II Hơ’mon 33:10-17
“Tơdah kon pơlei pơla Inh, đe krao lu sư kon Inh, drap bon kơkuh, krao khan, chơchă Inh păng tơbral achăng lê̆ trong kơnê̆ lei Inh oei kơpal plĕnh ti gô mơ̆ng, mơnat ăn huay pă jô̆ yoch lu sư păng ăn teh lu sư thoi đêl.” (II Hơ’mon 7:14)
Nơ̆r jet tơchĕng pơwao:
– Yua kơ kiơ ‘Bok Kei-Dei pơm kơ pơtao Manase đei tơdrong pơmat tat?
– Kră Yang tơl tơwih nơ̆r sư krao khan păng hơmet ming sư thoi yơ?
– Bơ̆n athei pơm kiơ mưh bơ̆n pơm yoch hăm Kră Yang?
Đei lơ pơtao pơm kơnê̆ pơgơ̆r lu bơngai Juđa, na pơtao Manase âu sư kư̆m pơgơ̆r lu bơngai Juđa, sư kư̆m pơm kơnê̆ thoi lu pơtao nai ei mơ̆n. Sư hlôi pơm lơ tơdrong kơnê̆, chĕp ba rup yang đơ̆ng lu bơngai tơmoi tơmơ̆t lăm Hnam akŭm tơm ‘Bok kei-Dei. Sư kư̆m pơyơ̆r kon sư soi sơmah kơ rup yang. (II Pơtao 21:6). Kră Yang hlôi wơh lu bơngai pơtruh nơ̆r ‘Bok Kei-Dei năm hil tơbăt kơ sư bơih ră mă-lei sư ưh kơ chu,păng sư pơm dơ̆ng lơ tơdrong kơnê̆ (tr.10). Kơlih yua kơ thoi noh na Kră Yang yua lu bơngai Asiri blah rôp pơtao Manase, lu đe ei pơm kơnê̆ kơ sư dêh, iŏk gơwŏk bơsei tôt lê̆ muh sư na dui anhăk sư tơ Babilôn nhen thoi dui rơmo (tr.11). Kră Yang ăn phep lu bơngai Asiri pơm tơdrong ‘noh wă kơ pơtao Manase ‘brĕng ‘blŏk yua kơ sư ưh kơ chu kơ nơ̆r lu bơngai pơtruh nơ̆r’Bok Kei-Dei đei hil tơbăt kơ sư bơih noh.
Kơplah đei tơdrong gleh glăn pơmat tat, pơtao Manase ‘blŏk kơ Kră Yang, hăm đĭ jơhngơ̆m tơjur akâu, iŏk đon ala krao apĭnh Kră Yang (tr.12). Kră Yang’Bok Kei-Dei hlôi wei nơ̆r Sư pơkă mưh lu kon pơlei Sư tơjur akâu iŏk đon ala krao apĭnh păng tơbral na Sư gô mơ̆ng , mơnat ăn, pơklaih lu sư đơ̆ng tơdrong yoch (II hơ’mon 7:14). Pơtao Manse hlôi mơn đei bơih đêl tơdrong Kră Yang pơkă sĭt,đêl jơhngơ̆m Kră Yang ‘mêm mơnat pơklaih bơih sư yua kơ sư băt tơbral tơpă noh.Kră Yang’Bok Kei-Dei tơl tơwih nơ̆r sư krao khan, ăn kơ sư brŏk tơ pơlei Jêrusalem wă pơgơ̆r kon pơlei (tr.13).
Đơ̆ng rŏng kơ đei tơdrong pơmat tat noh,pơtao Manase ‘brĕng ‘blŏk tơpă păng tơbral đĭ jơhngơ̆m. Sư băt kơ Kră Yang ‘Bok Kei-Dei bơih Tơ’ngla mă hơmet ăn sư jing ‘lơ̆ng thoi đêl. Sư tơbral tơdrong yoch sư kơdih păng đĭ jơhngơ̆m tơplih tơdrong arih jing ‘lơ̆ng, hơmet ming dôm tơdrong sư jang, tơdrong sư pơm kơnê̆ sơ̆ ki. Sư teh lê̆ đĭ lu rup yang, hơmet ming lu chơnang soi kơkuh kơ Kră Yang ‘Bok Kei-Dei, pơyơ̆r kơ ‘Bok Kei-Dei tơmam soi hiôk hian păng tơmam soi bơnê.Kon pơlei Juđa oei pơyơ̆r tơmam soi tơ lu anih kơjung, mă-lei pơyơ̆r ăn kơ minh ‘nu KrăYang‘Bok Kei-Dei đĕch (tr.15-17).
Yua kơ đơ̆ng tơdrong ‘mêm mơnat tih dêh noh na Kră Yang mơnat păng hơmet ming pơtao Manase kơplah sư đĭ jơhngơ̆m krao apinh. Kră Yang mơ̆ng nơ̆r sư krao khan tơbral sơ’ngon kơ tơdrongyoch, Kră Yang hơmet ming, ăn kơ sư đêl anih pơtao sư dơ̆ng. Yua kơ jơhngơ̆m ‘mêm mơnat na Kră Yang mơnat ăn tơdrong yoch minh ‘nu pơtao mă pơm kơnê̆ dêh păng ăn kơ sư gơh hiôk hơiă hăm Tơ’ngla mă pơklaih sư. Tơdrong ‘nâu tơ’bôh kơ bơ̆n ưh kơ đei tơdrong yoch kiơ tih dêh dĭng mah Kră Yang ưh kơ gơh pơklaih.
Mưh bơ̆n ‘bôh băt kơ bơ̆n kơdih pơm yoch, bơ̆n athei roi tơdrong yoch noh hloi, roi kơ Kră Yang khan inh tơbral đĭ jơhngơ̆m apĭnh Ih mơnat pă jô̆ yo.Inh kăl kơ Ih tơgŭm mơnat, apĭnh Ih pơklaih inh. Yua kơ tơdrong ‘mêm, Sư pơkă bơih, sĭt Sư gô mơnat ăn păng hơmet ming bơ̆n jing ‘lơ̆ng.Sư oei wă mơnat kơ bơ̆n dơ̆ng păng wei lăng bơ̆n thoi kon Sư mă ‘mêm kơeng.
Kơkuh kơ Ih Kră Yang, apinh Ih tơgŭm inh ling-lang ‘bôh băt kơ inh kơdih yoch wă kơ inh tơbral păng tơjur akâu iŏk đon ala krao khan apinh Ih mơnat pơklaih păng hơmet ăn inh jing ‘lơ̆ng. Inh krao khan yua anăn Kră Yang Yêsu Krist, Amen!
Mưh bơ̆n pơm yoch, bơ̆n hăm tơjur akâu iŏk đon ala tơbral păng krao apinh Kră Yang mơnat pă jô̆ yo tơdrong yoch bơ̆n ưh?
Đŏk Sơ̆p hlabơar’Bok Kei-Dei lăm pêng sơnăm: Hơriso 48-49.
Kênh Youtube BHKTHN:
https://www.youtube.com/c/bhkthn
