Klei Aê Diê Blŭ: Y-Mathiơ 12:22-30
Êlan kliăng: “Snăn kyuadah phung anak mâo kđeh leh anăn êrah, Ñu pô msĕ mơh mâo klei jing msĕ snăn, čiăng kơ hŏng klei djiê Ñu dưi bi rai pô mâo klei myang klei djiê, čiăng lač yang jhat.”( Hêbrơ 2:14)
Klei êmuh ksiêm mĭn: Ya klei mâo djŏ Khua Yang Yêsu bi êdah hlăm klei phung Pharisi kcŭt? Khua Yang Yêsu bi êdah kơ hlei klei myang Ñu knang pioh suôt yang jhat? Ya klei hriăm drei mâo mơ̆ng trăn Klei Aê Diê Blŭ anei?
Tơdah phung Pharisi hngah kơ klei myang Khua Yang Yêsu hŏng klei diñu lač Gơ̆ yua klei myang khua yang jhat suôt yang jhat, Khua Yang bi êdah klei amâo djŏ ôh hlăm klei diñu kčŭt. Tal sa, Tơdah Khua Yang yua klei myang Satan suôt yang jhat snăn Satan dôk bi awăt ñu pô yơh, leh anăn êlâo êdei ƀuôn ala mtao Satan ăt srăng bi kah mbha mơh, amâo srăng dôk ôh. Tal dua, hlăm ênuk Khua Yang Yêsu phung Pharisi pô ăt ngă mơh bruă suôt yang jhat, pruĕ blŭ “bi phung anak diih” čiăng lač jing phung hriăm, bĭng kna phung Pharisi. Tơdah snăn amâo djŏ hĕ phung Pharisi ăt yua klei myang Satan mơh suôt yang jhat? Tơdah lač snăn, diñu srăng tlă anăp hŏng klei phung ƀĭng kna diñu phat kđi yơh.
Khua Yang Yêsu bi rai klei kčŭt soh kơ Ñu suôt yang jhat hŏng klei myang Satan, leh anăn Khua Yang bi klă Ñu suôt yang jhat hŏng klei myang Yang Mngăt Jăk Aê Diê. Tơdah Ñu ngă bruă Ñu hŏng Yang Mngăt Jăk Aê Diê, snăn jih jang klei yuôm bhăn Ñu ngă anăn jing bruă Aê Diê leh anăn Ñu yơh jing Yang Mêsi, “Anak Y-Đawit” msĕ si phung ƀuôn sang bi kngăr bi êmuh hdơ̆ng diñu (êlan 23). Msĕ mơh, Khua Yang Yêsu bi êdah kơ Ƀuôn Ala Mtao Aê Diê truh leh anăn Ƀuôn Ala Mtao Aê Diê srăng bi êdah klei ktang klă ênŭm tơdah Ñu “čăp hĕ mnuih ktang” jing Satan, Khua Yang srăng ngă klei anăn ti kyâo bi kal. Khua Yang Yêsu mñă kơ phung Pharisi wăt kơ drei hruê anei, “Hlei pô amâo dôk tĭng kơ Kâo jing pô roh hŏng Kâo, leh anăn hlei pô amâo bi mguôp hŏng Kâo, ñu srăng klah mdê mdê” (êlan 30), klei anăn čiăng lač amâo dưi jing mkrah dưh ôh, mâo Khua Yang êjai, mâo Satan êjai. Tơdah amâo dôk tĭng Khua Yang ôh jing pô roh hŏng Ñu, tơdah amâo bi mguôp hŏng Ñu ôh snăn srăng klah mdê mdê amâodah arăng lui hĕ.
Êjai Yêsu jing mnuih ti lăn ala, Ñu knang kơ klei myang Yang Mngăt Jăk čiăng dưi hŏng satan. Hruê anei, drei jing phung đăo leh kơ Khua Yang, mâo Yang Mngăt Jăk dôk hlăm ai tiê, brei drei gưt leh anăn êbat tui si Yang Mngăt Jăk čiăng dưi hŏng klei kđeh tluh, dưi hŏng klei soh, hdĭp klei hdĭp bi guh kơang kơ Khua Yang. Phung ka thâo kral Khua Yang jŭm gah găn drei srăng dlăng kơ klei hdĭp drei. Hŏng klei blŭ, knhuah dôk dơ̆ng ƀơ̆ng huă drei bi êdah jih jang knuih mơ̆ng boh Yang Mngăt Jăk, srăng brei pô mkăn ƀuh klei hdĭp kpă ênô, thâo khăp mơ̆ng phung đăo leh čiăng kơ digơ̆ êpa hmao hriê kơ Khua Yang msĕ mơh. Hdơr bĕ, Khua Yang amâo tŭ ôh drei êbat ting ring rang dua nah, knŏng dưi ruah mă dôk tĭng Khua Yang, bi mguôp hŏng Ñu, amâodah amâo bi mguôp hŏng Ñu ôh leh anăn jing roh hŏng Ñu. Kyuanăn, gưt bĕ kơ Yang Mngăt Jăk kluôm dhuôm.
Si ngă drei dôk knang leh mơ̆ kơ Yang Mngăt Jăk čiăng dưi hdĭp hŏng klei hdĭp mâo klei dưi nanao leh anăn bi guh kơang kơ anăn Khua Yang hlăm klei hdĭp drei?
Ơ Khua Yang, đru bĕ kâo bi êdah Ih nanao hlăm klei hdĭp grăp hruê leh anăn knang nanao kơ klei myang Yang Mngăt Jăk čiăng dưi hŏng klei kđeh tluh, dưi hŏng klei soh, hdĭp klei hdĭp mâo klei tŭ dưn kơ Khua Yang.
Dlăng Klei Aê Diê Blŭ hlăm tlâo thŭn: Y-Êskiêl 36:22-37:28
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
