Klei Aê Diê Blŭ: Klei Mphŭn Dơ̆ng 4:3-5
Êlan kliăng: “Hŏng klei đăo Y‑Aƀel myơr kơ Aê Diê mnơ̆ng ngă yang jăk hĭn kơ Y‑Kain. Hŏng klei đăo anăn Aê Diê tŭ ñu jing kpă, hưn bi êdah klei anăn êjai tŭ mnơ̆ng ñu myơr. Ñu djiê leh, ƀiădah hŏng klei ñu đăo ñu ăt dôk blŭ.” (Hêbrơ 11:4).
Klei êmuh ksiêm mĭn: Ya klei truh leh kơ klei hdĭp Y‑Kain? Ya ngă? (dlăng thiăm Hêbrơ 11:4)? Si klei Y‑Kain lŏ wĭt ngă? Si drei khăng lŏ wĭt ngă tơdah tuôm hŏng klei truh?
Jih jang klei msĕ si êđăp ênang jăk mơak snăk tơl truh sa hruê dua ayŏng adei Y‑Kain leh anăn Y‑Aƀel mđrăm mbĭt nao kkuh mpŭ leh anăn myơr mnơ̆ng ngă yang kơ Khua Yang. Ƀiădah Aê Diê tŭ mnơ̆ng Y‑Aƀel myơr ƀiădah amâo tŭ ôh mnơ̆ng Y‑Kain myơr, ya ngă? Srăng mâo lu klei wĭt lač. Tal sa, kyua mta mnơ̆ng myơr. Năng ai mơ̆ng phŭn, Aê Diê bi êdah leh kơ Y‑Ađam leh anăn H’Êwơ rup mnơ̆ng myơr ngă yang hŏng êrah mơ̆ng klei bi mdjiê sa drei hlô mnơ̆ng leh anăn mă klĭt anăn yua ngă ao bi hơô kơ diñu, leh anăn diñu mtô leh mơh kơ phung anak diñu. Êdei kơnăn, Aê Diê êmuh leh Y‑Kain: “Si ngă ih ăl leh anăn ƀô̆ mta ih ktrŏ? Tơdah ih ngă jăk, amâo djŏ hĕ kâo srăng tŭ ih? ” (êlan 7a). Klei êmuh anei čiăng lač Y‑Kain thâo leh klei djŏ ƀiădah amâo gưt asăp ôh ăt ngă tui si klei ñu mĭn kyuanăn yơh mnơ̆ng ñu myơr Khua Yang amâo tŭ ôh. Brei hdơr nanao Aê Diê yơh jing phŭn kơ klei kkuh mpŭ leh anăn Pô čuăn kơ klei kkuh mpŭ. Tal dua, năng ai ai tiê myơr. Y‑Aƀel myơr leh mnơ̆ng jăk hĭn “êđai biăp mđai tal êlâo” , bi Y‑Kain knŏng myơr “boh mơ̆ng lăn” ƀiădah amâo djŏ “boh hlâo hlang” ôh (êlan 3-4). Lu mnuih hruê anei myơr kơ Khua Yang lu mta mnơ̆ng ƀiădah ăt djă pioh mnơ̆ng jăk hĭn leh anăn yuôm hĭn kơ ñu pô.
Ƀiădah năng ai phŭn knhal klă hĭn jing ai tiê mtrŭt myơr mnơ̆ng ngă yang, bi êdah hlăm Hêbrơ 11:4. Êlan Klei Aê Diê Blŭ anei kñăm ktang “Hŏng klei đăo Y‑Aƀel myơr kơ Aê Diê mnơ̆ng ngă yang jăk hĭn kơ Y‑Kain”, klei anăn čiăng lač Y‑Aƀel myơr mnơ̆ng ngă yang hŏng klei đăo kơ Aê Diê, bi Y‑Kain myơr mnơ̆ng ngă yang msĕ si ngă klei bhiăn klei đăo tui si klei amĭ ama ñu mtô lač. Tinei, drei thâo kral jih jang bruă ngă amâo djŏ hŏng klei đăo kơ Aê Diê amâo jing yuôm ôh ti anăp Ñu (Hêbrơ 11:6).
Hrô kơ klei thâo kral yơh klei soh pô bi Y‑Kain lĕ “ăl snăk leh anăn ƀô̆ mta ñu ktrŏ” (êlan 5b). Ñu ăl kơ Aê Diê leh anăn wăt kơ adei ñu mơh kyuadah ñu bi mĭn Aê Diê wĭt lač amâo mtăp mđơr hŏng ñu ôh. Kyua mơ̆ng klei mgao yơh ngă kơ Y‑Kain amâo tŭ ôh klei soh ñu ngă čiăng thâo kmhal, leh anăn ñu kăn đup gưt rei tui si klei Aê Diê čiăng.
Năng ai drei ăt khăng wĭt ngă msĕ si Y‑Kain mơh tơdah Khua Yang mkra mjuăt kyua drei ngă soh. Akâo kơ Khua Yang brei drei pioh mmông dôk ñăt kriêp čiăng akâo kơ Khua Yang bi êdah klei Ñu čiăng, kăp hưn klei soh leh anăn kmhal, amâo ruăt ngêñ ăl kơ Khua Yang, kơ pô mkăn, leh anăn kơ ya klei truh ôh.
Si ngă drei mâo djăp klei luă gŭ kăp mă tŭ klei Khua Yang mkra mjuăt hŏng ai tiê mơak mơ̆?
Wah lač: Ơ Khua Yang, bi mni kơ Ih kyuadah khăp kơ kâo Ih mkra mjuăt čiăng kơ kâo ƀrư̆ hruê jing klă kluôm hĭn dưi msĕ si Ih hĭn. Akâo kơ Ih brei kâo mâo ai tiê luă gŭ đup gưt jih klei Khua Yang čiăng.
Dlăng Klei Aê Diê Blŭ hlăm tlâo thŭn: Y‑Êsra 8:31-9:15
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
