Klei Aê Diê Blŭ: Y-Mathiơ 12:22-24
Êlan kliăng: “Ƀiădah tơdah phung Pharisi hmư̆ klei anăn, diñu lač, “Mnuih anăn suôt phung yang jhat hŏng anăn Bêlsêbul, khua kơ phung yang jhat.”( Y-Mathiơ 12:24)
Klei êmuh ksiêm mĭn: Ya klei Khua Yang Yêsu ngă leh kơ pô yang jhat ngă, bum ală leh anăn kmlô? Si knuih phung riêng gah leh anăn phung Pharisi? Hlăm ya mta klei drei khăng hngah kơ Khua Yang?
Arăng atăt ba kơ Khua Yang Yêsu sa čô êkei bŏ hŏng klei knap mñai, gơ̆ yang jhat ngă, bum ală leh anăn kmlô. Gơ̆ dôk hlăm klei yang jhat kă krañ hlăm mngăt wăt hlăm kđeh. Ƀuh klei knap mñai gơ̆, Khua Yang Yêsu bi mtlaih gơ̆ mơ̆ng klei yang jhat kiă kriê, brei gơ̆ lŏ thâo blŭ leh anăn ƀuh mngač. Klei myang Khua Yang bi mtlaih leh pô yang jhat ngă anei kluôm dhuôm mngăt wăt asei mlei. Jih jang phung ƀuh klei yuôm bhăn anăn “bi kngăr”, digơ̆ bi kngăr êdi tơdah ƀuh sa čô mnuih mâo klei bi hlao leh anăn lŏ suaih pral bŏ hŏng klei yuôm bhăn msĕ snăn. Anei jing klei digơ̆ ka tuôm găn ôh. Klei phung ƀuh anăn êmuh “Djŏ mơ̆ pô anei jing Anak Y-Đawit?” ăt jing klei bi klă kơ Yang Yêsu yơh jing Yang Mêsi Pô Klei Aê Diê Blŭ hưn leh mơ̆ng êlâo, kyuadah phung Yuđa đăo knŏng Aê Diê yơh dưi suôt yang jhat leh anăn dưi ngă klei yuôm bhăn djŏ kơ klei bi hlao, bi suaih anak mnuih.
Phung Pharisi hmư̆ klei anăn diñu ruăt kuăt hngah kơ Yang Yêsu jing Yang Mêsi hŏng klei diñu lač Gơ̆ “suôt phung yang jhat hŏng anăn Ƀêlsêƀul, khua kơ phung yang jhat.” Diñu lač khua kơ phung yang jhat brei klei myang kơ Khua Yang Yêsu snăn Gơ̆ yua klei myang yang jhat prŏng suôt yang jhat điêt, kyuanăn yơh anei jing klei mnêč Khua Yang Yêsu yua čiăng ngă klei bi hmăi đuč. Kyua phung anei čiăng hngah kơ Khua Yang Yêsu kbiă hriê mơ̆ng Aê Diê snăn diñu pia blŭ boh blŭ bŏ hŏng klei mgao snăk bi êdah klei tuč hnơ̆ng kơ klei diñu amâo mâo đăo.
Hruê anei, tơdah dlăng klei yăl dliê anei drei khăng ƀuah phung Pharisi. Ƀiădah lĕ, năng ai drei amâo hngah ktang kơ Khua Yang Yêsu msĕ si phung Pharisi anăn ôh, ƀiădah tăp năng drei ăt hngah mơh kơ bruă Khua Yangg ngă leh hlăm klei hdĭp drei. Tơdah drei đua kơ sang, kơ êdeh, kơ bruă mă…drei mâo jih jang mnơ̆ng anăn kyua klei drei thâo mĭn, thâo gĭr leh anăn hur har mă bruă, snăn drei hngah leh kơ Khua Yang yơh. Amâodah mâo lu blư̆ drei hngah kơ Khua Yang hŏng klei drei đua kơ boh tŭ dưn mơ̆ng bruă drei ngă leh kơ Phung Sang Aê Diê…Ti anôk Khua Yang dôk hlăm klei hdĭp drei tơdah drei amâo thâo kral ôh bruă myang Ñu ngă? Tơdah drei amâo bi êdah ôh knhuah dôk dơ̆ng ƀơ̆ng huă sa čô pô đăo kơ Krist, jing knhuah hdĭp mơ̆ng phung Khua Yang bi hlao leh mngăt ai tiê snăn drei hngah kơ Khua Yang leh yơh. Akâo Khua Yang đru drei thâo ƀuh nanao klei Ñu brei leh anăn klei myang Ñu kiă kriê hlăm klei hdĭp drei čiăng kơ drei thâo hdơr knga kơ Ñu.
Si ngă diih ƀuh mơ̆ bruă myang Khua Yang ngă hlăm Phung Sang Aê Diê, hlăm gŏ sang leh anăn hlăm klei hdĭp diih pô?
Ơ Khua Yang, brei kâo thâo kral nanao jih jang klei yuôm bhăn Ih ngă leh kơ klei hdĭp kâo, đru kâo hưn hŏng klei jhŏng kơ klei myang yuôm bhăn Ih kơ phung riêng gah kâo.
Dlăng Klei Aê Diê Blŭ hlăm tlâo thŭn: Y-Êskiêl 36:1-21
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
