tơ Jêrusalem đei tơdrong chơt đĭ đăng jơ̆p jang” wă khan jơ̆ tơdrong chơt hiôk tih tam biơh đei iŏk đơ̆ng chăl pơtao Sôlômôn truh dang ei. Đơ̆ng noh lu bơngai Lêwi iung dang dơ̆ng sakat ăn pŭn hiôk kơ kon pơlei (Bơtho khôi juăt 10:8). ‘Nguaih kơ tơdrong hiôk chơt đĭ đăng, đei yua trŏ kơ đei hơpơi dêh đơ̆ng kon pơlei pôm đon kơkuh hăm đĭ jơhngơ̆m ‘noh Kră Yang gô mơ̆ng “Lu ‘bok soi păng lu bơngai Lêwi iung sơkat pŭn hiôk ăn kơ kon pơlei; nơ̆r sơkat nơ̆r lu sư krao khan kơtơ̆ng truh tơ anih rơgoh Kră Yang, truh tơ plĕnh na Kră Yang Yêhôwa tơl tơwih ăn pŭn hiôk.” (trong 27).
Kơplah đĭ đăng kon pơlei đĭ jơhngơ̆m kơkuh kơ Kră Yang lăm tơdrong pôm jơhngơ̆m đon, ‘noh bơih tơdrong kơkuh mă Kră Yang lăp đon, Sư gô ăn pŭn hiôk păng mơ̆ng nơ̆r krao khan. Lu bơngai kơkuh gô hưch hanh, ‘bĕnh blai chơt hiôk kơplah đei tơ’bơ̆p Kră Yang păng đĭ jơhngơ̆m pơyơ̆r kơ Kră Yang dôm tơdrong kiơ mă ‘lơ̆ng hloh thoi pơtao păng ‘bok Kuan tih kơplah âu. Dang ei, lu bơ̆n kư̆m đei tơdrong akŭm kơkuh đei Kră Yang mơ̆ng păng ăn pŭn hiôk thoi noh mơ̆n tơdah rim ‘nu lu bơngai wei lăng Khul Bơngai Lui, rim ‘nu bơngai lui năm tơ Kră Yang hăm đĭ jơhngơ̆m păng đĭ jơhngơ̆m đon lăm tơdrong pôm jơhngơ̆m đon kơkuh. Nơ̆r krao khan đơ̆ng kon pơlei pôm jơhngơ̆m đon gô truh tơ anih ‘lơ̆ng rơgoh Kră Yang tơ kơpal lu tăl plĕnh. Tơplơ̆ dơ̆ng, kon pơlei akŭm krao khan mălei ưh kơ pôm đon gô pơm kơ Kră Yang sơ’ngon păng Sư ưh kơ wă mơ̆ng nơ̆r krao khan. Apinh Kră Yang tơgŭm rim ‘nu lu bơ̆n năm kơkuh kơ Krx Yang hăm đĭ jơhngơ̆m, kư̆m wang pôm jơhngơ̆m đon wă kơ rim ‘nu đei hiôk chơt tơ’bơ̆p Kră Yang lu bơ̆n wang pơyơ̆r nơ̆r bơnê kơ Sư dôm tơdrong mă ‘lơ̆ng hloh păng wang “Hiôk chơt đĭ đăng” .
Ơ Kră Yang, tơdah lăm inh đei tơdrong kiơ pơgăn lăm tơdrong kơkuh ưh kơ đĭ jơhngơ̆m păng tam mă mơn đei hiôk chơt tih, apinh Ih bơtho tơ’bôh păng tơgŭm inh hŭt lê̆. Apinh tơgŭm inh ling lang mơn đei jơhngơ̆m kơkuh hăm chơt hiôk. Yua anăn Kră Yang Yêsu Krist, Amen.
Lu bơ̆n hăm đĭ jơhngơ̆m chơt hiôk kơplah kơkuh păng pơyơ̆r kơ Kră Yang ưh?
Đŏk Sơ̆p Hla bơar ‘Bok Kei-Dei lăm pêng sơnăm: Êsai 11
Kênh Youtube BHKTHN:
