I Pêtrôs 3:13
Trong tơm: “Dah bơ̆n pơm ‘lơ̆ng ling-lang ưh kơ đei bu pơm kơnê̆ kơ bơ̆n ôh”.(I Pêtrôs 3:13)
Nơ̆r jet tơchĕng pơwao:
– ’Bok Pêtrôs bơtho khan kơ lu bơngai lui tơdrong kiơ kơplah arih hơdai hăm bơngai ala teh areh ayăt kơ Tơdrong ‘Nao ‘Lơ̆ng?
– Yua kơ kiơ sư bơtho khan thoi noh?
– Bơ̆n yua iŏk tơdrong bơtho ‘nâu hei kơplah tơ’bơ̆p đe hil areh pơm kơnê̆ lăm tơdrong jang ră roi tơdrong Kră Yang thoi yơ?
Kră Yang Yêsu hlôi krao khan apinh Yang ‘Bă thoi âu: “Inh ưh kơ apinh Ih iŏk lu sư đơ̆ng ala teh âu ôh, Inh apinh Ih wei-lăng lu sư mă kơjăp wă kơ lu sư hlôi đơ̆ng yang kơnê̆ Satan.” (Yôhan 17:15)
Kră Yang Yêsu pơjao ăn kơ lu bơngai lui kơ Sư tơdrong jang gĭt kăl noh jing bơngai pơm kơdranh ră roi tơdrong Sư tơ ala teh âu (Mathiơ 28:18-19), mă-lei arih hăm bơngai ala teh mă areh ayăt plơ̆ kơ Kră Yang ưh kơ ‘bônh ôh (Mathiơ 10:16-18, 21-23). Kơplah jơ năr Pêtrôs chih kơthơ ‘nâu sơ̆ đei ‘bok pơtao Nêrô hơtai oei pơm kơnê̆ krưp pơrăm bơngai lui. Pơm liơ wă kơ gơh jing bơngai pơm kơdranh ră roi tơdrong Kră Yang, roi ăn kơ lu bơngai ala teh areh ayăt kơ Kră Yang thoi noh?
‘Bok Pêtrôs hlôi bơtho tơ’bôh ăn kơ Khul Lui dôm tơdrong juăt trŏ kăl lăm kơthơ I Pêtrôs 3:13-17. Tơdrong juăt trŏ mă 1, noh athei Hưch Hanh ‘Maih Pơm ‘Lơ̆ng.
Lơ bơngai lui kơplah jơhnơr ei sơ̆ hlôh hơwơ̆l tơdrong Kră Yang bơtho, kư̆m hlôh hơwơ̆l tơdrong lu jơ̆ng ‘bang đei bơtho mơ̆n, lu sư khan lăm teh đak âu ‘bĕnh kơ tơdrong kơnê̆ thoi noh, yua kơ kiơ bơ̆n athei adrin tơrô̆ tơiung, pơm dôm tơdrong ‘lơ̆ng wă pơm kiơ yua kơ mă adrol mă hơtuch đe kư̆m oei pơm kơnê̆ đĕch mơ̆n! Yua kơ đơ̆ng tơdrong tơchĕng thoi ‘nei hei bơih ‘bônh kơ tŭn lê̆ lơ bơngai, lu bơngai lui chơchă trong wă arih kơdrô̆ tơklah đơ̆ng kon pơlei pơla tơring tơrang. Mă khan lei ră, nơ̆r Pêtrôs jet noh tơ’bôh ăn mă khan pơlei pơla tơring tơrang ‘bĕnh kơ tơdrong kơnê̆, mă khan lu ‘bok pơtao pơm kơnê̆ dêh ră thoi kơ ‘bok pơtao Nêrô, mă-lei oei đei tơdrong juăt ‘lơ̆ng trŏ bơtho pơyum ăn lu bơngai lui, noh dah lu bơngai lui “Hưch Hanh ‘Maih Pơm ‘Lơ̆ng” lei ưh kơ đei bu pơm kơnê̆ pơrăm lu sư ôh.
‘Nâu hei tơdrong sư noh, lu bơngai lui ưh kơ pôm “pơm ‘lơ̆ng” đĕch ôh, mă-lei athei “hưch hanh ‘maih pơm ‘lơ̆ng”. Hưch hanh ‘maih pơm ‘lơ̆ng noh wă pơma roi hơlen kơ minh ‘nu bơngai đei tơdrong rĕng kơnhăm wă pơm tơdrong tih kăl, jơhngơ̆m sư hưch ‘maih tơpă wă pơm keh tơdrong tih kăl mă sư đei kơnhăm bơih noh. Lăm jơ hnơr Pah ‘Nao đei minh khul pơm tơdrong teh đak, lu sư ‘mêm kơ teh đak sư kơdih, đe krao lu sư Sêlôt wă khan “bơngai hưch hanh ‘maih dêh”, pơkă khŏm blah lê̆ lu bơngai tơmoi char ‘nguaih pơgŏ pơđep lu bơngai Juđê, wă kơ lu bơngai Juđê rơngei, lu sư pơkă wă blah, mă chă đon blah thoi âu, thoi yơ noh, lu sư kư̆ khŏm blah, mă truh pham lĕch sĕch huŏng hĭ lu sư khŏm chu iŏk ‘mơ̆i. Tơdrong mă Pêtrôs ‘maih krao rim ‘nu bơngai lui noh ưh kơ pôm pơm ‘lơ̆ng đĕch ôh mă-lei athei ‘mêm kơ tơdrong ‘lơ̆ng mă tơpă thoi lu bơngai ei ‘mêm tơpă kơ teh đak sư noh.‘Bơ̆t cheng kơ’noh, nơ̆r “Hưch hanh” ‘nâu hei bơ̆n kư̆m tơlang thoi âu: “bơngai pơm rok”, thoi nơ̆r mă ‘bok Pôl yua lăm I Kôrin tô 4:16: “Pơm rok inh bĕ”. Thoi noh Pêtrôs wă kơ lu bơngai lui pơm rok, pơm kiơ̆ dôm tơdrong’lơ̆ng, tơdrong dŏng tơgŭm mă ‘Bok Krist hlôi pơm kơmĭl, hlôi pơm trong bơih. Dang ei tơdrong arih kon bơngai bơ̆n gơh tơplih kiơ̆ kơ jơhnơr bơ̆n dang ei thoi yơ thoi noh, mă-lei jơhngơ̆m kơnê̆ Satan noh ưh kơ tơplih ôh, sư oei hil areh, blah tơdrong Kră Yang hơnơ̆ng đĕch. Kon pơlei Kră Yang athei ling-lang “hưch hanh ‘maih pơm ‘lơ̆ng” , yua kơ mă layơ layơ ăp mă bơ̆n pơm ‘lơ̆ng ‘mơ̆i na mă tơdrong kơnê̆ pran hĭ dang yơ noh oei jei bơ̆n, tơdrong kơnê̆ răm rai đĭ.
Mă bơ̆n tơ’bơ̆p tơdrong đe hil areh, đe blah bơ̆n đơ̆ng yơ đơ̆ng yơ, bơ̆n hăm đĭ jơhngơ̆m oei pơm ‘lơ̆ng ưh?
Kơkuh kơ Ih Kră Yang, đơ̆ng inh yoch, Ih wă phak, inh bơnê kơ Ih pơklaih, ăn kơ inh rơngei huay pă pŭ tơdrong Ih hil phak, ăn kơ inh jing kon Ih ‘lơ̆ng rŏ hơdah hơdong.Apinh Ih tơgŭm inh arih pơdah tơ’bôh dôm tơdrong ‘lơ̆ng Ih kơ lu bơngai ala teh măng mu ‘nâu. Inh krao khan yua anăn Kră Yang Yêsu Krist, Amen!
Đŏk Sơ̆p Hla bơar ‘Bok Kei-Dei lăm pêng sơnăm: I Samuel 6
Kênh Youtube BHKTHN:
