Jôsuê 3:6-17
“Mă-lei Yêsu khan: Bơngai bu mơ̆ng nơ̆r ‘Bok Kei-Dei păng pơm kiơ̆, sư boih hiôk hloh.”(Luka 11:28).
Nơ̆r jet tơchĕng pơwao:
– Kră Yang pơkă hăm Jôsuê tơdrong kiơ?
– ‘Bok Jôsuê athei kon pơlei pơm kiơ adrol kơ tŏk đak krong?
– Bơ̆n yua iŏk’bai hŏk’nâu lăm chăl arih kiơ̆ Kră Yang tơpă dang ei hloi thoi yơ?
Adrol kơ tŏk đak krong Jôrđăn,Kră Yang pơkă hăm Jôsuê khan Sư gô oei hơdai Jôsuê thoi Sư hlôi oei hơdai hăm ‘bok Môis sơ̆ noh.Kră Yang athei Jôsuê khan kơ lu ‘bok soi ei mưh truh tơ đak Krong bơih lei lu sư jur‘bơ̆t jih đak,athei lu sư dơ̆ng tơ lăm đak kơplah oei tung Hom Pơgơ̆p – Pơkă noh kơpal hơngiĕng dĭng mă kơtơ̆ng tơdrong Kră Yang chông anhăk bơtho tơ’bôh plơ̆ng dơ̆ng’mơ̆i na gơh yak năm pơtrơp.Na’bok Jôsuê khan hloi kơ kon pơlei athei năm jê̆ sư, mơ̆ng sư pơma roi Nơ̆r Kră Yang. Sư khan Kră Yang gô chông ba lu sư tŏk hlôi kơ đak Krong Jôrđăn, na Hom Pơgơ̆p Pơkă noh pơtih kơ đei Kră Yang oei tơ lăm lu sư, năm adrol kơ lu sư.Yua kơ đơ̆ng ‘noh bơih na lu sư băt kơ’Bok Kei-Dei arih ling-lang oei tŏk-bŏk lu sư, na lu adrĕch bơngai ‘nguaih oei tơ lăm Teh Đak mă Kră Yang Pơkă noh Kră Yang gô puh tơweh lê̆ tơ nai.
Lu sư khŏm rơih chă mơjĭt’bar’nu tang măt ăn dôm lu adrĕch Isơrael. Jôsuê kư̆m tơbăt ăn kơ kon pơlei khan mưh lu’bok soi mă tung Hom Pơgơ̆p Pơkă noh jơ̆ng lu sư jur lăm đak lei đak Krong gô tơklah hloi, ro pơpôi minh’bôt wă pơih ăn trong lu sư yak năm. Na kon pơlei chu pơm kiơ̆ hloi dôm tơdrong đơ̆ng Kră Yang chông anhăk bơtho tơ’bôh noh, lu sư yuih hloi bơsŭn,kiơ̆ hloi lu’bok soi tung Hom Pơgơ̆p Pơkă năm adrol kơ lu sư.Lu sư yak năm hăm jơhngơ̆m chu pơm kiơ̆ Nơ̆r Kră Yang mă khan bơyan ‘noh đak tih lah-lai bơnơ̆ ră. Kon pơlei Kră Yang yak năm hăm đon lui yua kơ lu sư lui ngeh kơ Kră Yang’Bok Kei-Dei Tơ’ngla arih ling-lang gô oei hơdai,ba trong lu sư,ăn kơ lu sư kĕ jei. Lu’bok soi yak năm hăm đon lui, chu pơm kiơ̆ Nơ̆r Kră Yang,lăp tơpang jơ̆ng lu sư chro’nao’bơm đak, jơ ‘noh hloi đak đơ̆ng tu khơ̆t kơtĕch ưh pă ro păng pơpôi minh’bôt hơlôk jơ‘mlôk tơ kơpal. Kơplah lu’bok soi tung Hom Pơgơ̆p Pơkă noh dơ̆ng gei’bơ̆t teh hrĕng,khul kon pơlei kư̆m yak năm trong teh hrĕng noh tŏk hlôi kơ Krong tih ei.
Kon pơlei Kră Yang gơh đei lăng’bôh tơm măt hloi tơdrong mơsêh hlĭch đơ̆ng Kră Yang pơm noh yua kơ đơ̆ng lu sư chu pơm kiơ̆ Nơ̆r Kră Yang. Adrol kơ lu sư wă tŏk đak Krong,lu sư hlôi “năm jê̆ păng mơ̆ng Nơ̆r Kră Yang.” Lu sư ưh kơ kiơ̆ kơdih wă, kư̆m ưh kơ đei chă jet wă kơ băt thoi yơ noh’mơ̆i mơ̆n, jơhngơ̆m lu sư kư̆m ưh kơ đei ngĭl ngŭl, pôm lui gơnang păng chu pơm kiơ̆ Nơ̆r Kră Yang đĕch.’Nâu bơih tơdrong hlĭch chrơp mă lu sư lăng’bôh tơm măt blŭng a hloi, kư̆m đei lơ lơ tơdrong hlĭch chrơp plơ̆ng nai tơ anăp dơ̆ng, lu sư kư̆m gô lăng’bôh tơm măt thoi noh mơ̆n mưh lu sư kư̆ kơ hơnơ̆ng chu pơm kiơ̆ Nơ̆r Kră Yang.
Bơ̆n bơngai lui bơih, tơm hloh, adrol hloh,bơ̆n athei lui gơnang, chu pơm kiơ̆ Nơ̆r Kră Yang mă khan lơ lơ tơdrong bơ̆n’bôh anat dêh ră. Phŏ kơnh đei tơdrong pơhlŭ wă kơ bơ̆n‘maih jang pơm lu tơdrong’bônh huay kơ anat noh đĕch,ưh kơ wă ôh jang pơm đĭ dôm tơdrong mă Kră Yang wă kơ bơ̆n jang pơm.
Phŏ kơnh bơ̆n ngê̆ kơ jet wă kơ băt thoi yơ noh’mơ̆i na chu chăi pơm; chu chăi jang;phŏ kơnh bơ̆n pơm mơ̆n ră mă-lei pơm ưh kơ tôm kiơ̆ thoi dôm tơdrong Kră Yang tơhlâu tơ’bôh, bơ̆n ưh kơ pơ̆n yak năm hăm đon lui, kư̆m ưh kơ pơ̆n achăng lê̆ dôm tơdrong,dôm tơmam kiơ mă bơ̆n đei noh wă chro jơ̆ng jur tơ đak.Apinh Kră Yang tơgŭm bơ̆n pơhrăm rok kơmĭl lu kon pơlei Isơrael păng lu’bok soi,lu sư sơ̆ lui gơnang,chu pơm kiơ̆ dôm Nơ̆r Kră Yang bơtho tơ’bôh,lu sư pre jơhngơ̆m “năm jê̆ păng mơ̆ng Nơ̆r”Kră Yang bơtho wă kơ băt dôm tơdrong Kră Yang wă na pơm kiơ̆ hloi,sĭt bơ̆n kư̆m gô’bôh dôm lu tơdrong hlĭch chrơp mă Kră Yang pơm lăm chăl arih bơ̆n.
Kơkuh kơ Ih Kră Yang, apinh Ih tơgŭm inh kư̆ kơ chu pơm kiơ̆ Nơ̆r Ih mă khan tơ’bơ̆p tôm tơdrong lăm chăl arih âu.Apinh Ih tơgŭm inh ling-lang năm jê̆ Ih,mơ̆ng Nơ̆r Ih bơtho na pơm kiơ̆ hloi, wă kơ inh đei mơn’bôh Ih oei hơdai,dŏng tơgŭm,chông anhăk chăl arih inh. Inh krao khan yua Anăn Kră Yang Yêsu Krist, Amen!
Bơ̆n’bôh bơ̆n kơdih tam mă chu pơm kiơ̆ Nơ̆r Kră Yang lăm lu anih ayơ, chhom ayơ lăm chăl arih bơ̆n?
Đŏk Sơ̆p Hla bơar’Bok Kei-Dei rim năr: Tơdrong Tơ’bôh 6
Kênh Youtube BHKTHN:
