Mathais 12:22-24
Nqe cim:
“Thaum cov Falixais hnov sawvdaws hais li ntawd, lawv teb hais tias, nws ntiab tau dab tawm twb yog Npexenpus uas yog dab tus thawj pub hwjchim rau nws” (Mathais 12:24).
Lus nug rau sawvdaws xav:
- Tswv Yexus ua licas rau tus neeg raug dab uas digmuag thiab hais tsis taus lus?
- Tej neeg sawvdaws thiab cov Falixais uas pom li ntawd lawv xav licas?
- Peb kheev tsis lees paub tus Tswv thaum tej lub sijhawm twg?
Muaj neeg coj ib tug neeg raug dab, uas digmuag thiab tham tsis taus lus txomnyem kawg tuaj cuag Yexus. Pom tau hais tias tus neeg ntawd tabtom raug dab tsim txom sab ntsujplig thiab sab nqaij tawv huv tibsi. Thaum Yexus pom tus neeg raug li ntawd, Yexus txawm tso tus neeg ntawd dim dab lub fwjchim, ua rau nws rov tham tau lus thiab rov pom kev. Tus Tswv lub fwjchim tso tus neeg lub cev thiab sab ntsujplig dim ntawm dab txhais tes. Tej neeg uas pom yam xwm txawv li ntawd “lawv xav tsis thoob”, thaum pom ib tug neeg uas tau kho zoo mob txawv ua luaj li ntawd. Tej no yog yam uas lawv tsis tau pom dua ib zaug li. Tej neeg uas pom li ntawd thiaj sib nug txog Yexus hais tias: “Nws puas yog Daviv tus Tub?” ntawd yog lo lus lees hais tias Yexus yog tus Mexiyas uas Vajluskub hais tseg lawm. Cov neeg Yudais ntseeg hais tias tsuas yog Vajtswv xwb thiaj ntiab tau dab tawm, ua tau txujci tseemceeb thiab yog tus uas hloov kho tau tibneeg.
Thaum cov Falixais hnov tej neeg hais li ntawd, lawv txawm tsis lees paub Yexus yog tus Mexiyas los ntawm lo lus teb sawvdaws hais tias: “Nws ntiab tau dab tawm twb yog Npexenpus uas yog dab tus thawj pub hwjchim rau nws”. Cov Falixais hais tias dab tus thawj pub hwjchim rau Yexus, siv lub hwjchim ntawm tus thawj dab los ntiab cov dab me tawm, yog Yexus ua kom sawvdaws qhuas nws xwb. Cov Falixais tsis lees paub Tswv Yexus yog los ntawm Vajtswv los, lawv thiaj hais tau tej lo lus saib tsis taus Vajtswv ua qhia tshwm lawv lub siab tawv uas tsis ntseeg.
Niaj hnub nimno, thaum nyeem txog zaj xwm hauv ntu Vajluskub no peb pheej yws txog cov Falixais. Tej zaum peb tsis ua li cov Falixais hnub thaud uas hais tawm plaws tsis ntseeg Yexus, tiamsis qee zaug peb tsis lees tej uas Tswv Yexus twb ua nyob hauv peb lubneej thiab yam uas tus Tswv muab pub rau peb dhau los lawm. Thaum peb rov qhuas txog peb lub tsev, lub tsheb, peb tes haujlwm…yog peb siv zog, peb nquag thiab peb txawj ntse thiaj tau, ces yog peb tabtom tsis lees paub tus Tswv lawm ntag. Lossis muaj tej zaum peb tsis lees paub tus Tswv los ntawm qhov uas khav txog tej uas peb ua tau hauv Pawg Ntseeg… Tus Tswv nyob qhov twg hauv peb lubneej yog peb tsis lees paub txog Nws lub fwjchim? Thaum peb tsis ua lubneej qhia tshwm yog tus ntseeg, tsis ua qhia tshwm li yog ib tug uas tau tus Tswv kho sab ntsujplig zoo lawm, ces yog peb tabtom tsis lees paub tus Tswv lawm ntag. Thov Vajtswv pab kom peb pom meej txog Vajtswv lub fwjchim thiab tej uas Vajtswv muab pub hauv peb lubneej kom nco ntsoov Vajtswv txiajntsig.
Thov Vajtswv,
Tus Tswv, thov qhia nyuam yaus pom txog tej txujci uas Koj ua nyob hauv nyuam yaus lubneej, thov pab nyuam yaus muaj lub siab kub lug qhia Koj lub fwjchim uas hloov nyuam yaus lubneej dhau los rau lwm tus. Amees.
Peb puas pom Vajtswv lub fwjchim ntawm Pawg Ntseeg, peb tsev neeg thiab peb tus kheej lawm tau?
Nyeem Vajluskub hauv peb lub xyoo: Exekees 36:1-21
Kênh Youtube BHKTHN:
