I Pêtrôs 3:15
Trong tơm: “Mă-lei gah Yêsu Krist bơ̆n athei chu yom kơ Sư yua kơ Sư Kră Yang bơ̆n. Păng bơ̆n athei kơchăng ling lang wă kơ gơh tơl tơwih kơ đe dôm tơdrong đe wă jet bơ̆n yua kơ kiơ bơ̆n lui. Mă-lei bơ̆n athei tơl tơwih kơ sư mă ‘lơ̆ng mă hiôk.” (I Pêtrôs 3:15)
Nơ̆r jet tơchĕng pơwao:
– ‘Bok Pêtrôs tơ’bôh ăn tơdrong juăt trŏ kăl kiơ tơ lăm âu?
– Lu bơngai lui athei đei jơhngơ̆m thoi yơ mưh đe jet wă kơ băt gah Tơdrong ‘Nao ‘Lơ̆ng?
– Yua kơ đơ̆ng yơ bơ̆n gơh pơm dôm tơdrong noh?
Tơdrong juăt trŏ mă pêng ‘nâu gĭt kăl dêh, kăl kơ đei lăm chăl arih lu bơngai lui bơ̆n, noh “pôk ‘Bok Krist pơm Yŏng Tơ’ngla lăm jơhngơ̆m bơ̆n”, wă khan dôm tơdrong nai bơ̆n tơweh lê̆ đơ̆ng ‘Bok Krist păng lăng minh Sư đĕch Tơ’ngla mă bơ̆n ‘mêm,kơkuh ư-ang,bơ̆n kiơ̆ Sư tơnăp, chu yom tơdrong Sư pơgơ̆r,tơdrong Sư chông anhăk,lei lăi hăm tơdrong chu yom kơ ‘Bok Kei-Dei mơsêh mơyang pơgơ̆r, bơ̆n hli yom kơ minh Sư đĕch. Tơdrong “Pôk ‘Bok Krist pơm Yŏng lăm jơhngơ̆m bơ̆n noh” kư̆m wă khan chu yom kơ Kră Yang tôm tơdrong, arih kơnhăm wă kơ Sư lăp đon păng ư-ang kơ mĭnh Sư đĕch, ling-lang hli kơ bơ̆n pơm kơ Sư sơ’ngon, hloh kơ hli kơ kon bơngai gơh pơrăm dah gơh pơm kiơ kơ bơ̆n. (Mathiơ 10:28). Lu bơ̆n gô ưh pă hli kơ kon bơngai bơih, kư̆m ưh kơ hli kơ dôm tơdrong kiơ mă bơ̆n tơ’bơ̆p ‘bơ̆t anăp bơ̆n, tăp tang kơ bơ̆n. (Tơdrong Pơđơ̆k 29:25). Mă khan đei lơ tơdrong tơsŭl tơwŏk, tơdrong pơhlŭ pơlung gom tăp dăr kơ bơ̆n, đei Kră Yang, bơ̆n pă hli tơtăm bơih. Lui gơnang kơ Kră Yang ưh kơ trŏ kơ mĭnh tơdrong kăl wă lăm jơhngơ̆m đĕch ôh,mă-lei kư̆m kăl wă lăm kơ̆l’ngok tơdrong tơchĕng hai,’Bok Pêtrôs bơtho: “…bơ̆n athei kơchăng ling-lang wă kơ gơh tơl tơwih kơ đe dôm tơdrong đe wă jet bơ̆n yua kơ kiơ bơ̆n lui. Mă-lei bơ̆n athei tơl tơwih kơ sư mă ‘lơ̆ng mă hiôk.” (I Pêtrôs 3:15b). Bơ̆n athei băt kơnăl tơpă gah tơdrong “bơ̆n lui hơmĕng noh”păng tơdrong hlôh băt kơ nơ̆r Kră Yang, bơ̆n athei băt hơđăl tơpă wă kơ gơh tơl tơwih dôm tơdrong kiơ đe jet. ’Noh kư̆m wă khan thoi âu: Tơdrong ‘Bok Kei-Dei wă păng Nơ̆r Sư lăm Hlabơar, bơ̆n băt ‘noh bơih tơdrong kĕ pran tih lăm chăl arih lu Bơngai Lui, na bơ̆n khŏm chu kiơ̆ kơ ‘Bok Kei-Dei wă, chu kiơ̆ nơ̆r Sư bơtho. Mưh bơ̆n tơ’bơ̆p tơdrong đe jet,đe athei bơ̆n tơblang tơdrong bơ̆n lui, bơ̆n athei “ pre wă tơl tơwih”, wă khan khŏm pơnam kơ hŏk pơhrăm wă kơ hlôh nơ̆r Kră Yang rai ‘net rai tôm,lăm noh kư̆m ‘bơm kơ tơdrong bơ̆n lui ngeh na bơ̆n gơh tơl tơwih tôm tơdrong đe jet. Mă khan lei ră, bơ̆n khŏm tơl tơwih kơ lu sư hăm jơhngơ̆m “dim găt băt hli yom”, ưh kơ tơl hăm jơhngơ̆m pơang, tơ’bôh tơdrong bơ̆n hloh kơ lu sư ôh. Athei “hli yom wă khan bơ̆n athei pơjăr hăm lu tơdrong đe pơma pơjah wă kơ băt tơdrong trŏ glăi, kơplah ‘noh bơ̆n athei băt kơ’Bok Kei-Dei oei pơđêng đon mơ̆ng bơ̆n tơl tơwih kơ đe noh. Bơ̆n athei ‘blŏk, bơ̆n ‘nâu bơngai pơm kơdranh tơdrong Kră Yang, ưh kơ trŏ kơ bơ̆n ‘bok sek tơlang pơjah pơjăng băl kơplah sek tơdrong ôh.
‘Bok bơtho anăn sư Warren W.Wiersbe sư đei chih lăm hlabơar sư Tơblang kơthơ I Pêtrôs thoi âu: “’Bok Pêtrôs ưh kơ pơma khan lu Bơngai Lui pơjah pơjăng hăm lu bơngai tam mă lui kơ Kră Yang, mă-lei trŏ hloh, bơ̆n oei sa hăm đe noh hăm jơhngơ̆m hưch hanh,‘mêm mơnat tơbăt kơ lu sư dôm tơdrong bơ̆n lui păng yua kơ kiơ bơ̆n lui. Tơdrong kơnhăm bơ̆n noh ưh kơ trŏ wă kơ jei bơ̆n lăm tơdrong pơjah băl ôh, mă-lei wă pơm kơ bơhngol mă oei hiong răm wih brŏk tơ ‘Bok Krist.
Chu yom kơ ‘Bok Krist păng chu yom kơ Nơ̆r Sư noh dim găt băt hli yom kơplah roi tơblang tơdrong lui, tơdrong ‘noh bơih gơh pơm kơ bơ̆n kĕ hlôi đơ̆ng tơdrong pơlong, chă đei bơhngol lu bơngai yoch chông ba brŏk tơ Kră Yang.
Bơ̆n kăl kơ hơmet lê̆ adrol tơdrong kiơ wă kơ jing minh ‘nu bơngai pơm kơdranh ră roi đei yua?
Kơkuh kơ Ih ơ Kră Yang, Ih Yŏng Tơ’ngla chăl arih ĭnh, Tơ’ngla pơjing păng dŏng pơlaih, huai iŏk ĭnh. Inh wă ling-lang hli yom, kơkuh ư-ang kơ Ih, pơm kiơ̆ thoi Ih wă, măloi, kơplah inh ră roi tơdrong Ih kơ lơ bơngai mơ̆ng kơtơ̆ng noh. Inh krao khan yua anăn Kră Yang Yêsu Krist, Amen!
Đŏk Sơ̆p Hla bơar ‘Bok Kei-Dei lăm pêng sơnăm: I Samuel 8
Kênh Youtube BHKTHN:
