Mathais 12:22-30
Nqe cim:
“Vim cov menyuam ntawd puavleej yog neeg muaj roj muaj ntshav, yog li ntawd, Yexus thiaj los yug ua neeg muaj roj muaj ntshav ib yam li lawv. Nws ua li ntawd, Nws txoj kev tuag thiaj rhuav tau dab Ntxwgnyoog lub hwjchim uas ua kom neeg tuag puastsuaj mus” (Henplais 2:14)
Lus nug rau sawvdaws xav:
- Tswv Yexus hais txog tej yam tsis haum cai twg nyob hauv cov Falixais tej lus tawmtsam Nws?
- Tswv Yexus qhia tshwm Nws siv lub fwjchim twg los ntiab dab?
- Peb kawm tau yam dabtsi hauv ntu Vajluskub no?
Cov neeg Falixais tsis lees paub Tswv Yexus lub fwjchim los ntawm qhov uas lawv hais tias Yexus siv dab tus thawj lub fwjchim los ntiab dab, Tswv Yexus taw qhia pom txog lawv kev xav uas tsis haum cai li no: Tim ib, yog Tswv Yexus siv dab Ntxwgnyoog lub fwjchim rov ntiab dab ces yog dab rov ua rau nws tsis muaj zog mus thiab yog ib lub tebchaws tawg ua ob peb pab, tej neeg sib ntaus sib tuas ces lub tebchaws yuav puastsuaj. Tim ob, cov Falixais uas nyob nrog Yexus tiam neeg kuj muaj tus ntiab tau dab thiab. Los ntawm lo lus “nej cov neeg” yog hais txog cov Falixais ib txhia uas ntiab tau dab. Yog li ntawd, cov neeg Falixais uas ntiab tau dab kuj yog lawv tau dab tus thawj pub fwjchim rau lawv thiaj ntiab tau thiab lov? Thaum hais li ntawd, lawv yuav raug cov Falixais uas ntiab tau dab txiav txim rau lawv.
Tswv Yexus tej lus teb ua rau cov Falixais tej lus tsis haum cai uas hais tias yog dab tus thawj pub fwjchim rau Yexus ntiab dabtsis muaj qabhau lawm. Tswv Yexus qhia meej hais tias, qhov uas Nws ntiab tau dab yog los ntawm Vaj Ntsujplig lub fwjchim. Yog Tswv Yexus ua Nws tes haujlwm los ntawm Vajtswv tus Ntsujplig lub fwjchim, ces yam txujci uas Yexus ua yog Vajtswv ua thiab qhia tau tias Yexus yog tus Mexiyas, uas yog“Daviv tus Tub” li tej neeg sawvdaws sib tham txog Nws (nqe 23). Tswv Yexus kuj qhia hais tias Vajtswv lub tebchaws twb los txog lawm thiab Vajtswv lub tebchaws yuav muaj fwjchim li Yexus tej lus “muab tus muaj zog khi” uas yog dab Ntxwgnyoog. Tswv Yexus tau ua tiav tes haujlwm ntawd saum tus ntoo khaublig. Tswv Yexus hais rau cov Falixais hnub thaud thiab peb cov niaj hnub nimno hais tias: “Tus uas tsis tuaj kuv tog yeej tawmtsam kuv, Tus uas tsis koom nrog kuv, tus ntawd ua kom tawg pab tawg pawg” (nqe 30), txhais tau hais tias, tsis muaj cov nyob nruab nrab hauv ob pab uas yog ib ke yog tus Tswv tug ib ke yog dab tug. Yog tsis tuaj tus Tswv tog ces yog tabtom tawmtsam tus Tswv, thiab tsis tuaj tus Tswv tog ces yuav tawg ua pab pawg thiab raug puastsuaj mus.
Thaum Tswv Yexus los ua tibneeg, Nws vamkhom Vaj Ntsujplig lub fwjchim los tawmtsam yeej dab Ntxwgnyoog. Nimno peb yog cov ntseeg Yexus, Vaj Ntsujplig nyob hauv peb lub siab, peb cia li fwm thiab ua raws li Vaj Ntsujplig coj qhia thiaj yuav kovyeej lub siab qub, kovyeej kev txhaum kom muaj lubneej ua rau tus Tswv lub npe nrov ncha. Tej neeg tsis tau ntseeg tus Tswv uas nyob ib ncig ntawm peb, tabtom saib ntsoov Vajtswv tej menyuam kev ua lubneej ntseeg. Los ntawm peb tej lus, kev coj noj coj ua qhia tshwm Vaj Ntsujplig lub txiv, muaj kev hlub, ua ncajncees… yuav ua rau lwm tus ntshaw, rub lwm tus los cuag Tswv Yexus. Nco ntsoov hais tias, Tswv Yexus tsis pub peb taug ob txojkev, tsuas xaiv yuav tus Tswv thiab sib txuas nrog Nws lossis tsis txuas nrog tus Tswv uas tawmtsam Nws xwb. Yog li ntawd, yuav tsum cia Vaj Ntsujplig los kav tagnrho siab thiab ua raws li Vaj Ntsujplig qhia kom txaus nkaus.
Thov Vajtswv,
Tus Tswv, thov pab nyuam yaus ua lubneej qhia tshwm Koj los ntawm lubneej txhua hnub thiab cia siab ntsoov rau Vaj Ntsujplig lub fwjchim kom kovyeej lub siab qub thiab tej kev txhaum, ua neej muaj nqis rau Koj. Amees.
Peb puas tabtom vamkhom Vaj Ntsujplig lub fwjchim kom ua lubneej muaj yeej rau Vajtswv tau ntsejmuag lawm tau?
Nyeem Vajluskub hauv peb lub xyoo: Exekees 36:22-37:28
Kênh Youtube BHKTHN:
