Chivkeeb 45:1-15
Nqe cim:
“Yog muaj leejtwg ua phem rau nej, nej tsis txhob ua phem pauj, tiamsis nej yuav tsum xyaum ua qhov uas sawvdaws pom hais tias yog tej uas zoo xwb. Nej yuav tsum ua txhua yam zoo raws li nej paub ua, nej thiaj yuav nrog sawvdaws nyob sib haum.” (Loos 12:17-18)
Lus nug rau sawvdaws xav:
– Vim li cas Yauxej zam txim rau nws cov kwvtij?
– Nws qhia tshwm lub siab zam txim li cas?
– Ua li cas peb thiaj yuav nyob tau sib haum nrog tus uas tau ua rau peb mob lawm?
Tom qab tej kev txomnyem, kev mob, kev tsis ncaj ncees, Vajtswv pub rau Yauxej los tau lub meejmom ua nom tswj lub tebchaw Iziv. Yauxej rov tau ntsib nws cov kwvtij, yog cov uas tau muab nws muag mus ua qhev, thaum uas lawv tuaj thov yuav mov noj. Dhau lub sijhawm tshawb fawb thiab sim cov tij laug lub siab, txog thaum uas nws zais tsis tau nws tus kheej rau cov tij laug. Yaujxej tsa suab quaj, qhia nws rau cov tijlaug thiab nug nws txiv puas tseem noj qab nyob zoo hauv lub sijhawm uas cov tijlaug ntshai kawg nkaus li (nqe 1-3). Paub tseeb hais tias Yauxej totaub lawv txoj kev ntshai nrog rau lawv tej kev txhaum uas tau ua rau nws, thaum rov ntsib nws. Vim li ntawd, nws txhawb lawv zog “Tsis yog nej muag kuv los rau ntawm no, tiamsis yog Vajtswv txib kuv los” (nqe 8).
Yauxej qhia tshwm tagnrho lub siab zam txim rau nws cov tij laug dhau los ntawm qhov uas nws zeem paub Vajtswv lub homphiaj hauv nws lub neej. Hauv lub meejmom uas nws muaj tamsim no, yog yuav ua phem pauj rau cov tijaug mas yoojyim kawg li. Tiamsis hauv siab ntseeg Vajtswv thiab zeem paub Vajtswv siab nyiam nws zoo siab zam txim rau nws cov tijlaug thiab ua zoo tagnrho rau lawv txhua tus tsev neeg. Yauxej kom lawv mus tos nws txiv tuaj rau tebchaws Iziv. Nws yuav thov vajntxwv Falaus pub muaj chaw nyob noj rau lawv thiab Yauxej yuav saib xyuas, tu nws tsev neeg hauv lub caij tshaib nqhis no. Yauxej txeev qhia meej tshwm lub siab zam txim thiab siv zog ua kom sib haum nrog nws cov tijlaug (nqe 9-13).
No yog lub sijhawm tagnrho Yauxej tsev neeg cov kwvtij los nyob ua ke sib tham muaj kev zoo siab. Tom qab ntau lub xyoo sib ncaim nrog rau ntau txoj kev txomnyem nyuaj siab, lawv rov sib ntsib hauv kev zoo siab thiab poob kua muag. Kho tau txoj kev sib raug zoo hauv lub tsev neeg los ntawm Yauxej txoj kev zam txim thiab sib haum nrog cov tijlaug. Lub txim nyhav ntawm cov tijlaug tau muab tshem tawm. Thaum no, lawv sib puag ua ke, ib leeg txais yuav ib leeg poob kua muag hauv kev zoo siab (nqe 14). Los ntawm txoj kev ntshai hais tsis tau lus (nqe 3), thaum no cov tijlaug hais tau lus nrog Yauxej (nqe 15).
Timthawj Paulus qhia: “Yog muaj leejtwg ua phem rau nej, nej tsis txhob ua phem pauj, tiamsis nej yuav tsum xyaum ua qhov uas sawvdaws pom hais tias yog tej uas zoo xwb. Nej yuav tsum ua txhua yam zoo raws li nej paub ua, nej thiaj yuav nrog sawvdaws nyob sib haum” (Loos 12:17-18). Hauv kev ua neej, peb yeej zam tsis dhau qee lub sijhawm uas lwm tus ua phem rau peb. Ntau tus mus pw tsheej tag hmo nrhiav kev ua phem pauj phem. Vajtswv tsis xav kom peb muaj lub siab ua phem pauj phem, tiamsis yuavtsum muaj lub siab dav thiab siv zog ua qhov zoo rau sawv daws pom. Xaiv ua neej zam txim yuav tau txais nqis zog yog kev sib raug zoo. No yog ib yam uas tsis yoojyim vim li ntawd Vajtswv Txojlus qhia peb yuavtsum tau siv zog. Vajtswv yuav pub koob hmoov rau peb ib yam li pub rau Yauxej.
Thov Vajtswv,
Vajtswv, thov pub rau nyuam yaus muaj lub siab ntev, lub siab hlub tshua thiab zoo siab sib zam txim kom nrog sawvdaws nyob sib haum. Nyuam yaus tuav Tswv Yexus Khetos lub npe thov, Amees.
Peb puas zoo siab zam txim rau tus uas ua rau peb raug mob thiab ua neej nyob sib haum nrog lawv?
Nyeem Vajluskub hauv peb lub xyoos: Phau Ntawv Nkauj 50-51
Kênh Youtube BHKTHN:
