Klei Aê Diê Blŭ: Hêbrơ 11:13-16
Êlan kliăng: “Jih jang phung anăn djiê leh hlăm klei đăo sơăi, ka tuôm mă tŭ ôh mnơ̆ng Aê Diê ƀuăn leh, ƀiădah diñu ƀuh leh anăn kkuh kơ mnơ̆ng anăn mơ̆ng kbưi, leh anăn thâo kơ diñu jing tue leh anăn phung hiu bhiâo ti lăn ala” (Hêbrơ 11:13)
Klei êmuh ksiêm mĭn: “Tue leh anăn phung hiu bhiâo ti lăn ala” ya čiăng lač? Si ngă klei msĕ phung aê đưm hŏng phung tue hiu bhiâo ti lăn ala? Ya ih čuăn ngă tơdah thâo kơ ih jing knŏng sa čô tue jưh bhiâo ti lăn ala?
Phung tue jing phung dôk êbat hiu, khăng jưh bhiâo ti sa bĭt anôk čiăng mdei jơ̆ng leh anăn lŏ đuĕ nao. Hŏng klei mblang anăn, “tue leh anăn phung hiu bhiâo ti lăn ala” čiăng lač kơ phung tue hdĭp ti lăn ala ƀiădah digơ̆ thâo săng lăn ala anei amâo djŏ anôk digơ̆ dôk hlŏng lar ôh, lăn ala anei jing anôk digơ̆ jưh bhiâo, leh anăn amâo sui ôh, digơ̆ srăng lŏ đuĕ nao tơl truh ti anôk bi kčah jing “čar hlăm adiê.”
Pô čih hră mơĭt kơ phung Hêbrơ lač phung aê kơ phung Israel đưm, jing Y-Abraham leh anăn phung anak čô ñu hdĭp ti lăn ala anei msĕ si tue leh anăn phung hiu bhiâo. Digơ̆ thâo ti lăn ala anei amâo mâo sa anôk kơ digơ̆ dưi dôk hlŏng lar ôh kyuanăn digơ̆ kăp răng nanao kơ klei srăng đuĕ nao tui si klei Aê Diê atăt gai. Wăt ƀuôn Čaran, jing anôk Y-Abraham mkŏ mdơ̆ng kjăp leh ngăn dưn ñu, kăn dưi kơ̆ng Y-Abraham rei. Leh anăn phung anak čô ñu jing Y-Isăk leh anăn Y-Yakôp ăt tui ba knuah hdĭp rông hlô mnơ̆ng amâo dôk phĭt sa anôk anăn mơh. Diñu đuĕ nao tui hlue asăp Aê Diê iêô kyuadah “diñu čiăng mâo sa boh čar jăk hĭn, jing čar hlăm adiê” (êlan 16a).
Jih jang phung jing leh dŏ Khua Yang jing phung tue hiu bhiâo ti lăn ala sơăi. Jing msĕ si sa čô tue êgar dôk jưh bhiâo, drei ăt jing “tue êgar” mơh hŏng lăn ala anei, kyuadah hnơ̆ng čuăn, klei dôk dơ̆ng ƀơ̆ng huă lăn ala anei mdê hŏng drei: “Kyuadah jih jang mnơ̆ng hlăm lăn ala, klei kđeh tluh, klei ală tluh, klei mgao hlăm klei hdĭp, amâo kbiă hriê mơ̆ng Ama ôh, ƀiădah mơ̆ng lăn ala” (I Y-Yôhan 2:16). Êngao kơ klei “êgar” hŏng lăn ala, brei mnuih đăo kơ Krist thâo kơ ñu pô amâo jing dŏ lăn ala ôh. Anei jing anôk dôk knŏng bhiâo, jing anôk jưh êjai amâo djŏ anôk dôk hlŏng lar ôh, msĕ si klei Khua Yang Yêsu wah lač kơ phung ƀĭng kna: “Kâo brei leh klei Ih blŭ kơ diñu. Lăn ala bi êmut kơ diñu leh, kyuadah diñu amâo jing phung lăn ala ôh, msĕ si Kâo amâo jing phung lăn ala ôh” (Y-Yôhan 17:14). Kyua amâo jing dŏ lăn ala ôh, drei mâo klei iêô snei: “Khăp mĭn bĕ kơ mnơ̆ng hlăm adiê, amâo djŏ ôh kơ mnơ̆ng ti lăn ala”(Kôlôs 3:2).
Drei jing phung tue knŏng găn bhiâo ti lăn ala anei, mdei jơ̆ng bhiâo hlăm brô dua tlâo thŭn, pluh thŭn, lu êdi sa êtuh thŭn leh anăn lŏ đuĕ nao. Mluk êdi tơdah drei duh jih mnơ̆ng drei mâo kơ anôk drei thâo klă jing anôk jưh bhiâo. Duh bĕ êlâo hĭn jih jang ya mnơ̆ng drei dưi djă ba kơ Ƀuôn Ala Mtao Adiê.
Klei drei dôk dơ̆ng ƀơ̆ng huă, klei drei dưm êlâo hĭn bi êdah kơ drei jing tue hiu bhiâo ti lăn ala mơ̆?
Wah lač: Ơ Khua Yang, đru kâo hdơr nanao kơ kâo knŏng jing sa čô tue găn bhiâo ti lăn ala anei ktuê êlan êbat wĭt kơ ƀuôn hlăm adiê jing anôk dôk hlŏng lar, čiăng kơ kâo mâo klei thâo mĭn, duah êlâo hĭn mnơ̆ng dôk hlŏng lar amâo djŏ mnơ̆ng yua êjai hlăm lăn ala anei ôh. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: Klei Mphŭn Dơ̆ng 17
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
